မဲခေါင်၊ စက်တင်ဘာ ၁

ငွေကြေးဈေးကွက်အတွင်း အသစ်ရိုက်နှိပ်တဲ့ နှစ်သောင်းတန်ငွေစက္ကူတွေ ဖြန့်ဝေဝင်ရောက်လာပြီဆိုတဲ့ သတင်းတွေကြောင့် ရွှေဈေး ၃၈ သိန်းကျော်နဲ့ ဒေါ်လာဈေးမှာလည်း အဖမ်းအဆီးတွေကြောင့် ဈေးကွက်မဖွင့်နိုင်တဲ့ အနေအထားလို့ မြေပြင်အခြေအနေအရ သိရပါတယ်။

စစ်ကောင်စီက အသစ်ရိုက်နှိပ်ထုတ်ဝေတဲ့ နှစ်သောင်းတန်ငွေစက္ကူသစ်ကို သူရဲ့ဝန်ထမ်းလစာတွေထဲ ထည့်သွင်းပေးအပ်မှာဖြစ်တဲ့အတွက် ငွေကြေးဈေးကွက်အတွင်း ပြန့်နှံ့ရောက်ရှိသွားမှာပါ။

ငွေစက္ကူသစ် ရိုက်နှိပ်မထုတ်ဝေမီကလည်း ရွှေနဲ့ဒေါ်လာလုပ်ငန်း လုပ်ကိုင်သူတွေကို စစ်ကောင်စီဘက် အသွင်ယူစုံစမ်းပြီး ဖမ်းဆီးတာတွေကြောင့် အရောင်းအဝယ်ခက်တဲ့ အနေအထားကနေ ငွေစက္ကူသစ်ကြောင့် ပိုမိုဆိုးရွားလာတယ်လို့ လုပ်ငန်းရှင်တွေက ပြောပါတယ်။

“နှစ်သောင်းတန်က ဒီနေ့မှစဝင်လာမယ်ဆိုတော့ စောင့်ကြည့်ရမယ်၊ အကန့်အသတ်နဲ့မဟုတ်ဘဲ အလုံအရင်းနဲ့ဆို ဈေးကွက်ထိန်းချုပ်ဖို့မလွယ်ဘူး၊ အခုဝန်ထမ်းလစာမှာ ပါလာပြီလို့အတည်ပြုနိုင်ပြီ၊ အခုက အဖမ်းဆီးကတော်တော်ကြမ်းနေတော့ အရောင်းအဝယ်က လုံးဝအေးဆက်နေတယ်။ ဒေါ်လာသမားတွေဆို ဈေးတောင်မေးမရဘူး၊ ဈေးကွက်ကပျက်သွားပြီ” လို့ ရွှေလုပ်ငန်းရှင်တွေနဲ့ နီးစပ်သူတစ်ဦးက ပြောပါတယ်။

ဈေးနှုန်းတစ်ခုကို ထိန်းချုပ်ဖို့ လုပ်ငန်းရှင်တွေကို ဖမ်းဆီးထားတာဟာ ဖြေရှင်းနည်းအစစ်အမှန် မဟုတ်ဘူးလို့ သူက ဆက်ပြောပါတယ်။

စစ်တပ်အာဏာသိမ်းပြီး ပြည်သူကို အကြမ်းဖက်သတ်ဖြတ်တဲ့ လုပ်ရပ်တွေကြောင့် နိုင်ငံတကာ ပိတ်ဆို့အရေးယူတာတွေ၊ နိုင်ငံခြားရင်းနှီးမြုပ်နှံမှု ထွက်သွားတာတွေ၊ ပို့ကုန်သွင်းကုန် တင်းကျပ်တဲ့ မူဝါဒတွေကြောင့် စစ်ကောင်စီဟာ ဒေါ်လာရရှိမှု ရှားပါးလာပါတယ်။

အဲ့ဒါကြောင့် ပြည်တွင်းဒေါ်လာ ရပေါက်ရလမ်းရှိတဲ့ လုပ်ငန်းတွေကို စစ်ကောင်စီဟာ တင်းကျပ်ဖိအားပေးပြီး ဒေါ်လာကို ထိန်းချုပ်ထားတဲ့ သဘောလို့ စီးပွားရေးလုပ်ငန်းရှင်တွေက ပြောကြပါတယ်။

နောက်ဆက်တွဲအနေနဲ့ ပြည်တွင်းကုန်ဈေးနှုန်းတွေ မြင့်တက်လာပြီးနောက် ရေတိုဖြေရှင်းနည်းအဖြစ် စစ်ကောင်စီက နှစ်သောင်းတန်တွေ ရိုက်ထုတ်လာတာပါ။ ငွေစက္ကူသစ်ကြောင့် မြန်မာငွေကြေးဟာ တန်ဖိုးကျလာပြီး ငွေကြေးဖောင်းပွမှု မြင့်တက်လာမယ်လို့ စီးပွားရေးပညာရှင်တွေက ပြောထားပါတယ်။

စစ်ကောင်စီက အသစ်ရိုက်နှိပ်ထုတ်ဝေတဲ့ နှစ်သောင်းတန်ငွေစက္ကူသစ်ဟာ တရားမဝင်ဘူးလို့ အမျိုးသားညီညွတ်ရေးအစိုးရ (NUG) ထုတ်ပြန်ထားပါတယ်။ ဒီလိုအခြေအနေတွေကြောင့် စီးပွားရေးလုပ်ငန်းရှင်တွေဟာ ဘေးကြပ်နံကြပ်အနေအထားနဲ့ နီးရာဓားကြောက်နေရတယ်လို့ ဆိုကြပါတယ်။

MK-006

#MeKongNews

#နှစ်သောင်းတန်

#ဒေါ်လာ

#ငွေကြေး

#လည်ပတ်

#စစ်ကောင်စီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)