မဲခေါင်၊ ဩဂုတ် ၅
ကချင်ပြည်နယ်၊ ဝိုင်းမော်နဲ့ မြစ်ကြီးမြို့ကို လျှပ်စစ် ပို့လွှတ်ပေးနေတဲ့ မလိခ ဓာတ်အားပေး စက်ရုံက လိုင်းကြိုးတွေ ဩဂုတ်လ ၄ ရက်နေ့၊ မနက် ၁၁ နာရီကျော်က စစ်ကောင်စီ လေကြောင်းက ဗုံးကြဲရာ ထိမှန် ပျက်စီးပြီး လျှပ်စစ်ဓာတ်အား ပြတ်တောက်နေတယ်လို့ ဒေသခံတွေက ပြောပါတယ်။
ဗုံးကြဲမှုကြောင့် ဓာတ်တိုင် နံပါတ် (၈၁) ပျက်စီးသွားပြီး ပြန်လည် ပြင်ဆင်ဖို့ ကြိုးစားနေပေမယ့် တိုက်ပွဲ ဖြစ်နေတာကြောင့် ပြုပြင်ဖို့ ခက်ခဲနေပြီး ဓာတ်အားပေးဖို့ ကြန့်ကြာနေတယ်လို့ ဆိုပါတယ်။
“ဟုတ်တယ်။ မနေ့က ၁၁ နာရီခွဲမှာ မလိ၊ မလိယန် တပ်စခန်း အောင်ပွဲခံ သိမ်းပိုက်လိုက်တာကြောင့် လေကြောင်းနဲ့ ပြန်လာပစ်တာမှာ တမင် သက်သက် မြစ်ကြီးနား နဲ့ ဝိုင်းမော်ဘက် သွားထားတဲ့ အဲဒီ ဓာတ်အားတိုင် အကြီး နံပါတ် (၈၁) လား ဟုတ်တယ် ဗုံးကြဲ ဖြတ်ပစ်လိုက်လို့ မြစ်ကြီးနား ရပ်ကွက် တချို့ မလာဘူး။ ဝိုင်မော် တချို့ မလာဘူး” လို့ KIA ရှေ့တန်းနဲ့ နီးစပ်တဲ့ သတင်းရင်းမြစ်က ပြောပါတယ်။
မလိစက်ရုံကနေ မြစ်ကြီးနားမြို့ နဲ့ ဝိုင်းမော်မြို့သို့ ဓါတ်အား ပို့လွှတ်နေတဲ့ ၆၆ ကေဗွီ ဓါတ်အားလိုင်း စစ်မက် ဖြစ်ပွားတာကြောင့် လိုင်းကြိုး ပြတ်ကျကာ ဓါတ်အားပို့လွှတ်လို့ မရတဲ့ အခြေအနေ ကြုံနေရတယ်လို့ KIO ပိုင် ဘူးဂါး လျှပ်စစ် ဓာတ်အားပေး ကုမ္ပဏီက မနေ့က ထုတ်ပြန်ထားပါတယ်။
အဲဒါကြောင့် မြစ်ကြီးနားခွဲရုံ (၃) ရုံမှ ဖြန့်ဖြူးတဲ့ ရပ်ကွက်တွေမှာ ပါဝင်တဲ့ လျှပ်စစ်ဓါတ်အား သုံးစွဲသူ မိဘပြည်သူများ အနေနဲ့ ဇယားမှာ ဖော်ပြထားတဲ့ အတိုင်း ၄ နာရီခြား အလှည့်ကျစနစ်နဲ့ ဓါတ်အားဖြန့်ဖြူးပေးမယ်လို့ ထုတ်ကန်ချက်မှာ ဖော်ပြထားပါတယ်။
“အဲဒါကြောင့် ချီဖွေ ရေအား လျှပ်စစ်ကိုပဲ အခုက အလှည့်ကျ သုံးနေတယ်” လို့ KIO နဲ့ နီးစပ်သူ တစ်ဦးက ရှင်းပြပါတယ်။
စစ်ကောင်စီတပ်ဟာ ၂၀၁၂ ခုနှစ်က ဖြစ်ပွားခဲ့တဲ့ တိုက်ပွဲအတွင်းမှာလည်း မြစ်ကြီးနားကို လျှပ်စစ်ဓာတ်အား ပို့လွှတ်ပေးတဲ့ လျှပ်စစ် လိုင်းကြိုးတွေ ဖျက်ဆီးခဲ့တာကြောင့် များစွာ အခက်အခဲ ဖြစ်ခဲ့ရတယ်လို့ ဒေသခံတွေက ပြောပါတယ်။
CJ-008
#Mekongnews
#မြစ်ကြီးနား
#မလိခ_လျှပ်စစ်စက်ရုံ
#လေကြောင်း_ဗုံးကြဲ
