မဲခေါင်၊ စက်တင်ဘာ ၁၃
မွန်ပြည်နယ်၊ ရေးမြို့နယ်ကို တော်လှန်ရေးတပ်ဖွဲ့များဘက်က စိုးမိုးနိုင်မယ့် အနေအထား ရောက်နေပြီလို့ ရေးဘီလူး တော်လှန်ရေးတပ်ဖွဲ့ တာ၀န်ရှိသူက ပြောပါတယ်။
ပြီးခဲ့တဲ့ စက်တင်ဘာ ၇ ရက်က ရေးမြို့နယ်အတွင်း ကျေးလက်ဖွံ့ဖြိုးရေး ကွင်းဆင်း ဆောင်ရွက်ခဲ့ပြီး တိုင်းရင်းသား လက်နက်ကိုင်များနဲ့ PDF ပူးပေါင်းကာ နယ်မြေစိုးမိုးထားတဲ့အပြင် မြို့ပြကို စိုးမိုးနိုင်စွမ်း ရှိနေပြီလို့ သူကဆိုပါတယ်။
“မွန်ပြည်နယ်ထဲမှာ ရေးမြို့နယ်ကို စစ်ကောင်စီဘက်က တအားတင်းကြပ်နေတဲ့ အခြေအနေရှိတယ်။ ဒါကို တိုင်းရင်းသား လက်နက်ကိုင်တွေ၊ PDF တွေနဲ့ ပူးပေါင်းပြီးတော့ နယ်မြေစိုးမိုးမှုတွေလည်း ရသလောက် ရထားတယ်။ နယ်မြေစိုးမိုးမှုတွေတင် မကဘူး မြို့ပြ စစ်ဆင်ရေးတွေကိုလည်း PDF တွေဘက်က ထိထိရောက်ရောက် လုပ်ဆောင်နိုင်စွမ်းရှိတယ်” လို့ ရေးဘီလူးတပ်ဖွဲ့ တာဝန်ခံက ဆက်ပြောပါတယ်။
ဒါ့အပြင် ရေးမြို့နယ်အတွင်း စစ်ကောင်စီကို ထိုးစစ်ဆင်နွှဲခဲ့တဲ့ ဒေါနစစ်ကြောင်းဟာ ကျေးရွာ ၆ ရွာက ပြည်သူ ၁၂၃ ဦးကို ကျန်းမာရေး စောင့်ရှောက် ကုသပေးခဲ့လို့ ဒေသခံ ပြည်သူတွေ ပျော်ရွှင်နေတယ်လို့ ဆိုပါတယ်။
“ကျွန်တော်တို့ စစ်ကြောင်း အနေနဲ့ နယ်မြေခံ မွန်တော်လှန်ရေး အဖွဲ့တွေနဲ့ ပူးပေါင်း စစ်ရေး ဖော်ဆောင်မှုတွေ လုပ်နေတဲ့အတွက် နယ်မြေခံတွေကတော့ ကျနော်တို့ကို အားပေးထောက်ခံမှု များတယ်” လို့ ဒေါနစစ်ကြောင်း တာဝန်ခံက ပြောပါတယ်။
စစ်ကောင်စီ အနေနဲ့ ရေးမြို့နယ် အဝင်အထွက်ကို တင်းကြပ်စွာ စစ်ဆေးနေပေမယ့် စစ်မြေပြင်မှာ တော်လှန်ရေး တပ်ဖွဲ့တွေကို လုံးဝ မယှဉ်နိုင်ဘူးလို့ ရေးဘီလူးတပ်ဖွဲ့ ခေါင်းဆောင်က ပြောပါတယ်။
“PDF တွေက လခစားတွေ မဟုတ်ဘူးဗျ။ စစ်ခွေးတွေကတော့ လခစားပေါ့။ ဒီကောင်တွေက လခစားပြီး တိုက်နေရတဲ့ အခါကျတော့ ငွေတစ်ခုနဲ့ တိုက်နေရတဲ့ အခြေအနေပေါ်မှာ မူတည်ပြီးတော့ သတ္တိရှိလား ဆိုတော့ မရှိကြဘူး။ အထက်က ညွှန်ကြားချက်အရ ဒီကောင်တွေ အလုပ်လုပ်နေရတာ ဖြစ်တဲ့အတွက်ကြောင့်မို့လို့ ကျွန်တော်တို့တွေရဲ့ စိတ်ဓာတ်တွေနဲ့တော့ လာယှဉ်လို့ မရဘူး။ PDF တွေရဲ့ စိတ်ဓာတ်တွေကတော့ ခိုင်မာတယ်။ ပြတ်သားတယ်။ ဗူးဆိုရင် ဖရုံ မသီးဘူးဗျ။ တစ်သွေးတစ်သံ တစ်မိန့်ပဲ” လို့ သူက ပြောဆိုပါတယ်။
ပြီးခဲ့တဲ့ စက်တင်ဘာ ၂ ရက်နေ့ကလည်း ရေးမြို့နယ် အခြေစိုက် စစ်ကောင်စီ ခလရ (၆၁) တပ်ကို ဒေါန စစ်ကြောင်းက တိုက်ခိုက်ခဲ့ရာ ဗိုလ်ကြီး တစ်ဦး အပါအ၀င် စစ်သား ၃ ဦးထက်မနည်း သေဆုံးပြီး ၃၀ ကျော် ဒဏ်ရာရခဲ့တယ်လို့ ဒေါနစစ်ကြောင်းက ထုတ်ပြန်ထားပါတယ်။
CJ–005
#MekongNews
#မွန်ပြည်နယ်
#ဒေါနစစ်ကြောင်း
#ရေးဘီးလူး
#နယ်မြေစိုးမိုးမှု
#စစ်ဆင်ရေး
