မဲခေါင် ၊ ဇူလိုင် ၂၃

မိုးဗြဲ-လွိုင်ကော် လမ်းမကြီးအတိုင်း ဇူလိုင် ၂၁ ရက်နေ့မှာ ဆင်းလာတဲ့ စစ်ကောင်စီ တပ်မ (၅၅) စစ်ကြောင်းကို ဖယ်ခုံ PDF နဲ့ KNDF တပ်ရင်း အမှတ် (၃) တို့ ပူးပေါင်း တိုက်ခိုက်ခဲ့တယ်လို့ ဖယ်ခုံ PDF တပ်ရင်းအမှတ် (၁၀၀၆) က ထုတ်ပြန်ပါတယ်။

အဲ့ဒီလို ကြားဖြတ် တိုက်ခိုက်မှုကြောင့် စစ်ကောင်စီတပ်ဖွဲ့ဝင်တစ်ချို့ ထိခိုက်မှု ရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ကြားဖြတ်တိုက်ခိုက်မှုကြောင့် စစ်ကောင်စီတပ်တွေ ရှေ့ဆက်မတိုးနိုင်ဘဲ ဇူလိုင်လ ၂၂ ရက်နေ့အထိ တိုက်ပွဲ ဆက်လက် ဖြစ်ပွားခဲ့တယ်လို့လည်း ဖယ်ခုံPDF က ပြောပါတယ်။

“စစ်ကောင်စီအင်အား တပ်ရင်း တရင်းစာလောက်ရှိတယ်။ အခုတော့ ရွာတွေ ဘုန်းကြီးကျောင်းတွေထဲမှာ နေနေတယ်။ ဒေသခံတွေကို ကာဗာယူထားတဲ့ ပုံစံပေါ့။ ဒေသခံတွေကတော့ ထွက်ပြေးတဲ့လူလည်း ထွက်ပြေးနေကြပြီ” လို့ ကရင်နီ စစ်ရေးသတင်းရင်းမြစ် တစ်ဦးကပြောပါတယ်။

အဲ့ဒီလိုတိုက်ပွဲဖြစ်ပွားပြီးနောက် စစ်ကောင်စီဟာ ကန်းကျိုင်းရွာဘုန်းကြီးကျောင်းနဲ့ ဆောင်ကန်းရှမ်းရွာမှာ တပ်စွဲထားတဲ့အတွက် စစ်ရေးတင်းမာနေဆဲ ဖြစ်တယ်လို့ ဖယ်ခုံ PDFက ပြောပါတယ်။

ဒါ့အပြင် စစ်ကောင်စီတပ်ဟာ ရေသန့်ကားလို့ ယူဆရတဲ့ လိုက်ထရပ်ကား တစ်စီးကို အကြောင်းမဲ့ ပစ်ခတ်ပြီး ဆောင်ကန်းရွာမှာ ဖမ်းဆီးထားတဲ့အတွက် ကားပေါ်မှာပါတဲ့သူတွေရဲ့ အခြေအနေကို မသိရေးသေးဘူးလို့ ထုတ်ပြန်ချက်မှာ ဖော်ပြထားပါတယ်။

စစ်ကောင်စီရဲ့ တပ်မ (၅၅) ဟာ ရှမ်းပြည်နယ်တောင်ပိုင်း ကလောြမို့ရှိ ဘူတာ အပေါ်ဘက်မှာ အခြေစိုက်တဲ့ တပ်မ တစ်ခု ဖြစ်ပါတယ်။

ကြားဖြတ်တိုက်ခံရတဲ့ စစ်ကောင်စီက လက်ရှိမှာ ကျေးရွာတွေထဲ တပ်စွဲနေတာကြောင့် ဒေသခံ အများအပြား ဘေးလွတ်ရာ တိမ်းရှောင်နေကြပြီး တိုက်ပွဲ ဆက်လက် ပြင်းထန်နိုင်တဲ့အတွက် လွိုင်ကော်-မိုးဗြဲ လမ်းမကြီးမှာ သတိနဲ့ သွားလာဖို့ ဖယ်ခုံ PDF က တိုက်တွန်းထားပါတယ်။

CJ-002

#MekongNews

#မိုးဗြဲ-လွိုင်ကော်

#PDF

#KNDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)