မဲခေါင်၊ နိုဝင်ဘာ ၇
စစ်ကိုင်းတိုင်း အထက်ပိုင်း၊ တမူးခရိုင်ထဲမှာရှိတဲ့ ခါမ်းပါတ်မြို့ကို တော်လှန်ရေး မဟာမိတ် ပူးပေါင်းတပ်ဖွဲ့တွေ တိုက်ခိုက် သိမ်းပိုက်နိုင်ခဲ့တယ်လို့ တမူးခရိုင် တပ်ရင်း (၁) က ဒီကနေ့ ပြောပါတယ်။
“စစ်ရေး မတည်ငြိမ်သေးပါဘူး။ စစ်ကောင်စီက ခါမ်းပါတ်မြို့ထဲကို ဗုံးချမှာစိုးလို့ ဒေသခံတွေကို စစ်ရှောင်တဲ့ နေရာမှာ ကောင်းမွန်စွာ ထားထားပါတယ်။ စစ်ကောင်စီတပ်ရဲ့ ခါမ်းပါတ် စခန်းကုန်း၊ ဝတိတုတ် စခန်းကုန်း ၂ ခု သိမ်းပြီးပါပြီ” လို့ တမူးခရိုင် တပ်ရင်း (၁) ပြန်ကြားရေး တာဝန်ရှိသူက မဲခေါင်သတင်းဌာနကို ပြောပါတယ်။
တမူး PDF တပ်ရင်း (၁) နဲ့ (၂) အပါအဝင် KIA၊ ABSDF နဲ့ ချင်းကာကွယ်ရေး ပူးပေါင်းတပ်တွေ နိုဝင်ဘာ ၃ ရက်နေ့ ကစပြီး ခါမ်းပါတ်မြို့သိမ်းတိုက်ပွဲ ဆင်နွှဲခဲ့ရာ နိုဝင်ဘာ ၆ ရက် မနက်ပိုင်းမှာတော့ ဝိတုတ်ကျေးရွာ ရဲစခန်းနဲ့ ခါမ်းပါတ်မြို့ ရဲစခန်းတွေကို သိမ်းပိုက်နိုင်ခဲ့တာပါ။
ဒီနေ့မှာတော့ ခါမ်းပါတ်မြို့ကို သိမ်းပိုက်နိုင်တာကြောင့် ခါမ်းပါတ်ကနေ တဆင့် ဆက်သွားရမယ့် ပန်းသာနဲ့ တမူးမြို့တွေက စစ်ကောင်စီစခန်းတွေ အတွက် မြေပြင် ထောက်ပို့ လမ်းကြောင်းတွေ ပိတ်ဆို့သွားပြီလို့ ဒေသတွင်း သတင်းရင်းမြစ်တွေက ဆိုပါတယ်။
အဆိုပါ မြို့သိမ်း တိုက်ပွဲအတွင်း ၂ ဖက် ထိခိုက် ကျဆုံးမှုတွေ ရှိနေပြီး စစ်ရေး အခြေအနေ မတည်ငြိမ် သေးတာကြောင့် အသေးစိတ်ကိုတော့ အတည်မပြုနိုင်သေးပါဘူး။
လက်ရှိအချိန်မှာ ခါမ်းပါတ်မြို့တွင်း ရပ်ကွက် (၁) ကနေ (၄) အထိမှာ နေထိုင်တဲ့ ပြည်သူတွေကို စစ်ရှောင် ခိုင်းထားပြီး နေရပ်စွန့်ခွာရတဲ့ စစ်ရှောင် ၄,၀၀၀ ဝန်းကျင်ရှိတယ်လို့ သိရပါတယ်။
နိုဝင်ဘာ ၃ ရက်က စတင်ခဲ့တဲ့ တိုက်ပွဲတွေအတွင်း စစ်ကောင်စီက ခါမ်းပါတ်မြို့က လူနေရပ်ကွက်တွေကို လေကြောင်းက ဗုံးကြဲ တိုက်ခိုက်ခဲ့လို့ ပြည်သူတွေ အနေနဲ့ ဂျက်လေယာဉ်လာရင် အိမ်ပြင် ထွက်မကြည့်ဘဲ အိမ်အတွင်း ခိုင်ခံ့တဲ့ နေရာမှာ ပုန်းနေကြဖို့ အရပ်ဖက် အဖွဲ့အစည်းတွေက သတိပေး တိုက်တွန်းထားပါတယ်။
ခါမ်းပါတ် ဒေသတွင်း တိုက်ပွဲ ပြင်းထန်နေတာကြောင့် အနီးတဝိုက်မှာရှိတဲ့ ကျေးရွာနေ ဒေသခံတွေလည်း ဘေးလွတ်ရာ တိမ်းရှောင်နေရတယ်လို့ ဒေသတွင်း သတင်းရင်းမြစ်တွေထံက သိရပါတယ်။
ပြီးခဲ့တဲ့ နိုဝင်ဘာ ၃ ရက်နေ့ မနက်ပိုင်းက စတင်ပြီး ဟုမ္မလင်း၊ တမူး၊ ကလေး၊ ကလေးဝ၊ ကောလင်း၊ ဝန်းသို၊ ကျွန်းလှမြို့နယ်တွေနဲ့ မကွေးတိုင်း ဂန့်ဂေါမြို့နယ်က စစ်ကောင်စီတပ်စခန်းနဲ့ ရဲစခန်းတွေကို တပြိုင်နက်တည်း ဝင်ရောက် စီးနင်း သိမ်းပိုက်နေတယ်လို့ NUG အစိုးရ၊ ကာကွယ်ရေးဝန်ကြီးဌာနက ထုတ်ပြန်ထားပါတယ်။
MK–009
#MekongNews
#ခမ်းပတ်မြို့
#တော်လှန်ရေးတပ်ဖွဲ့
#စစ်ဘေးရှောင်
