မဲခေါင်၊ စက်တင်ဘာ ၉

၂၀၂၁ ဖေဖော်ဝါရီမှာ စစ်တပ်က အာဏာသိမ်းပြီးနောက် နိုင်ငံတစ်ဝန်း ဘာသာရေးအဆောက်အအုံပေါင်း ၂၀၀ နီးပါးကို ဖျက်ဆီးခဲ့တယ်လို့ Radio Free Asia (RFA) သတင်းဌာနက သူတို့ကောက်ယူထားတဲ့ စာရင်းတွေကို ထုတ်ပြန်ရေးသားပါတယ်။

ဒီစာရင်းကို ဘာသာရေးခေါင်းဆောင်တွေ၊ လူ့အခွင့်အရေးအဖွဲ့အစည်းတွေ၊ ဒေသခံ ပြည်သူလူထုတွေရဲ့ သတင်းပေးချက်နဲ့ ထုတ်ပြန်ချက်တွေကို စာရင်းကောက်ပြီး ထုတ်ပြန်ရေးသားခဲ့တာဖြစ်ပါတယ်။

ဖျက်ဆီးခံခဲ့ရတဲ့ ဘာသာရေးအဆောက်အအုံ တစ်ဝက်နီးပါးဟာ လက်နက်ကိုင်တော်လှန်သူတွေ ပိုမိုအားကောင်းတဲ့ ချင်းပြည်နယ်အတွင်းမှာဖြစ်ပြီး ချင်းခရစ်ယာန်ဘုရားကျောင်းပေါင်း ၈၅ လုံးအထိ ပျက်စီးခဲ့ရတယ်လို့ ဖော်ပြသွားပါတယ်။

အာဏာသိမ်းစစ်ကောင်စီဟာ ဗုဒ္ဓဘာသာ ဘုန်းကြီးကျောင်းတွေ၊ ခရစ်ယာန်ဘုရားကျောင်းတွေ၊ ဗလီတွေအားလုံးကို အလွတ်မပေးဘဲ ဗုံးကြဲ၊ မီးရှို့ဖျက်ဆီးမှုတွေ လုပ်ခဲ့ရာမှာ ချင်းပြည်နယ်ပြီးရင် မြန်မာနိုင်ငံအနောက်မြောက်ပိုင်း စစ်ကိုင်းဒေသမှာ ဒုတိယအများဆုံးပျက်စီးပြီး ဘာသာရေးအဆောက်အအုံ ၅၀ ဖျက်စီးခံခဲ့ရပါတယ်။

ဒီဒေသမှာ တော့အများစုဟာ ဗုဒ္ဓဘာသာ ဘုန်းတော်ကြီးကျောင်းတွေဖြစ်ပြီး ရှမ်းနဲ့ ကယားမှာ ၃၉ နေရာ၊ မကွေးမှာ ၁၉ နေရာ၊ ကရင်၊ မွန်နဲ့ ပဲခူးအရှေ့ပိုင်းဒေသတွေမှာ ၅ နေရာ ပျက်စီးခဲ့ရပါတယ်။

ဒီစာရင်းမှာ စုစုပေါင် ဘာသာရေး အဆောက်အအုံ ဖျက်စီးခံရမှု ၁၉၈ ခု ရှိပြီး ဩဂုတ်တစ်လတည်းမှာပဲ ချင်းပြည်နယ်မှာ လက်နက်ကြီးတွေနဲ့ပစ်ခတ်လို့ ဘာသာရေးအဆောက်အအုံ ၇ ခုထိ ပျက်စီးခဲ့ရတယ်လို့ ဖော်ပြပါရှိပါတယ်။

ချင်း နှစ်ခြင်းအသင်းတော် အထွေထွေအတွင်းရေးမှူး ဘုန်းတော်ကြီး လွန်းမောင့်က စစ်ဖြစ်နေချိန် ဘေးကင်းဖို့ လူတွေအားလုံးဟာ ဘုရားကျောင်းတွေမှာ ဝတ်ပြုဆုတောင်းပြီး ခိုအောင်းနေတာကို သိလို့ ရည်ရွယ်ပြီး လေယာဉ်နဲ့ ဗုံးကြဲ၊ လက်နက်ကြီးနဲ့ပစ်၊ မီးတင်ရှို့မှုတွေကို စစ်ကောင်စီတပ်တွေက လုပ်ဆောင်ခဲ့ကြတာဟာ စစ်ရာဇဝတ်မှုကျူးလွန်တာဖြစ်ကြောင်း၊ ရင်တွေကွဲကြေရကြောင်း၊ ဘယ်တုန်းကမှ မဖြစ်သင့်သလို ဘယ်တော့မှလဲ ထပ်မဖြစ်သင့်ကြောင်း၊ ကျူးလွန်ခိုင်းတဲ့ ခေါင်းဆောင်တွေရဲ့ ဒုစရိုက်အပေါ် ခွင့်လွှတ်မှုတွေဆိုတာ မရှိနိုင်ကြောင်း ပြောကြားသွားပါတယ်။

စစ်ကောင်စီဟာ ဘာသာခြားအဆောက်အအုံတွေကိုပဲ ပစ်မှတ်ထားတာမဟုတ်ဘဲ စစ်ကိုင်းမှာ ဗုဒ္ဓဘာသာ ဘုန်းကြီးကျောင်း ၄၀ ၊ ခရစ်ယာန်ဘုရားကျောင်း ၆ ကျောင်းနဲ့ ပလီ ၃ ခုကို ဖျက်ဆီးခဲ့ပါသေးတယ်။

NUG အစိုးရ လူ့အခွင့်အရေးဝန်ကြီးဌာနကလည်း ဒီလို ဘာသာရေးအဆောက်အအုံတွေကို ပစ်မှတ်ထားတိုက်ခိုက်မှုတွေကို မှတ်တမ်းဆက်လက်တင်ထားပြီး တစ်နေ့မှာ ဒီပြစ်မှုအတွက် စစ်ခေါင်းဆောင်တွေ အကြမ်းဖက်လုပ်ဆောင်မှု ရာဇဝတ်ဘေး ပြေးလွတ်မှာမဟုတ်ဘူးလို့ ဒုဝန်ကြီး Ngai Tam Maung က ပြောဆိုပါတယ်။

Ref: rfa
MKF-001

#MeKongNews

#စစ်ကောင်စီ

#ဘာသာရေး

#ဖျက်ဆီး

#အဆောက်အအုံး

#ချင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)