မဲခေါင်၊ ဇွန် ၃
ရှမ်းပြည်မြောက်ပိုင်း၊ ကျောက်မဲမြို့နယ်မှာ ၁၀၂၇ စစ်ဆင်ရေး ဒုတိယပိုင်းစတင်တဲ့ ဇူလိုင်လ ၂၅ ရက်နေ့ကစပြီး အခြေခံစားသောက်ကုန်ပစ္စည်း ရောင်းချသူတွေ ရှားပါးနေတယ်လို့ ဒေသခံတွေက ပြောပါတယ်။
လတ်တလောမှာ စားသောက်ကုန် ရောင်းချသူ ရှားပါးနေတဲ့အပြင် ရှိတဲ့ဆိုင်တွေကလည်း မတန်တဆဈေးတင်ရောင်းချနေပြီး အလှူရှင်လည်း နည်းပါးနေတာကြောင့် စစ်ဘေးရှောင် ၁၂၀၀၀ ကျော်အတွက် အခက်အခဲဖြစ်နေတယ်လို့ ဆိုပါတယ်။
“ ပိုက်ဆံလှူတဲ့သူတွေက ပိုများနေတာပေါ့နော်။ စားစရာတွေ၊ စောင်တွေ လှူပေးတာက ပိုအဆင်ပြေတယ်။ ပိုက်ဆံလှူတဲ့အခါကျတော့ ဒီမှာသူတို့က ဝယ်စားရတာ အခက်အခဲဖြစ်တယ်။ ဒီမှာရောင်းတဲ့သူတွေကလည်း ရှောင်ကုန်ပြီလေ” လို့ ဒေသတွင်း ကူညီဆောင်ရွက်ပေးနေသူ တစ်ဦးက ပြောပါတယ်။
ကျောက်မဲမြို့နယ်မှာ ဆန်ကြမ်း တစ်အိတ် ၃ သိန်းဝန်းကျင်၊ စားအုန်းဆီ တစ်ပိဿာ ၃ သောင်းကျပ်ဝန်းကျင်၊ ကြက်ဥ တစ်လုံး တစ်ထောင်ကျပ်နီးပါး ရှိနေပြီး ရောင်းချသူ အရေအတွက်က စစ်ဘေးရှောင် အရေအတွက်ရဲ့ ၁၀ ပုံတစ်ပုံခန့်သာ ရှိတယ်လို့ သိရပါတယ်။
မြို့နယ်တစ်ခုလုံး လျှပ်စစ်မီး ပြတ်တောက်နေတာကြောင့် စပါးသိုလှောင်ထားသူတွေလည်း ကြိတ်လို့ မရတဲ့အပြင် အသားငါးရောင်းချသူလည်း မရှိသလောက် နည်းပါးနေပြီး ဟင်းသီးဟင်းရွက် ရောင်းချသူတွေက မရှိတော့ဘူးလို့ ဆိုပါတယ်။
“အခုက ပိုက်ဆံရှိတာတောင် စားချင်တိုင်း စားလို့မရတဲ့ဘဝ။ အသားငါးဆို ၂ ရက်လောက် စောင့်ရတယ်။ ခေါက်ဆွဲခြောက်တောင် ဝယ်ဖို့ တအားခက်တယ်။ အလှူရှင်တွေ ရှိရင်တော့ ပေါ့ပေါ့ပါးပါး ဆူလွယ်နပ်လွယ်တာမျိုးတွေ ထောက်ပံ့စေချင်တယ်” လို့ နားပြိန်းဘုန်းကြီးကျောင်းမှာ ခိုလှုံနေသူ တစ်ဦးက ပြောပါတယ်။
ကျောက်မဲမြို့နယ်က နားပြိန်း၊ ပုံဝိုး၊ ချောင်းချောက်၊ နားထွန်၊ နောင်ပိန်၊ ခဲမွန်၊ ခိုအုံ၊ ခိုမုန်း၊ နောင်ပိန်လေး စတဲ့ ဘုန်းကြီးကျောင်းတွေမှာ စစ်ဘေးရှောင် ၁၂,၀၀၀ ကျော် ခေတ္တခိုလှုံနေကြပြီး ဘုန်းကြီးကျောင်းတွေအတွက်လည်း လူဦးရေအဆမတန် များနေတဲ့အတွက် ရေရှည်မှာ ကြပ်တည်းလာနိုင်တယ်လို့ အလှူရှင်တချို့ဆီက သိရပါတယ်။
ကျောက်မဲမြို့နယ်ကို စစ်ကောင်စီက နေ့စဉ်နဲ့အမျှ လက်နက်ကြီးနဲ့ လေကြောင်း ပစ်ခတ်နေပြီး ၁၀၂၇ စစ်ဆင်ရေး ဒုတိယပိုင်း ၈ ရက်တာအတွင်း အရပ်သား ၃၀ ကျော် သေဆုံးခဲ့ပြီလို့ ဒေသတွင်း ကူညီဆောင်ရွက်ပေးနေသူတွေက ပြောပါတယ်။
MK-014
