မဲခေါင်၊ စက်တင်ဘာ ၁၉
ရှမ်းပြည်နယ် အရှေ့ပိုင်း၊ တာချီလိတ်မြို့၊ ဝိန်းကျောက်ရပ်ရှိ တော်ကော့ပြင် ဘုန်းကြီးကျောင်း အတွင်း ဝါတွင်းကာလ လောင်းကစားဝိုင်း မျိုးစုံနဲ့ ဆူညံ စည်ကားနေတယ်လို့ ဒေသခံတွေက ပြောပါတယ်။
အဲဒီ လောင်းကစား၀ိုင်း ပွဲခင်းကို ည ၇ နာရီမှာ စပြီး မနက် ၁ နာရီ ၀န်းကျင်မှ ပိတ်သိမ်းကာ လေးကောင်ဂျင်၊ ဂုံးကင်း၊ ဖဲနည်းပေါင်းစုံ၊ ငါးပစ်ဂိမ်းခုံ စတဲ့ လောင်းကစား ဆိုင်ခန်းပေါင်း ၆၀ ခန့်ရှိပြီး စားသောက်ဆိုင် ၅ ဆိုင်ကိုတော့ ဟန်ပြ ဖွင့်လှစ်ထားတာ တွေ့ရတယ်လို့ ဒေသခံ အမျိုးသား တစ်ဦးက ပြောပါတယ်။
“ မနေ့ည အဲကျောင်းက ပွဲခင်းထဲ လောင်းကစားလုပ်ရင်း အလျော်အစား လုပ်တာ လိမ်လို့ ဆိုပြီး ရန်ဖြစ်ကြတာ။ ရန်ဖြစ်တာ နားရွက် ပြတ်သွားတယ်။ ရပ်ကွက် ဥက္ကဌနဲ့ ဂေါပကတွေ ရောက်လာတော့ ပြီးသွားတယ်” လို့ သူကပြောပါတယ်။
လက်ရှိ ဗုဒ္ဓဘာသာဝင်တွေရဲ့ ဝါတွင်းကာလ ဘုန်းကြီးကျောင်းဝင်း အတွင်း အေးချမ်းစွာ တရားအားထုတ်မယ့် အစား အခုလို အကျည်းတန် အရုပ်ဆိုးတဲ့ လောင်းကစားဝိုင်းတွေနဲ့ ဆူညံနေကာ ဘီယာဆိုင်၊ DJ သံ၊ ခိုက်ရန်ဖြစ်ပွားတာတွေ နေ့တိုင်း ဖြစ်နေပြီး ဘယ်သူမှ အရေးယူ ဖြေရှင်းတာ မရှိဘူးလို့ ရပ်ကွက်နေ အမျိုးသမီး တစ်ဦးက ပြောပါတယ်။
“ ကျောင်းမျက်နှာစာရှေ့မှာ Disco Bar တစ်ခု ဖွင့်ထားတယ်။ အဲမှာ DJ ကို အသံ ကျယ်ကျယ် ဆူဆူညံညံ ဖွင့်ထားသေးတယ်။ ပွဲခင်းထဲက လောင်းကစားဝိုင်းတွေထဲက အော်ဟစ်သံတွေကို မကြားရအောင် ရည်ရွယ်တာလားတော့ မသိဘူး” လို့ သူက ပြောပါတယ်။
ပြီးခဲ့တဲ့ စက်တင်ဘာ ၅ ရက်နေ့က စတင်ကာ တော်ကော့ပြင် ကျောင်းဝင်း ပတ်ချာလည်မှာ လောင်းကစားပွဲတော် စတင် ကျင်းပနေရာ ယခုလကုန် အထိ ဖွင့်လှစ်မယ်လို့ သိရကြောင်း ဒေသခံတွေက ပြောပါတယ်။
CJ-008
#MekongNews
#တာချီလိတ်မြို့
#တော်ကော့ပြင်_ဘုန်းကြီးကျောင်း
#လောင်းကစား၀ိုင်း
