မဲခေါင်၊ ဩဂုတ် ၃၁
ကရင်နီပြည်နယ်မှာ စစ်ရေးပစ်မှတ်နဲ့ မသက်ဆိုင်တဲ့ နေရာတွေကို စစ်ကောင်စီက ဒီကနေ့ တိုက်လေယာဉ်တွေ၊ လက်နက်ကြီးတွေနဲ့ ပစ်ခတ်တိုက်ခိုက်တာကြောင့် မသန်စွမ်း အမျိုးသမီး အပါအ၀င် ပြည်သူ ၃ ဦးထက်မနည်း သေဆုံးခဲ့တယ်လို့ သိရပါတယ်။
စစ်ကောင်စီဟာ ဒီကနေ့ မနက်မှာ ဒီးမော့ဆိုမြို့နယ်အတွင်းရှိ စစ်ရေးပစ်မှတ်နဲ့ မသက်ဆိုင်တဲ့ နေရာ ၂ ခုကို တိုက်လေယာဉ်တွေနဲ့ အကြိမ်ကြိမ် ဗုံးကြဲ တိုက်ခိုက်ခဲ့တာကြောင့် စစ်ရှောင်ပြည်သူ တစ်ဦး သေဆုံးပြီး ၂ ဦး ဒဏ်ရာ ရရှိခဲ့ပါတယ်။
အဲ့ဒီ တိုက်ခိုက်မှုအတွင်း ပြည်သူလူထုရဲ့ နေအိမ် အဆောက်အအုံနဲ့ စာသင်ကျောင်း ပျက်စီးခဲ့ရတယ်လို့ ကရင်နီ အမျိုးသား ကာကွယ်ရေးတပ်-KNDF က ဒီကနေ့ ထုတ်ပြန်ပါတယ်။
ဒီကနေ့ စစ်ကောင်စီက ကြဲချတဲ့ ဗုံးအမျိုးအစားဟာ ထပ်ဆင့်ကွဲ ဗုံးတွေဖြစ်တာကို တွေ့ရှိရတယ်လို့ ကရင်နီ လူ့အခွင့်အရေးအဖွဲ့က ထုတ်ပြန်ပါတယ်။
ဒါ့အပြင် ဒီကနေ့မနက် ၁၀ နာရီအချိန့်ခန့်မှာ မိုးဗြဲမြို့မှာရှိတဲ့ စစ်ကောင်စီရဲ့ ခမရ (၄၂၂) တပ်က တိုက်ပွဲ ဖြစ်ပွားခြင်း မရှိဘဲ လွိုင်ကော်မြို့နယ်ကို လက်နက်ကြီးတွေရဲ့ ပစ်ခတ်တာကြောင့် ဒေသခံ ၂ ဦး သေဆုံးပြီး တစ်ဦး ထိခိုက်ဒဏ်ရာ ရရှိခဲ့တယ်လို့လည်း သတင်းရင်းမြစ်တွေ ကပြောပါတယ်။
“မသန်စွမ်း အမျိုးသမီးက ပွဲချင်းပြီး ဆုံးသွားတယ်။ သူက မသန်စွမ်း ဖြစ်တဲ့အခါကျတော့ ရှောင်ဖို့ ပြေးပုန်းဖို့ ကလည်း မလွယ်ဘူးလေ။ ကျန်တဲ့ တစ်ယောက်ကတော့ ဆေးရုံပို့တဲ့ လမ်းပေါ်မှာပဲ ဆုံးသွားတယ်” လို့ သတင်းရင်းမြစ်က ပြောပါတယ်။
စစ်ကောင်စီ ပစ်ခတ်လိုက်တဲ့ လက်နက်ကြီးကျည် ၄ လုံးဟာ လွိုင်ကော်မြို့နယ်၊ နိုးကိုးကျေးရွာအုပ်စုထဲက ကျေးရွာ တစ်ရွာထဲ ကျရောက်ခဲ့ပြီး မသန်စွမ်း အမျိုးသမီးနဲ့ အသက် ၄၇ နှစ်အရွယ် အမျိုးသား ပွဲချင်းပြီး သေဆုံးသွားတာ ဖြစ်ပါတယ်။
စစ်ကောင်စီဟာ မြေပြင်တိုက်ပွဲမှာ အကျအဆုံးများနေလို့ လူထုကို ရန်သူလို့ သတ်မှတ်ပြီး ဗုံးကြဲ တိုက်ခိုက်တာ၊ နေအိမ် မီးရှို့တာတွေ လုပ်နေတာကြောင့် စစ်ဘေးရှောင် ပြည်သူများ အနေနဲ့ လေယာဉ်သံ ကြားပါက အကာအကွယ် ယူထားဖို့ အရေးကြီးတယ်လို့ စစ်ဘေးရှောင် ပြည်သူတွေကို ကူညီနေသူ တစ်ဦးက ပြောပါတယ်။
စစ်အာဏာသိမ်းချိန်ကစပြီး ကရင်နီပြည်နယ်ကို စစ်တပ်က လေကြောင်းကနေ ၅၇၂ ကြိမ်ထက်မနည်း ဗုံးကြဲခဲ့တယ်လို့ တိုးတက်သော ကရင်နီပြည်သူ့အင်အားစု-PKPF က အခုနှစ် ဩဂုတ်လ ၁ ရက်မှာ ထုတ်ပြန်ထားပါတယ်။
CJ-002
#MeKongNews
#ဒီးမော့ဆိုမြို့နယ်
#ဗုံးကြဲ
#စစ်ဘေးရှောင်
