မဲခေါင်၊ ဖေဖော်ဝါရီ ၁၆
ဗြိတိန်ဟာ ရုရှားနဲ့ နေတိုးအနောက်အင်အားစုအကြား တင်းမာနေမှုကနေ တတိယကမ္ဘာစစ်ဖြစ်လာနိုင်လို့ ကြိုတင်စစ်ရေးလေ့ကျင့်ပြင်ဆင်မှုအဖြစ် နိုင်ငံထုတ် အကောင်းဆုံးတင့်ကားဖြစ်တဲ့ Challenger 2 တင့်ကား တွေကို အင်္ဂလန်ရေလက်ကြားနဲ့ ဒိုဗာရေလက်ကြား အကြား ၂၃ မိုင်ကျော် ရေအောက်ကဖောက်လုပ်ထားတဲ့ ချန်နယ်ဥမင်လှိုင်ခေါင်း (Channel Tunnel) ကနေ ဥရောပ နိုင်ငံတွေဆီ ဒါဇင်ချီ စေလွှတ်နေပြီဖြစ်ပါတယ်။
ဖေဖော်ဝါရီလကုန်ပိုင်းကနေစတင်ပြီး နေတိုးမဟာမိတ်တပ်တွေဟာ သမိုင်းမှာ အကြီးမားဆုံး ပူးပေါင်း စစ်ရေး လေ့ကျင့်မှုအဖြစ် ၃၂ နိုင်ငံက စစ်သည် ၉၀၀၀၀ နဲ့ လေယာဉ်၊ သင်္ဘော၊ ရဟတ်ယာဉ်၊ ဂျက်လေယာဉ်၊ တင့်ကား၊ သံချပ်ကာကားတွေအပါ အဆင့်မြင့်လက်နက်တွေနဲ့ မဟာဗျူဟာကျတဲ့ နေရာတွေမှာ ပူးပေါင်းလေ့ကျင့်ကြမှာ ဖြစ်ပါတယ်။
ဒါကြောင့် ဗြိတိန်ဟာ တပ်သား ၂၀၀၀၀ စေလွှတ်မှာဖြစ်ပြီး ယူကရိန်းကို ထောက်ပံ့ပေးအပ်ထားတဲ့ အဆင့် အမြင့်ဆုံး Challenger 2 တင့်ကား ဒါဇင်ချီကို ဂျာမနီကို ဦးစွာစေလွှတ်ပေးပြီး စစ်ရေးလေ့ကျင့်မှုမှာ ပါဝင်ဖို့ တင့်ကားတပ်ဖွဲ့ဝင် ၅၀ ကျော်ကို အရင် စေလွှတ်တာဖြစ်ပါတယ်။
၁၉၈၄ ခုနှစ်က ခြင်္သေနှလုံးသား စစ်ရေးလေ့ကျင့်မှုမှာ ဗြိတိန် စစ်သည် ၁၃၂၀၀၀ စေလွှတ်ခဲ့ပြီးနောက် အခုတစ်ကြိမ်က အများဆုံးစေလွှတ်မှု ဖြစ်ပြီး သံချပ်ကာကားတပ်ကိုလည်း အလုံးအရင်း စေလွှတ်ပေးမှာဖြစ်ပါတယ်။
ဗြိတိန်တပ်မတော်မှာ Challenger 2 တင့်ကား၂၁၃ စီးရှိပြီး မနှစ်က ယူကရိန်းကို ၁၄ စီးပေးအပ်ခဲ့ပါတယ်။ ဒီထဲမှာ တစ်စီးက ရုရှားဒရုန်းတိုက်ခိုက်မှုကြောင့် ထိမှန်ပေမယ့် လိုက်ပါသူ ၃ ယောက်စလုံး အသက်ရှင်သန်ပြီး အခု ပြန်လည်ပြင်ဆင်ပြီးစီးခဲ့ပါပြီ။
နောက်ထပ် ၁၈ စီးကို အက်စတိုးနီးယားက နေတိုးခံစစ်ဇုန်ထံ စေလွှတ်ပေးထား ပြီး လက်ရှိ တင့်ကားလက်ကျန်တွေကို နည်းပညာအဆင့် ထပ်မံမြှင့်တင်မှုလုပ်ပြီးတာနဲ့ ၁၄၈ စီးကို ထပ်မံ စေလွှတ်မယ်လို့ သိရှိရပါတယ်။
Ref:Thesun
MKF-001
