မဲခေါင်၊ အောက်တိုဘာ ၁၆
မဆုတ်နစ်တဲ့ ဇွဲ၊ လုံ့လတို့နဲ့ ပြည်သူ့ တော်လှန်ရေး အောင်မြင်တဲ့ အထိ တိုက်ပွဲဝင်သွားမယ်လို့ KNDF တပ်ရင်း (၅) ရဲ့ ရဲဘော် တွေ့ဆုံပွဲမှာ တာ၀န်ရှိသူတွေက ကတိပြု ပြောဆိုခဲ့တယ်လို့ အောက်တိုဘာ ၁၅ ရက်နေ့မှာ ထုတ်ပြန် ပါတယ်။
ကရင်နီ အမျိုးသားများ ကာကွယ်ရေးတပ်-KNDF တပ်ရင်း (၅) ရဲ့ ရဲဘော် တွေ့ဆုံဆွေးနွေးပွဲကို အောက်တိုဘာလ ၁၄ ရက်နေ့က ကရင်နီပြည်နယ် တစ်နေရာမှာ ပြုလုပ်ခဲ့ရာ တော်လှန်ရေး ကာလ အတွင်း ကျဆုံးသွားတဲ့ ရဲဘော် အာဇာနည် သူရဲကောင်းတွေကို ဂုဏ်ပြုခဲ့ပါတယ်။
“မိမိတို့ တပ်ရင်း အမှတ် (၅) အနေဖြင့် ရဲဘော်များ၏ လုပ်ဆောင်ခဲ့မှုများကို အသိအမှတ်ပြုကြောင်းနှင့် စိတ်ဓာတ်မြှင့်တင်ပြီး မဆုတ်နစ်သော ဇွဲ၊ လုံ့လ တို့ဖြင့် ပြည်သူ့တော်လှန်ရေး အောင်မြင်သည် အထိ ဆက်လက် ရပ်တည် တိုက်ပွဲဝင်သွားမည် ဖြစ်ကြောင်း ပြောကြားလိုပါသည်” လို့ KNDF တပ်ရင်း (၅) ကပြောပါတယ်။
ဒါ့အပြင် ရဲဘော် အားလုံးရဲ့ စိတ်အားထက်သန်မှုနဲ့ ကြိုးစားအားထုတ်မှုကြောင့် ယနေ့ တော်လှန်ရေး ခရီးပေါက်ရောက်လာခဲ့တာလို့ ဆိုပါတယ်။
ဒါကြောင့် တော်လှန်ရေး ခရီး ကြာမြင့်လာတာနဲ့ အမျှ ကရင်နီ KNDF တပ်ရင်း အမှတ် (၅) မှ ရဲဘော်များဟာ ကျရာတာဝန် ကဏ္ဍအသီးသီးမှာ တာဝန်ကျေပွန်စွာ ထမ်းဆောင်နေသလို မြင့်မြတ်စွာ အသက်ပေးလှူသွားတဲ့ အာဇာနည် သူရဲကောင်းများ အတွက် လေးစား ဂုဏ်ယူပါတယ်လို့ KNDF တပ်ရင်း (၅) ကပြောပါတယ်။
KNDF တပ်ရင်း (၅) စတင် ဖွဲ့စည်းကတည်းက ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးနဲ့ အာဏာရှင်စနစ် ပျက်သုဉ်းရေး အတွက် ကရင်နီပြည်နယ်မှာ တိုက်ပွဲဝင်နေတာ ၂ နှစ်ကျော်ရှိပြီ ဖြစ်ပါတယ်။
CJ-002
#MeKongNews
#ကရင်နီပြည်နယ်
#KNDF
#တော်လှန်ရေး
