မဲခေါင်၊ အောက်တိုဘာ ၄
ကရင်နီပြည်နယ်မှာ စက်တင်ဘာလ အတွင်း ဖြစ်ပွားခဲ့တဲ့ တိုက်ပွဲတွေမှာ စစ်ကောင်စီ တပ်ဖွဲ့ဝင် ၇၈ ဦး သေပြီး အများအပြား ထိခိုက်ဒဏ်ရာ ရရှိခဲ့တယ်လို့ ကရင်နီ အမျိုးသားများ ကာကွယ်ရေးတပ်-KNDF က မနေ့က ထုတ်ပြန်ပါတယ်။
စက်တင်ဘာလအတွင်း KNDF အနေနဲ့ တော်လှန်ရေး ပူးပေါင်းတပ်နဲ့အတူ တိုက်ပွဲ ၂၉ ကြိမ် တိုက်ခိုက်ခဲ့ပြီး တိုက်ပွဲတွေ အတွင်း စစ်ကောင်စီရဲ့ လက်နက်ငယ် ၃၆ လက်၊ လက်နက်ကြီး ၅ လက်နဲ့ ခဲယမ်းမျိုးစုံ သိမ်းဆည်း ရခဲ့တယ်လို့ ထုတ်ပြန်ချက်မှာ ဖော်ပြပါတယ်။
တိုက်ပွဲတွေ အတွင်း စစ်ကောင်စီရဲ့ ကား ၂ စီးကို မီးရှို့ဖျက်ဆီးခဲ့ပြီး တစ်စီးကို မိုင်းဆွဲ တိုက်ခိုက်နိုင်ခဲ့သလို စစ်သုံ့ပန်း ၅ ဦးကို အရှင် ဖမ်းဆီးနိုင်ခဲ့တယ်လို့ KNDF တပ်ဖွဲ့က ပြောပါတယ်။
စက်တင်ဘာလအတွင်း ကရင်နီပြည် စစ်မျက်နှာ အသီးသီးမှာ စစ်ကောင်စီတပ်ကို ခုခံ တိုက်ခိုက်ရင်း KNDF ရဲဘော် ၈ ဦး ကျဆုံးခဲ့ပြီး ကျဆုံး အာဇာနည် ရဲဘော်များကို အမျိုးသား အာဇာနည် သူရဲကောင်းများအဖြစ် သမိုင်းမှတ်ကျောက်တင် ထားတယ်လို့ ထုတ်ပြန်ချက်မှာ ဖော်ပြပါတယ်။
ဒါ့အပြင် ဖရူဆိုမြို့နယ် အခြေစိုက် အမှတ်(၁၄) စစ်လေ့ကျင့်ရေးကျောင်းမှာ ရပ်ထားတဲ့ စစ်ကောင်စီတပ် ထောက်ပို့ယာဥ်တန်း ကား ၆၀ စီးခန့်ဟာ ကရင်နီ တော်လှန်ရေး ပူးပေါင်းတပ်ဖွဲ့များရဲ့ တန်ပြန် စစ်ဆင်မှုကြောင့် ဖရူဆိုမှ ဘောလခဲမြို့နယ်သို့ လက်ရှိအချိန်ထိ ဖြတ်သန်းနိုင်မှု မရှိသေးဘူးလို့ KNDF ကပြောဆိုပါတယ်။
လက်ရှိ စစ်ကောင်စီတပ်ဟာ မယ်စဲ့မြို့နယ်၊ ပန်တိန်းကျေးရွာရှိ BGF စခန်းနဲ့ အနီးတဝိုက်မှာ အခိုင်အမာ ခြေကုပ်ယူ တပ်စွဲထားပြီး မယ်စဲ့မြို့နယ်ကို ပြန်လည်ထိုးဖောက် သိမ်းပိုက်ဖို့ အတွက် လူသူလက်နက်ခဲယမ်း ဖြည့်တင်းနိုင်ရေး ဖရူဆို နဲ့ ဘောလခဲမြို့နယ်တို့ကို စစ်ကြောင်းထိုး နေပါတယ်။
စက်တင်ဘာလ အတွင်း စစ်ကောင်စီတပ်ဟာ ကရင်နီပြည်အတွင်း စစ်ရေးနဲ့ မသက်ဆိုင်တဲ့ နေရာ အပါအဝင် လေကြောင်း တိုက်ခိုက်မှု ၂၀ ကြိမ် ပြုလုပ်ခဲ့ပါတယ်။
အဲ့ဒီ လေကြောင်း တိုက်ခိုက်မှုတွေကြောင့် ပြည်သူ ၇ ဦး ထိခိုက်ဒဏ်ရာရရှိခဲ့ပြီး လက်နက်ကြီးနဲ့ တိုက်ခိုက်မှုကြောင့် ပြည်သူ တစ်ဦး သေဆုံးခဲ့ရပါတယ်။ ဒါအပြင် စစ်ကောင်စီတပ် ထောင်ထားတဲ့ မြေမြှုပ်မိုင်းကြောင့် ပြည်သူ တစ်ဦး သေဆုံးခဲ့တယ်လို့ KNDF ရဲ့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီရဲ့ လေကြောင်းတိုက်ခိုက်မှုနဲ့ လက်နက်ကြီး ပစ်ခတ်မှုကြောင့် နေအိမ် ၃ လုံး၊ ကျန်းမာရေး အဆောက်အအုံ တစ်လုံးနဲ့ ခရစ်ယာန် ဘုရားကျောင်း တစ်ကျောင်း ပျက်စီးခဲ့ရတယ်လို့ KNDF ရဲ့ ထုတ်ပြန်ချက်အရ သိရပါတယ်။
CJ-002
#MeKongNews
#ကရင်နီပြည်
#KNDF
#မြေမြှုပ်မိုင်း
