မဲခေါင်၊ စက်တင်ဘာ ၂၉
ရှမ်းပြည်နည်တောင်ပိုင်းက အင်းလေး ဖောင်တော်ဦီး ဘုရားပွဲသို့ လာရောက် လည်ပတ်မယ့် ဧည့်သည်တွေ အနေနဲ့ ညောင်ရွှေမြို့နယ် အတွင်းရှိ စစ်တပ် မိသားစုပိုင်နဲ့ စစ်တပ် ထောက်ခံတဲ့ ဟိုတယ်တွေမှာ တည်းခိုခြင်း မပြုဖို့ အင်းလေး အမျိုးသမီးသမဂ္ဂက မေတ္တာရပ်ခံ လိုက်ပါတယ်။
ခရီးသွား ဧည့်သည်တွေကို အဓိက အမှီပြုနေရတဲ့ ညောင်ရွှေမြို့နယ်၊ အင်းလေးဒေသမှာ စစ်တပ်ပိုင်နဲ့ စစ်တပ် ထောက်ခံတဲ့ ဟိုတယ် ၁၈ ခုရှိတယ်လို့ အင်းလေး အမျိုးသမီးသမဂ္ဂက ပြုစုထားတဲ့ စာရင်းအရ သိရပါတယ်။
“သူတို့ပိုင်တဲ့ ဟိုတယ်တွေက ဧည့်သည်တွေဆီက ရလာမယ့် ဟိုတယ်ခ၊ ဝန်ဆောင်ခတွေနဲ့ လူသတ်လက်နက်၊ ကျည်ဆန်တို့ ဝယ်ဖို့အတွက် စစ်ကောင်စီဆီကို ပြန်လည် စီးဆင်းမယ့် သွေးစွန်းငွေတွေ ဖြစ်ပါတယ်။ အဲ့တာကြောင့်မို့လို့ သွေးစွန်းငွေများ ဖြတ်တောက်ရန်အတွက် ပွဲလာခဲ့ရင် အင်းလေးဒေသရှိ စစ်တပ် မိသားစုပိုင် ဟိုတယ်တွေကို ရှောင်ရှားပြီး တခြား ဟိုတယ်တွေမှာပဲ တည်းခိုကြဖို့ မေတ္တာရပ်ခံပါတယ်” လို့ အင်းလေး အမျိုးသမီး သမဂ္ဂအဖွဲ့ဝင် အမျိုးသမီး တစ်ဦးက ပြောပါတယ်။
ဒီဟိုတယ် ၁၈ ခုထဲဟာ ခရိုနီဦးတေဇ ပိုင်ဆိုင်တဲ့ Aureum Palace ဟိုတယ် အပါအဝင် Anata Inlay ၊ Paramount Inle Resort ၊ Hotel Amazing ၊ Amazing Innlay ၊ KMA INLE Hotel ၊ Royal Nyaung Shwe ၊ Shwe Inn Tha ၊ Ann Heritage Lodge ၊ Ostello Bello ၊ Myanmar Treasure ၊ GIC – Nampan ၊ GIC – Thale U ၊ B2 Hotel ၊ Myat Minglar ၊ Royal Nadi Resort ၊ Inle Garden စတဲ့ ဟိုတယ်တွေ ဖြစ်တယ်လို့ သိရပါတယ်။
ဖောင်တော်ဦးဘုရားပွဲနဲ့ ဒေသစာရီ ကြွချီပူဇော်ပွဲတော်ကို COVID-19 ကပ်ရောဂါကြောင့် ၂၀၂၀ ခုနှစ် ကတည်းက ရပ်ဆိုင်းထား ခဲ့တာဖြစ်ပြီး အခုနှစ်မှာ ပြန်လည် ကျင်းပဖို့ စစ်ကောင်စီက အမိန့်ဖုတ် စေခိုင်းခဲ့တာလို့ ဒေသခံတွေက ဆိုပါတယ်။
“ကိုဗစ်ရောဂါတွေ ဖြစ်ကတည်းက အလုပ်ပါးသွားတာ ဆိုတော့ နိုင်ငံရေး အခြေအနေကို နားလည်ပေမယ့် စားဝတ်နေရေး အတွက် ပွဲပြန်ဖြစ်လာဖို့ မျှော်မိတာပေါ့။ CDM လည်း လုပ်ထားတော့ ကလေးတွေကို အရင်လို မဆင်နိုင်၊ မလှူမတန်းနိုင်တာလည်း ကြာပြီ။ ပွဲတွင်းကျ စျေးလေးဘာလေး ပိုရောင်းရတော့ စုမိဆောင်းမိ ရှိတယ်လေ။ အာဏာရှင်တွေ မြန်မြန်ကျပြီး ကိုယ့်အစိုးရ မြန်မြန်ပြန်တက်စေချင်ပြီ။ စစ်တပ်ပိုင်၊ ခရိုနီ သူဌေးပိုင် တွေကို အားပေးမယ့်အစား ကျမတို့လို စျေးသည်တွေကို အားပေးစေချင်တယ်” လို့ အင်းလေး ဒေသခံ CDM ဝန်ထမ်း အမျိုးသမီး တစ်ဦးက ပြောပါတယ်။
ဖောင်တော်ဦးဘုရား ဒေသစာရီ ကြွချီအပူဇော်ခံပွဲကို လာမယ့် အောက်တိုဘာ ၁၅ ရက်ကနေ နိုဝင်ဘာလ ၁ ရက် နေ့အထိ ၁၇ ရက်ကြာ ကျင်းပမှာ ဖြစ်ပြီး ပထမဆုံးနေ့မှာ ဖောင်တော်ဦးဘုရားကနေ အင်းလေးဒေသက ၂၁ ဌာနကို ကြွချီမှာဖြစ်ကာ နောက်ဆုံးနေ့မှာ ဖောင်တော်ဦး ရတနာစံကျောင်းတော်ကို ပြန်လည် ဆိုက်ရောက် မယ်လို့ ဖောင်တော်ဦးဘုရား ဂေါပကရဲ့ ထုတ်ပြန်ချက်အရ သိရပါတယ်။
CJ-001
#MeKongNews
#ဖောင်တော်ဦးဘုရားပွဲ
#အင်းလေး
#အင်းလေးအမျိုးသမီးသမဂ္ဂ
#စစ်တပ်ပိုင်
#စစ်ထောက်ခံ
#ဟိုတယ်
