မဲခေါင်၊ စက်တင်ဘာ ၁၄
ရှမ်းပြည်နယ် မြောက်ပိုင်း၊ မူဆယ်မြို့နယ်၊ ၁၀၅ မိုင် ကုန်သွယ်ရေးဇုန်အနီး၊ နမ့်အွမ်ကျေးရွာ နမ့်ပေါ်တံတားမှာ တပ်စွဲထားတဲ့ စစ်ကောင်စီတပ်က ဒေသခံတွေကို စစ်ဆေးမှု တင်းကြပ်နေသလို ဒေသခံ ၄ ဦးကို ဖမ်းဆီးထားတယ်လို့ ဒေသခံတွေက ပြောပါတယ်။
ပြီးခဲ့တဲ့ စက်တင်ဘာလ ၂ ရက်နေ့ကစပြီး ခရီးသည်တင်ယာဉ်နဲ့ ကုန်တင်ကားတွေကို ငွေတောင်းခံနေပြီး ဖြတ်သန်းသွားလာတဲ့ ဒေသခံတွေကို အကြောင်းပြချက်မရှိဘဲ ခေါ်ယူ စစ်ဆေးမေးမြန်း နေတယ်လို့ ဆိုပါတယ်။
“စစ်တပ်က တစ်သောင်း တောင်းတာ မပေးရင် ခေါင်းလှည့်ပြန်လိုက်တဲ့။ ၅ ထောင် ထုတ်ပေးတာ မယူဘူး။ ပြန်လှည့်မယ်လုပ်တော့ မင်းသွားရဲရင် သွားကြည့်လေ မင်းကားဘီးကိုပစ်မှာ၊ ကားဘီးတန်ဖိုး မင်းသိလားတဲ့ အဲလိုပြောတာ” လို့ ခရီးသည်တင် ယာဥ်မောင်း တစ်ဦးက ပြောပါတယ်။
မနေ့ စက်တင်ဘာလ ၁၂ ရက်နေ့မှာတော့ နမ့်ပေါ်တံတားပေါ် ဖြတ်သန်းတဲ့ ဒေသခံ အမျိုးသား ၄ ဦးကို စစ်ကောင်စီတပ်က ဖမ်းဆီးသွားတယ်လို့ မျက်မြင်တွေ့သူတွေက ပြောပါတယ်။
“ဘာလို့ ဖမ်းခေါ်သွားလဲတော့ မသိဘူး။ စစ်သားတွေ ခေါ်သွားတာ တွေ့လိုက်တယ်။ အရင်က သူတို့အဲ့လို စစ်တာလည်း မရှိခဲ့ဘူး။ အဖမ်းအဆီးလည်း မရှိဘူး” လို့ ခရီးသည် တစ်ဦးက ပြောပါတယ်။
ဖမ်းဆီးခံရတဲ့ အမျိုးသား ၄ ဦးရဲ့ ကိုယ်ရေးအချက်အလက်တွေ အတည်မပြုနိုင်သေးဘဲ လက်ရှိအချိန်ထိ ပြန်လည် လွတ်မြောက်လာတာ မရှိသေးဘူးလို့ ဒေသခံတွေက ဆိုပါတယ်။
ယခုလ အစပိုင်းက က စစ်ကောင်စီတပ်နဲ့ တအာင်း အမျိုးသား လွတ်မြောက်ရေး တပ်မတော်-TNLA တို့ နမ့်အွမ်ကျေးရွာအနီး တိုက်ပွဲ အပြင်းအထန် ဖြစ်ပွားခဲ့ပြီးနောက် နမ့်ပေါ်တံတားမှာ စစ်ကောင်စီတပ် အင်အား ၁၀၀ ကျော် ဖြည့်တင်းထားတာ ဖြစ်ပါတယ်။
စက်တင်ဘာ ၆ ရက်နေ့မှာလည်း နမ့်ပေါ်တံတားနဲ့ ၆ မိုင်ခန့်သာ ကွာဝေးတဲ့ တာလုံကျေးရွာ အနီးမှာ TNLA နဲ့ စစ်ကောင်စီ ခလရ (၂၄၁) တပ် တိုက်ပွဲ ပြင်းထန်ခဲ့တယ်လို့ TNLA က ထုတ်ပြန်ထားပါတယ်။
ပြီးခဲ့တဲ့ ဩဂုတ်လ ၂ ရက်နေ့က စစ်ကောင်စီတပ်၊ နမ့်ခမ်းမြို့မ ပြည်သူ့စစ် ပူးပေါင်းတပ်နဲ့ TNLA တိုက်ပွဲ ပြင်းထန်ပြီးနောက် မူဆယ်-နမ့်ခမ်း ကားလမ်းမပေါ် စခန်းချထားတဲ့ စစ်ကောင်စီတပ်က လမ်းမကြီးပေါ် ဖြတ်သန်းသွားလာတဲ့ တအာင်း(ပလောင်) လူမျိုးတွေကို အဓိကထား စစ်ဆေးခဲ့ပါတယ်။
အဲဒီလို စစ်ဆေးပြီး စယ်လန့်ကျေးရွာအုပ်စု၊ မန်ကန်ရွာနဲ့ မိုင်းဆတ်ရွာနေ အမျိုးသား ၄ ဦးကို ဖမ်းဆီးသွားရာ ၃ ဦး ပြန်လွတ်ခဲ့ပေမဲ့ တစ်ဦးကိုတော့ စစ်တပ်က ရိုက်နှက် သတ်ဖြတ်ပြီး အလောင်းကို ပြန်မပေးဘူးလို့ ဒေဿခံတွေက ပြောပါတယ်။
CJ – 014
#MeKongNews
#မူဆယ်
#TNLA
#နမ့်ပေါ်တံတား
