မဲခေါင်၊ ဩဂုတ် ၂၂

ရှမ်းပြည်နယ် တောင်ပိုင်း၊ ဟိုပုံးမြို့နယ် မြောက်ပိုင်းမှာ စစ်ကောင်စီ လက်အောက်ခံ PNO ပြည်သူ့စစ်က ဒေသခံ ၂၀ နီးပါးကို ပြန်ပေးဆွဲပြီး တစ်ဦးကို သိန်း ၂၀ ကျပ်နဲ့ ပြန်ရွေးခိုင်းခဲ့တယ်လို့ စုံစမ်းသိရှိရပါတယ်။

အဲ့ဒီ ဒေသခံတွေဟာ ဩဂုတ်လ ၉ ရက်နေ့မှ စပြီး မူးယစ်ဆေးဝါး အကြောင်းပြချက်နဲ့ ပြန်ပေးဆွဲ ခံရတာဖြစ်ပြီးတော့ ဩဂုတ်လ ၁၈ ရက်နေ့မှာ မိသားစုဝင်တွေက ငွေနဲ့ပြန်လိုက်ရွေးလို့ အကုန်လုံး ပြန်လွတ်လာတယ်လို့ ဒေသခံတွေက ပြောပါတယ်။

“၁၈ ရက်နေ့မှာ နောက်ဆုံးကျန်တဲ့ ၆ ယောက် လွတ်လာတာပေါ့၊ အရင်ရက်တွေက လွတ်လာတဲ့ လူတွေလည်း ရှိတယ်။ ပိုက်ဆံပေးတာနဲ့ လွတ်လာတာပေါ့။ ပိုက်ဆံ အရင်ပေးနိုင်တဲ့ လူတွေက အရင်လွတ်လာတယ်။ ပိုက်ဆံ မပေးနိုင်တဲ့ လူက PNO ပြည်သူ့စစ်မှာ စစ်သား လုပ်ရမယ် ဆိုတော့ အဖမ်းခံရတဲ့ သူတွေရဲ့ မိသားစုတွေက မရှိရှိတာ ချေးငှား ရောင်းချပြီး ပြန်နှုတ်ရတယ်။ ခြံရောင်းပြီး ပြန်နှုတ်ရတဲ့ လူလည်းရှိတယ်” လို့ ဒေသခံ တစ်ဦးက ပြောပါတယ်။

အဲ့ဒီလို ဒေသခံတွေကို ပြန်ပေးဆွဲ ငွေတောင်းတာဟာ စစ်ကောင်စီ လက်အောက်ခံ PNO ပြည်သူ့စစ်တပ်ဖွဲ့ရဲ့ တပ်ခွဲ (၉) မှ ဗိုလ်လေးအောင် အဖွဲ့ဖြစ်ပြီး ဗိုလ်လေးအောင် ဟာ ဟိုပုံးမြို့နယ်၊ နမ့်ပါချီကျေးရွာအုပ်စု၊ လွယ်ခေါ်ရွာမှာ နေထိုင်သူ ဖြစ်ပါတယ်။

PNO ပြည်သူ့စစ်ဟာ ဩဂုတ်လ ၉ ရက်နေ့မှာ နောင်ဒေကျေးရွာအုပ်စုမှ ဒေသခံ လူငယ် ၂ ဦးကို စစ်ဆေးရာမှ လွယ်အိပ်ထဲမှာ မီးခြစ်တွေ့လို့ မူးယစ်ဆေးဝါး သုံးစွဲသူလို့ စွပ်စွဲပြီး စတင်ဖမ်းဆီး ပြန်ပေးဆွဲခဲ့တာ ဖြစ်ပါတယ်။

အံဒီနောက် နောင်းဒေးကျေးရွာအုပ်နဲ့ မောက်မွန်ကျေးရွာအုပ်စုရှိ နောင်ဒေးကျေးရွာ၊ မောက်လွစ်မြောက်ရွာ၊ ပုံးကျေးရွာ၊ ဟွေးဟဲင်းကျေးရွာ စတဲ့ ကျေးရွာတွေနေ ဒေသခံ ၂၀ နီးပါးကို ဩဂုတ်လ ၉ ရက်မှစပြီး PNO ပြည်သူ့စစ်က ပြန်ပေးဆွဲ ဖမ်းဆီးသွားတာ ဖြစ်ပါတယ်။

အခုလို PNO ပြည်သူ့စစ် လုပ်ဆောင်နေတာဟာ မူးယစ်ဆေးဝါး တိုက်ဖျက်တာ မဟုတ်ဘဲ လုပ်စားဖို့အတွက် အနိုင်ကျင့် နှိပ်စက်တာ ဖြစ်တယ်လို့ ဒေသခံတွေက ပြောပါတယ်။

“သူတို့ဖမ်းသွားတဲ့ လူတွေက မူးယစ်ဆေးဝါး လက်ဝယ်တွေ့တာလည်း မဟုတ်ဘူး။ သူတို့ အထင် သံသယနဲ့ ဖမ်းတာ။ ဖမ်းပြီးရင်လည်း အကျင့်စာရိတ္တ ပြုပြင်ပေးတာ မဟုတ်ဘူး။ ငွေပဲ တောင်းစားတာ။ ငွေရတာနဲ့ ပြန်လွှတ်ပေးတာက မဟုတ်သေးဘူးလေနော်။ သံသယနဲ့ပဲ အဲ့လို လျှောက်ဖမ်းတော့ တစ်ချို့ ဘာအပြစ်မှ မရှိတဲ့ လူကောင်းတွေလည်း အဖမ်းခံရပြီး ငွေတွေကုန်ရတယ်” လို့ နောက်ထပ် ဒေသခံ တစ်ဦးက ပြောပါတယ်။

လက်ရှိ PNO ပြည်သူ့စစ်ရဲ့ လုပ်ရပ်တွေဟာ ဒေသနဲ့ လူမျိုးဂုဏ်သိက္ခာ ကျဆင်းစေတဲ့အတွက် PNO လူကြီးတွေ အနေနဲ့ လက်အောက်ငယ်သားတွေကို နိုင်အောင် ထိန်းဖို့လိုတယ်လို့ ဒေသခံတွေက ဝေဖန်နေပါတယ်။

“သူတို့တပည့်တွေကို နိုင်အောင် ထိန်းစေချင်တယ်။ ဗိုလ်လေးအဆင့်က အောက်ခြေမှာ ဒီလို လူထုကို အနိုင်ကျင့်နေတာ နှစ်တိုင်းလိုလိုပဲ။ သူတို့ လူကြီးကလည်း ဘာမှပြောတာ မရှိဘူး” လို့ နောက်ထပ် ဒေသခံ တစ်ဦးက ပြောပါတယ်။

ပြီးခဲ့တဲ့ ဩဂုတ်လ ၁၇ ရက်နေ့မှာလည်း PNO ပြည်သူ့စစ်အဖွဲ့ဝင် ၃ ဦးဟာ ရပ်စောက်မြို့နယ်၊ ထီရီးကျေးရွာ ဘုန်းကြီးကျောင်းဝင်း အတွင်းဝင်ပြီး ဒေသခံ တစ်ဦးကို ဓားပြတိုက်ခဲ့ပါသေးတယ်။

PNO ပြည်သူ့စစ်ဟာ စစ်ကောင်စီနဲ့ ပူးပေါင်းပြီး တော်လှန်ရေးတပ်ဖွဲ့တွေကို ကရင်နီပြည်နယ်ထဲထိ ဝင်ရောက် တိုက်ခိုက်တာ၊ နိုင်ငံရေး တက်ကြွ လှုပ်ရှားသူတွေကို ဖမ်းဆီးပြီး စစ်ကောင်စီထံ အပ်နှံတာတွေကြောင့် ဒေသတွင်း နာမည်ဆိုးနဲ့ ကျော်ကြားတဲ့ အဖွဲ့ ဖြစ်ပါတယ်။

CJ-002

#MeKongNews

#ညောင်လေးပင်ခရိုင်

#PNO_ပြည်သူ့စစ်

#ဟိုပုံးမြို့နယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)