မဲခေါင်၊ သြဂုတ် ၁၁
စစ်ကိုင်းတိုင်း၊ မြောင်မြို့နယ် အခြေစိုက် T.G.R Women Drone Force အဖွဲ့ဟာ အမျိုးသမီးများနဲ့ ဖွဲ့စည်းထားတဲ့ တပ်ဖွဲ့ဖြစ်ပြီး စစ်ဆင်ရေးတွေ ဆက်တိုက် လုပ်နေပြီလို့ တပ်ဖွဲ့၀င် အမျိုးသမီး တစ်ဦးက ပြောပါတယ်။
ပြီးခဲ့တဲ့ ဇူလိုင် ၉ ရက်က ငါန်းဇွန်မြို့နယ်၊ ရေလည်သောင် အနောက်ဘက်က ပျူရွာကို အင်အားလာဖြည့်တဲ့ စစ်ကောင်စီတပ်ကို ဒရုန်းနဲ့ တိုက်ခိုက်ရာ စစ်သား တစ်ဦး သေဆုံးပြီး အများအပြား ဒဏ်ရာရခဲ့တယ်လို့ ဆိုပါတယ်။
“ဇူလိုင် ၂၀ ရက်နေ့ကလည်း ၂ ပွဲ ဆက်တိုက် မစ်ရှင် ဆောင်ရွက်ခဲ့ပါတယ်။ ပထမ လုပ်ဆောင်မှု နေရာဟာ စစ်ခွေးတွေ အထိုင်ကျတဲ့ နေရာဆိုတော့ ထိခိုက်သေဆုံးမှု သတင်း မသိရပါဘူး။ အဲဒီနေ့ ဒုတိယ မစ်ရှင် ထပ်မံ လုပ်ဆောင်ရာမှာတော့ စစ်ခွေး ၂ ကောင် အထိနာခဲ့ပါတယ်” လို့ T.G.R Women Drone Force အဖွဲ့ အမျိုးသမီး ရဲဘော်တစ်ဦးက ပြောပါတယ်။
T.G.R Women Drone Force ကို အမျိုးသမီး သီးသန့်အဖွဲ့အဖြစ် ခေါင်းဆောင် ဗိုလ်တိုက်ဂါး က ဖွဲ့စည်းပေးခဲ့ပြီး လက်ရှိ မြောင်မြို့နယ်မှာ စစ်ကောင်စီဘက်က လှုပ်ရှားမှုရှိပါက သွားရောက် တိုက်ခိုက်လေ့ ရှိတယ်လို့ ဆိုပါတယ်။
“တိုက်ခိုက်ရေးတွေကိုလည်း ဆရာဗိုလ်တိုက်ဂါး ဆီကပဲ သင်တန်း တက်ထားကြတာပါ။ ခုချိန်ထိ စစ်ကြောင်း တစ်ခု ထွက်တယ် သတင်းကြားရင် လိုက်လံ ပစ်တယ် ထုတယ်။ အလှူရှင်တွေရဲ့ ပံ့ပိုးမှုတွေနဲ့ပဲ ရပ်တည် နေပါတယ်” လို့ T.G.R Women Drone Force ခေါင်းဆောင်ကျားခင်စိန် ကပြောပါတယ်။
အမျိုးသားများနည်းတူ တော်လှန်ရေးသော အမျိုးသမီးတွေဖြစ်လို့ စစ်ဆင်ရေး တာ၀န် ထမ်းဆောင်ရာမှာ သွားလာ နေထိုင်ရေးတွေမှာ ခက်ခဲမှုတွေရှိပေမယ့် ပေးအပ်လာတဲ့ တာဝန်တွေကို ပြီးစီးအောင် ဆောင်ရွက်နိုင် တယ်လို့ ဆိုပါတယ်။
“ကွာခြားချက်ကတော့ ယောက်ျားတွေလို သန်မာချင်ယောင် ဆောင်နေပေမယ် တချို့ နေရာတွေမှာတော့ မတူဘူးပေါ့နော်။ ပြေးတာကအစ သူတို့လောက် မပြေးနိုင်တာမျိုးတွေပေါ့။ ဒါပေမယ့် တာဝန်တစ်ခု ပေးကြည့် အဲဒီတာဝန်က အဲဒီ အမျိုးသမီးကို ခွန်အားအဖြစ် ပြောင်းလဲသွားစေလိမ့်မယ်။ အမျိုးသမီး တစ်ယောက်ကို မလုပ်နိုင်ဘူး လို့တော့ ဘယ်တော့မှ အထင်မသေးပါနဲ့။ အမျိုးသမီးတွေက ပိုပြီး သန်မာတတ်ကြပါတယ်” လို့ ကျားခင်စိန် ကပြောပါတယ်။
T.G.R Women Drone Force စတင်ဖွဲ့စည်းစဥ်က ကြောက်ရွံ့စိုးထိတ်မှုတွေ ရှိခဲ့ပေမယ့် အခုချိန်မှာတော့ စစ်ကြောင်း လှုပ်ရှားမှု သတင်းကြားရင် တာဝန်ထမ်းဆောင်ဖို့ အသင့်ရှိနေတယ်လို့ ဆိုပါတယ်။
ဒါ့အပြင် ပြည်သူတွေ ထောက်ပံ့လှူဒါန်းမှုနဲ့ ဒရုန်း တစ်စီးကို ကျပ်သိန်း ၁၅၀ နဲ့ ဝယ်ယူထားပြီး နေ့စဥ် လေ့ကျင့်နေတဲ့ ကျွမ်းကျင်အဆင့် အမျိုးသမီး ရဲဘော်များက ဒရုန်း တိုက်ခိုက်မှုတွေမှာ ပါဝင်လျက် ရှိနေတယ်လို့ သိရပါတယ်။
CJ-005
#T.G.RWomenDroneForce
#မြောင်
#အမျိုးသမီးတပ်ဖွဲ့
#ဒရုန်းတပ်ဖွဲ့
#ကျားခင်စိန်
