မဲခေါင်၊ ဇူလိုင် ၉

ကချင်ပြည်နယ်၊ ဖားကန့်မြို့နယ်၊ ဆိပ်မူရပ်ကွက်ရှိ ရှင်းရင် hotel &KTV ပိုင်ရှင်၊ အသက် ၄၅ နှစ်အရွယ် ဒေါ်ဖြူဖြူသန့် ဆိုသူကို လူတစ်စုက အပြင်သို့ လာရောက် ခေါ်ဆောင် သတ်ဖြတ်သွားတယ်လို့ သတင်းရရှိပါတယ်။

ဆိပ်မူရပ်ကွက်မှာ ဖွင့်လှစ်ထားတဲ့ ရှင်းရင်ဟိုတယ်ရဲ့ ပိုင်ရှင်ဖြစ်သူ အမျိုးသမီးကို လူတစ်စုက ဇူလိုင် ၈ ရက်၊ ည ၉ နာရီကျော်မှာ အပြင် ခေါ်ထုတ်သွားပြီးနောက် ဒီကနေ့ မနက်ပိုင်းက ဆိုင်းတောင်ရွာဟောင်း အနီး ကတ္တရာလမ်းပေါ်မှာ သေနတ်ဒဏ်ရာတွေနဲ့ သေဆုံးနေတဲ့ ရုပ်လောင်း ပြန်တွေ့ခဲ့တာလို့ ဒေသခံ တစ်ဦးက ပြောပါတယ်။

“တစ်ယောက်တစ်ခွန်းတော့ ပြောနေကြတာ။ ခုချိန်ထိ ဘယ်အဖွဲ့က သတ်တာလည်း ဆိုတာတော့ မသိကြသေးပါဘူး။ စစ်တပ်ကလည်း PDF တွေ သတ်ပြီး လုပ်သွားတာ ပြောတယ်။ ဟိုဘက်ကလည်း စစ်တပ်ကကောင်တွေ သူတို့တောင်းတဲ့ ပိုက်ဆံ မပေးလို့ သတ်တယ်ဆိုပြီး သတင်း‌ပေါင်းစုံ ထွက်နေတာ။ ကျန်ခဲ့တဲ့ လကလည်း KTV ပိုင်ရှင် အမျိုးသမီး တစ်ယောက် အသတ်ခံရပြီး ပစ္စည်းတွေ ပါသွားတဲ့ အမှုလည်း ခုချိန်ထိ တရားခံ မပေါ်သေးဘူး” လို့ သူကပြောပါတယ်။

ပြီးခဲ့တဲ့လက ဆိပ်မူရပ်ကွက်ရှိ သံယောဇဉ်နန်းတော် KTV ပိုင်ရှင် မသီတာကို အခန်းတွင်း ဝင်ရောက် သတ်ဖြတ်ပြီး ရွှေနဲ့ အဖိုးတန် ပစ္စည်းတွေ ယူဆောင်သွားတဲ့ ဖြစ်စဉ် ဖြစ်ပွါးခဲ့တယ်လို့ သိရပါတယ်။

MK-005

#MeKongNews

#ဖားကန့်

#ရှင်းရင်ဟိုတယ်

#KTV

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)