မဲခေါင်၊ ဇူလိုင် ၁၄

ဒေါ်အောင်ဆန်းစုကြည်နဲ့ ထိုင်းနိုင်ငံခြားရေးဝန်ကြီး တွေ့ဆုံမှု သတင်းပေါက်ကြားတာနဲ့ ပတ်သက်ပြီး နေပြည်တော် အကျဉ်းဦးစီး ညွှန်ချုပ် ဦးဇော်မင်း ကို ရာထူးမှ ထုတ်ပယ်ကာ စစ်ဆေးမှုတွေ လုပ်နေတယ်လို့ မဲခေါင်သတင်းဌာနမှ စုံစမ်း သိရှိရပါတယ်။

ဇူလိုင်လ ၉ ရက်နေ့က ထိုင်းနိုင်ငံခြားရေးဝန်ကြီး Don Pramudwinai နေပြည်တော်သို့ အထူးလေယာဉ်နဲ့ လျှို့ဝှက် ရောက်ရှိလာပြီး စစ်ခေါင်းဆောင် မင်းအောင်လှိုင်၊ နိုင်ငံခြားရေးဝန်ကြီး သန်းဆွေ တို့နဲ့ တွေ့ဆုံခဲ့သလို နေပြည်တော်ထောင်မှာ အကျဉ်းချ ခံနေရတဲ့ ဒေါ်အောင်ဆန်းစုကြည်နဲ့ တွေ့ဆုံခဲ့တယ်လို့ သတင်းတွေ ထွက်ပေါ်ခဲ့ပါတယ်။

“ထိုင်းနိုင်ငံခြားရေးဝန်ကြီး လာတဲ့ သတင်းနဲ့ ပတ်သက်ပြီး သတင်းဌာနတွေ သတင်းရတာတွေရှိတယ်။ ဒီလို သတင်းမျိုးက အတွင်းထဲက ထွက်လာတော့ ခေါ်ကြိတ်တဲ့ သဘောပါ။ တစ်ခုခု ဖြစ်ပြီဆိုတာနဲ့ ဒီလိုမျိုး အနားပေးတာ၊ ပြောင်းရွှေ့တာတွေက လုပ်နေကြပါ။ လက်ရှိမှာတော့ တရားဝင် စာထုတ်တာတွေတော့ မကြားမိသေးဘူး” လို့ အကျဉ်းဦးစီးဌာန အရာရှိကြီး တစ်ဦးက ပြောပါတယ်။

ဒေါ်အောင်ဆန်းစုကြည်နဲ့ တွေ့ဆုံခဲ့တဲ့ သတင်းကို စစ်ကောင်စီက မထုတ်ပြန်ပေမယ့် မီဒီယာ တချို့မှာ ဖော်ပြခဲ့သလို ထိုင်းနိုင်ငံခြားရေးဝန်ကြီး Don Pramudwinai ကလည်း နေပြည်တော်ကို နေ့ချင်းပြန် သွားရောက်ခဲ့တယ်လို့ ကနဦး ပြောကြားခဲ့ပြီးနောက် နောက်ပိုင်း ဒေါ်အောင်ဆန်းစုကြည်နဲ့ တွေ့ဆုံခဲ့တယ်လို့ ပြောကြားခဲ့တာ ဖြစ်ပါတယ်။

အဲဒီနောက် ထိုင်းနိုင်ငံခြားရေးဝန်ကြီး နေပြည်တော် လာရောက်ရာမှာ ဒေါ်အောင်ဆန်းစုကြည်နဲ့ ၂ ဦးထဲ သီးသန့် တစ်နာရီခွဲကြာ တွေ့ဆုံခဲ့တယ်လို့ စစ်ကောင်စီ ပြောခွင့်ရ ဗိုလ်မှူးချုပ်ဇော်မင်းထွန်းက ဇူလိုင် ၁၃ ရက်နေ့က ဝန်ခံပြောကြားခဲ့ပြီးနောက် အခုကဲ့သို့ နေပြည်တော် အကျဉ်းဦးစီးညွှန်ချုပ်ကို ရာထူးမှ အနားပေးပြီး စစ်ဆေးနေတယ် ဆိုတဲ့ သတင်း ထွက်ပေါ်လာတာ ဖြစ်ပါတယ်။

နေပြည်တော် အကျဉ်းဦးစီးညွှန်ချုပ် ဦးဇော်မင်း ဟာ ၂၀၂၀ ခုနှစ်က စတင်ပြီး လက်ရှိအချိန်ထိ အဆိုပါ ရာထူးကို စစ်ကောင်စီက ပေးအပ်ထားတာဖြစ်ပြီး ယခင်အကျဉ်းဦးစီး ညွှန်ချုပ် ဦးမြင့်စိုးကို ၂၀၂၀ ခုနှစ်မှာ အနားပေးခဲ့တာဖြစ်ပါတယ်။

MK-005

#MekongNews

#နေပြည်တော်

#ဒေါ်အောင်ဆန်းစုကြည်

#ထိုင်းနိုင်ငံခြားရေးဝန်ကြီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)