မဲခေါင်၊ ဇူလိုင် ၉
ကရင်ပြည်နယ်မှာ ၂၀၂၃ ခုနှစ်၊ ဇန်နဝါရီလ ကနေ ဇွန်လကုန် အထိ ၆ လအတွင်း တိုက်ပွဲပေါင်း ၂,၅၀၀ နီးပါး ဖြစ်ပွားခဲ့ပြီး စစ်တပ် တပ်ရင်းမှူး ၁၀ ဦးအပါအဝင် စစ်သား ၂,၆၀၀ ကျော်ကို ရှင်းလင်း သုတ်သင်နိုင်ခဲ့တယ်လို့ ကရင်အမျိုးသား အစည်းအရုံး-KNU ဗဟိုက ဒီကနေ့ ဇူလိုင်လ ၉ ရက်မှာ ထုတ်ပြန်လိုက်ပါတယ်။
ပြီးခဲ့တဲ့ ၆ လအတွင်း ကရင်ပြည်နယ်မှာ စစ်ရေးအရှိန်မြှင့် လှုပ်ရှားခဲ့ရာ စစ်တပ် တပ်ရင်းမှူး ၅ ဦး၊ ဒုတပ်ရင်းမှူး ၅ ဦး၊ ဗိုလ်ကြီး ၉ ဦး၊ ဗိုလ် ၄ ဦး၊ အရာခံဗိုလ် ၅ ဦး အပါအဝင် စစ်ကောင်စီတပ်သား ၂,၆၃၂ ဦး သေဆုံးပြီး ဒုရင်းမှူး တစ်ဦး အပါအဝင် စစ်သား ၁,၆၈၅ ဦး ထိခိုက်ဒဏ်ရာရှိခဲ့ကာ စစ်ကား ၉၉ စီးကို ဖျက်ဆီးနိုင်ခဲ့တယ်လို့ ဆိုပါတယ်။
ကရင်ပြည်နယ်အနှံ့ ဖြစ်ပွားနေတဲ့ တိုက်ပွဲတွေကို ကရင်အမျိုးသား လွတ်မြောက်ရေး တပ်မတော်-K.N.L.A၊ ကရင်အမျိုးသား ကာကွယ်ရေးတပ်ဖွဲ့-K.N.D.O နဲ့ စစ်ရေးကွပ်ကဲမှု လက်အောင်ခံ PDF တပ်ရင်းတို့ ပူးပေါင်း လုပ်ဆောင်ခဲ့တာဖြစ်ပြီး ပြည်သူ့ကာကွယ်ရေးတပ်ဖွဲ့တွေဘက်က ရဲဘော် ၇၆ ဦး ကျဆုံးကာ ၂၅၇ ဦး ထိခိုက်ဒဏ်ရာ ရရှိခဲ့တယ်လို့ KNU ကပြောပါတယ်။
မြဝတီမြို့နယ်၊ ကြာအင်းဆိပ်ကြီးမြို့နယ်၊ လေးကေကော်မြို့သစ် အပါအဝင် ဒေသအနှံ့မှာ စစ်ကောင်စီတပ်၊ ကရင်နယ်ခြားစောင့်တပ်-BGF ပူးပေါင်းတပ်တွေနဲ့ KNU လက်အောက်ခံ တပ်မဟာတွေ၊ ပြည်သူ့ကာကွယ်ရေးတပ်ဖွဲ့တွေ တိုက်ပွဲပေါင်းများစွာ ဖြစ်ပွားနေပါတယ်။
တိုက်ပွဲတွေ အတွင်း စစ်ကောင်စီတပ်တွေရဲ့ အကြမ်းဖက် အစုလိုက်အပြုံလိုက် သတ်ဖြတ်မှုတွေ၊ ပြည်သူတွေ နေထိုင်တဲ့ ကျေးရွာတွေကို အကြောင်းမဲ့ စစ်ကြောင်းထိုးပြီး နေအိမ်တွေကို မီးရှို့ ဖျက်ဆီးတာတွေကြောင့် ဒေသခံပြည်သူ ၆ သိန်းနီးပါး နေ့ရပ်စွန့်ခွာ ထွက်ပြေးနေရကာ ထိုင်းနယ်စပ်နဲ့ ထိုင်းနိုင်ငံအတွင်း ခိုလှုံ နေထိုင်နေရပါတယ်။
၂၀၂၂ ခုနှစ်၊ ဇူလိုင်လမှ ၂၀၂၃ ခုနှစ်၊ ဇွန်လအထိ KNU က စစ်ရှောင်ပြည်သူ ၂၅၀,၀၀၀ ခန့်ကို အရေးပေါ် အကူအညီတွေ ထောက်ပံ့ပေးခဲ့ပေမဲ့ လက်ရှိ မိုးတွင်းကာလ စစ်ရှောင်ဦးရေ များပြားလာတာကြောင့် စားနပ်ရိက္ခာ၊ အမိုးအကာနဲ့ ဆေးဝါး လုံလောက်မှုမရှိ ဖြစ်နေပြီး ပြည်တွင်း၊ ပြည်ပ အလှူရှင်တွေ အနေနဲ့ လူသားချင်း စာနာထောက်ထားမှုဆိုင်ရာ အကူအညီတွေ ပေးအပ်ဖို့ ဖိတ်ခေါ်တယ်လို့ ထုတ်ပြန်ချက်မှာ မေတ္တာရပ်ခံထားပါတယ်။
MK-007
#MeKongNews
#ကရင်ပြည်နယ်
#KNU
#တပ်ရင်းမှူး
