မဲခေါင်၊ ဇူလိုင် ၁၅
ပအိုဝ်းအမျိုးသား ဖက်ဒရယ်ကောင်စီ-PNFC ကဦးဆောင်ပြီး ပအို၀်းပြည်သူ့ကာကွယ်ရေးတပ်မတော်(ခမ်းဒွမ်) နဲ့ (ခမ်းကောင်)ပေါင်းစပ်ဖွဲ့စည်းထားတဲ့ ပအို၀်းစစ်တပ်ကို တည်ထောင်တော့မှာဖြစ်တယ်လို့ PNFC က ဒီကနေ့ဇူလိုင်လ ၁၅ ရက်မှာ ထုတ်ပြန်လိုက်ပါတယ်။
ပအို၀်းပြည်သူ့ကာကွယ်ရေးတပ်မတော် (ခမ်းဒွမ်) နဲ့ (ခမ်းကောင်) ပေါင်းစည်းပြီး ပအို၀်းအမျိုးသားရေးကို လက်တွဲညီညီလုပ်ဆောင်နိုင်ဖို့ ပအို၀်းစစ်တပ် ဖွဲ့စည်းဖို့ ဆောင်ရွက်နေတာဖြစ်ပြီး ပအို၀်းလူငယ်တွေ အနေနဲ့ ပါဝင်ဖို့ ဖိတ်ခေါ်တယ်လို့ ဆိုပါတယ်။
ကနဦး ဖွဲ့စည်းပုံအရ ပအို၀်းစစ်တပ်ကို တပ်နယ်(၁) သထုံ ခမ်းဒွမ်၊ တပ်နယ်(၂) ဖားအံခရိုင် ခမ်းဒွမ် ၊ တပ်နယ်(၃) ရှမ်းပြည်နယ် ခမ်းကောင်ဆိုပြီး တပ်နယ်(၃) ခုနဲ့ စတင်ဖွဲ့စည်းမယ်လို့ ပအို၀်းအမျိုးသား ဖက်ဒရယ်ကောင်စီက အသိပေးထားပြီး တပ်သားသစ်တွေကို လက်ခံနေတယ်လို့ ထုတ်ပြန်ချက်မှာဖော်ပြထားပါတယ်။
ပအို၀်းအမျိုးသား ဖက်ဒရယ်ကောင်စီ-PNFC ကို ၂၀၂၁ ခုနှစ် ဒီဇင်ဘာလ ၁၁ ရက် ပအို၀်းအမျိုးသား လွတ်မြောက်ရေးအဖွဲ့တည်ထောင်မှု (၇၂) နှစ်ပြည့်မှာ စတင်တည်ထောင်ခဲ့တာ ဖြစ်ပါတယ်။
ပအို၀်းစစ်တပ် တည်ထောင်ဖို့ ကြိုးပမ်းနေတဲ့ကိစ္စရပ် အသေးစိတ်ကို သိရှိနိုင်ဖို့ မဲခေါင်သတင်းဌာနအနေနဲ့ PNFC ပြန်ကြားရေး တာဝန်ရှိသူတွေဖြစ်တဲ့ ကိုခွန်ဝေထူးနဲ့ ကိုခွန်၀ါး တို့ကို ဆက်သွယ်မေးမြန်းခဲ့ပေမဲ့ ဆက်သွယ်လို့ မရသေးပါဘူး။
တစ်ဖက်မှာလည်း စစ်ကောင်စီ လက်အောက်ခံ ပြည်သူ့စစ်အဖြစ်အသွင်ပြောင်းထားတဲ့ ဦးအောင်ခမ်းထီ ဦးဆောင်တဲ့ ပအို၀်း အမျိုးသားတပ်မတော်- PNA/PNO ဟာ ပအို၀်းလူမျိုးတွေ အများဆုံးနေထိုင်တဲ့ ရှမ်းပြည်နယ်တောင်ပိုင်း ပအို၀်းကိုယ်ပိုင် အုပ်ချုပ်ခွင့်ရဒေသ ဆီဆိုင်၊ ဟိုပုံး နဲ့ ပင်လောင်းမြို့နယ်တွေကို ချုပ်ကိုင်ထားပြီး ပြည်သူတွေအပေါ် အနိုင်ကျင့် ဗိုလ်ကျမှုတွေ ပြုလုပ်နေတာလည်း ဖြစ်ပါတယ်။
ဒီလို စစ်ကောင်စီနဲ့ စစ်ရေး၊ စီးပွားရေး လက်တွဲဆောင်ရွက်နေတဲ့ PNA/PNO ပြည်သူ့စစ်တပ်ဖွဲ့ကို ၁၉၄၉ ခုနှစ်မှာ တည်ထောင်ခဲ့တာဖြစ်ပြီး လက်ရှိမှာလည်း ပအို၀်းလူမျိုးတွေအပေါ်မှာ လူမျိုးရေးအရ သွေးခွဲသပ်လျှိုမှုတွေ ပြုလုပ်နေတာလည်းဖြစ်ပါတယ်။
ပအို၀်းအမျိုးသား ဖက်ဒရယ်ကောင်စီ-PNFC ဟာ တိုင်းရင်းသားတော်လှန်ရေးတပ်ဖွဲ့တွေနဲ့ ပူးပေါင်းပြီး စစ်ကောင်စီကိုပြန်လည်တိုက်ခိုက်နေတာကြောင့် စစ်တပ်နဲ့ အကျိုးတူပူးပေါင်းနေတဲ့ ပအို၀်းအမျိုးသားအဖွဲ့ချုပ်-PNO/PNA ပြည်သူ့စစ်နဲ့ နိုင်ငံရေး၊ စစ်ရေးအခြေအနေတွေ တင်းမာလာနိုင်တာနဲ့ ပတ်သက်ပြီး ရှင်းရှင်းဖော်ပြထားခြင်း မရှိပါဘူး။
MK-007
#MekongNews
#ပအိုဝ်းတပ်မတော်
#PNFC
#ဆီဆိုင်
