မဲခေါင်၊ ဇူလိုင် ၂၇
စစ်ကိုင်းတိုင်း၊ ရွှေဘိုမြို့နယ်ကို နယ်မြေစိုးမိုးဖို့ကြိုးပမ်းနေကြတဲ့ စစ်ကောင်စီတပ်ဖွဲ့တွေကို ဘီးလူးညီနောင်မြို့ပြစစ်ဆင်ရေးအဖြစ် နယ်စည်းမခြားရွှေဘိုသားအဖွဲ့နဲ့ ပူးပေါင်းအဖွဲ့တွေက တိုက်ခိုက်လို့ စစ်သားအများအပြား သေဆုံးတယ်လို့ ဆိုပါတယ်။
ရွှေဘိုမြို့၊ သီတဂူကျောင်းပေါက်ဝနားမှာ ဇူလိုင် ၂၃ ရက်၊ညနေပိုင်းက ရေချိုးနေကြတဲ့ စစ်သားတွေကို ပါဆယ်မှိုင်းနဲ့ တော်လှန်ရေးတပ်ဖွဲ့တွေက တိုက်ခိုက်ခဲ့ရာလို့ စစ်သား ၇ ယောက်ကတော့ ပွဲချင်းပြီး သေဆုံးသွားတယ်လို့ ဆိုပါတယ်။
“ရွှေဘိုမြို့ပေါ် UG အဖွဲ့တွေနဲ့ Mission ဖော်ဆောင်ခဲ့တာပေါ့။ လွန်ခဲ့တဲ့ ၂ လလောက်တည်းကနေပြီးတော့ ကြိုတင်ပြင်ဆင်မှုလုပ်ခဲ့တာပါ။ သူတို့က အဲဒီအနီးနားမှာ စခန်းချထားတာကို ကြိုတင်ထောက်လှမ်းပြီးတော့ မှိုင်းခွဲလိုက်တာပါ” လို့ နယ်စည်းမခြားရွှေဘိုသားအဖွဲ့ရဲ့တာဝန်ခံက ပြောပါတယ်။
ဒီဖြစ်စဉ်အပြီး မိနစ်ပိုင်းအကြာ ညနေ ၆ နာရီ ၂၀ မိနစ်မှာလည်း ရွှေဘိုမြို့၊ ဆုတောင်းပြည့်ကွေ့က စစ်တပ်ယာဉ်တန်းကို ပါဆယ်ချိန်ကိုက်မိုင်းနဲ့ဖောက်ခွဲတိုက်ခိုက်ခဲ့ရာ စစ်သား အများအပြား သေဆုံး ဒဏ်ရာရခဲ့ကြတယ်လို့ ဆိုပါတယ်။
“ကျွန်တော်တို့မြို့ပေါ် UG မဟာမိတ်အဖွဲ့တွေ တစ်ယောက်မှ ထိခိုက်မှုမရှိပါဘူး။ စကစဘက်က ပထမအကြိမ်မှိုင်းခွဲတိုက်ခိုက်တုန်းက ၇ ကောင်အဲဒီနေရာမှာတင် ပုံလျက်လဲသွားပါတယ်။ ဒုတိယအခေါက်ဖောက်ခွဲမှုမှာလည်း အများအပြား ထိသွားတယ်။ သတင်းရင်းမြစ်အရ ၃၄ ယောက် ဆေးရုံကိုရောက်လာပြီး အဲ့ဒီထဲမှာ ၂၂ ကောင်သေဆုံးတယ်လို့ သိရတာ” လို့ နယ်စည်းမခြားရွှေဘိုသားအဖွဲ့ရဲ့တာဝန်ခံက ဆက်ပြောပါတယ်။
ဒီတိုက်ခိုက်မှုဟာ ရွှေဘိုမြို့ပေါ်မှာ ဘီးလူးညီနောင်မြို့ပြပွဲဦးထွက်စစ်ဆင်ရေးဖြစ်ပြီး အလားတူ တိုက်ခိုက်မှုမျိုးကိုလည်းဆက်လက်ဖော်ဆောင်သွားမှာဖြစ်လို့ ပြည်သူများဝိုင်းဝန်းပံ့ပိုးပေးကြဖို့ ၎င်း က ဆိုပါတယ်။
“အဓိက လိုအပ်ချက်ကတော့ လက်နက်ခဲယမ်းမပြည့်စုံမှုတွေ အများကြီးရှိပါတယ်။ ထောက်ပို့ကလည်း အားနည်းတဲ့အတွက် အရမ်းကို အခက်အခဲဖြစ်နေပါတယ်” လို့ သူက ဆက်ပြောပါတယ်။
ဘီးလူးညီနောင်မြို့ပြစစ်ဆင်ရေးအဖြစ် အခုလိုပွဲဦးထွက်တိုက်ပွဲဖော်ဆောင်နိုင်ခဲ့တဲ့အတွက် ဆက်လက်တိုက်ပွဲများ ဖော်ဆောင်နိုင် အဓိကလိုအပ်နေတဲ့ AK47 သေနတ် ၂ လက်ကို ဝယ်ယူနိုင်ရေးအတွက်လည်း ကမ်ပိန်းပြုလုပ်လျက်ရှိတာကြောင့် ပြည်သူများပါဝင်ပေးကြဖို့ နယ်စည်းမခြားရွှေဘိုသားတော်လှန်ရေးအဖွဲ့က ပန်ကြားထားပါတယ်။
CJ – 005
#ရွှေဘိုမြို့
#မြို့ပြပြောက်ကျား
#UG
#AK47
#နယ်စည်းမခြားရွှေဘိုသား
#ဘီးလူးညီနောင်
