မဲခေါင်၊ ဩဂုတ် ၂၅
စစ်ကောင်စီတပ်နဲ့ ရှမ်းပြည်တိုးတက်ရေးပါတီ SSPP တို့ စစ်ရေးတင်းမာနေတဲ့ ရှမ်းတောင်၊ လဲချားနဲ့ ခိုလမ် ဒေသမှာ စစ်ကောင်စီက စစ်လေယာဉ်တွေ အသုံးပြုပြီး စစ်လက်နက်တွေကို လေထီးနဲ့ ချသွားတယ်လို့ မဲခေါင်သတင်းဌာနက စုံစမ်းသိရှိရပါတယ်။
ဒီကနေ့ ညနေ ၅ နာရီ ၄၅ မိနစ်ခန့်မှာ စစ်သုံးလေယာဉ် တစ်စီးနဲ့ ဂျက်တိုက်လေယာဉ် တစ်စီး အသုံးပြုပြီး စစ်လက်နက် အသုံးအဆောင် ပစ္စည်းတွေကို လေထီးတွေနဲ့ ချပေးနေတာ ဖြစ်တယ်လို့ စုံစမ်း သိရှိရပါတယ်။
ဒီကနေ့မှာ လေယာဉ်တွေနဲ့ လဲချားမြို့နယ် အရှေ့မြောက်ဘက်နဲ့ ခိုလမ်မြို့ရဲ့ မြောက်ဘက် ဝမ်စိမ်းဘက်မှာ စစ်ပစ္စည်းတွေ လာချပေးတာ ဖြစ်တယ်လို့ ဒေသတွင်း သတင်းရင်းမြစ်တွေက ပြောပါတယ်။
“အင်အားတော့ မဟုတ်ဘူး။ လက်နက်တွေလိုမျိုး။ လမ်းကြောင်း မသွားရဲလို့ လေယာဉ်နဲ့ လာသွားတာလည်း ဖြစ်နိုင်တယ်။ နမ့်စန် ခိုလမ်တပ်တောင် ခံစစ်ပုံစံ ပြင်ထားတယ်။ လေယာဉ်က ၂ စီး တစ်စီးက ဂျက်ဖိုက်တာ၊ တစ်စီးက ထောက်ပို့လေယာဉ် အကြီးစား၊ လေယာဉ်က ပစ္စည်းချခဲ့တာ အများကြီးပဲ။ လူမပါဘူး။ စစ်ပစ္စည်းတွေ အကြီးကြီးတွေဖြစ်တယ်” လို့ မျက်မြင်တွေ့ခဲ့တဲ့ သတင်းရင်းမြစ် တစ်ဦးက ပြောပါတယ်။
စစ်ကောင်စီဟာ ကုန်းလမ်းကနေ မသယ်ရဲတော့လို့ အခုလို လေထီးနဲ့ ပစ္စည်းတွေချပေးနေတာ ဖြစ်နိုင်တယ်လို့ ဒေသခံတွေက ပြောပါတယ်။
“ချပေးတာ ခိုလမ် ဝမ်းစိမ်း ဘက်မှာလည်း တွေ့ရတယ်ပေါ့နော်။ အဝေးကနေ တွေ့ရတာဆိုတော့ ဘယ်နေရာလဲ ဆိုတာတော့ အတိအကျ ပြောရခက်တယ်။ လေယာဉ် အကြီးစားတွေနဲ့ ချပေးတာကို အဝေးကနေ လှမ်းမြင်ရတာပါ” လို့ မဲခေါင်သတင်းဌာနရဲ့ နောက်ထပ် သတင်းရင်းမြစ် တစ်ဦးက ပြောပါတယ်။
လဲချားမြို့နယ်မှာ တိုက်ပွဲဖြစ်ပွားပြီးနောက် အခြေအနေ တည်ငြိမ်နေတဲ့အချိန်မှာ စစ်ကောင်စီက SSPP တပ်တွေကို အလစ်အငိုက် ဝင်တိုက်ဖို့ စီစဉ်နေတာ ဖြစ်နိုင်တယ်လို့ သတင်းရင်းမြစ် တစ်ဦးက သုံးသပ်ပါတယ်။
အခုဖြစ်စဉ်နဲ့ ပတ်သက်ပြီး အခြေအနေတွေကို ထပ်မံသိရဖို့ SSPP ပြောရေးဆိုခွင့်ရှိသူတွေကို ဆက်သွယ်ပေမယ့် အဆက်အသွယ် မရရှိသေးပါဘူး။
ပြီးခဲ့တဲ့ ဩဂုတ်လ ၆ ရက်နေ့မှာ လဲချားမြို့နယ်အတွင်း ၃ နေရာထက်မနည်း စစ်ကောင်စီနဲ့ SSPP တို့ တိုက်ပွဲ ဖြစ်ပွားခဲ့ကာ လက်ရှိအချိန်ထိ စစ်ရေးတင်းမာနေပြီး စစ်ကောင်စီက လဲချား – မိုင်းနောင်လမ်းကို ပိတ်ပင်ထားဆဲ ဖြစ်ပါတယ်။
လက်ရှိ စစ်ကောင်စီဟာ ပြည်သူ့စစ်တွေနဲ့ အင်အားဖြည့်တင်းပြီး လဲချားမြို့အဝင် မက်လန်းကျေးရွာထဲမှာ တပ်စွဲကာ ကားလမ်းမကြီးကို သွားလာခွင့်မပေးဘဲ ပိတ်ပင်ထားပါတယ်။
CJ-002
#MeKongNews
#လဲချား-ခိုလမ်
#စစ်လေယာဥ်
#SSPP
