မဲခေါင်၊ ဇူလိုင် ၆

ရှမ်းပြည်တောင်ပိုင်းနဲ့ ကရင်နီနယ်စပ်မှာရှိတဲ့ မိုးဗြဲဒေသက စစ်ဘေးရှောင်စခန်း တစ်ခုမှာ သောက်သုံးရေနဲ့ စားနပ်ရိက္ခာ မလုံလောက်မှုတွေ ဖြစ်နေတယ်လို့ စစ်ရှောင်တွေကို ကူညီနေတဲ့ Freelancevlounteermyanmar အဖွဲ့ ပြန်ကြားရေးတာဝန်ခံက မဲခေါင်သတင်းကို ပြောပါတယ်။

အဆိုပါ စခန်းမှာ စစ်ရှောင်ဦးရေ ၃၀၀ ဝန်းကျင်ခန့်ရှိနေပြီး တဲခေါင်မိုးတွေကနေ မိုးရေခံဖို့ ရေတလျှောက် လုပ်မရတာ၊ ခေါင်မိုးတွေ အဆင်မပြေတာနဲ့ မိုးသိပ်မရွာတာတွေကြောင့် ရေသိုလှောင်ဖို့ အခက်အခဲတွေ ရှိနေတာကြောင့် ရေကားတွေနဲ့ သယ်ယူ စုဆောင်းရတယ်လို့ FMV က ဆိုပါတယ်။

“အခုက မိုးရာသီ ဆိုတော့ ရေကရပေမယ့် လုံလောက်မှုတော့ မရှိသေးဘူးပေါ့နော်။ တခြား လိုအပ်ချက် ကတော့ စားနပ်ရိက္ခာရယ်၊ မိုးကာတွေရယ်ပေါ့။ အခု မိုးကာတွေက သုံးလာတာကြာတဲ့ အတွက် ယိုယွင်းမှုတွေ ရှိလာတာပေါ့။ အဲ့ဒါတွေ ပြန်ပြီးပြုပြင်ဖို့ လိုနေတယ်” လို့ FMV ပြန်ကြားရေး တာဝန်ခံက ပြောပါတယ်။

FMV အနေနဲ့ ကရင်နီဒေသက စစ်ရှောင်စခန်းတွေကို သောက်သုံးရေ ဝေမျှပေးနေပြီး ရေကား တစ်စီးကို ၃၀,၀၀၀ ကျပ်ဝန်းကျင်ကနေ ၇၀,၀၀၀ ကျပ်ဝန်းကျင်အထိ ပေးဝယ်ရတယ်လို့ သိရပါတယ်။

စစ်ကောင်စီဘက်က ရိက္ခာလမ်းကြောင်း ပိတ်ဆို့တာတွေ၊ ကရင်နီပြည်နယ်တွင်း ဖြတ်လေးဖြတ် လုပ်ထားတာနဲ့ နေရာအနှံ့ တိုက်ပွဲဖြစ်လို့ လမ်းတွေ ပိတ်နေတာတွေကြောင့် အဆိုပါ စခန်း အပါအဝင် စစ်ရှောင်စခန်း အများစုမှာ စားနပ်ရိက္ခာနဲ့ ဆေးဝါး ဝယ်ယူဖို့ အခက်အခဲတွေ ဖြစ်နေပါတယ်။

အဆိုပါ စခန်းက စစ်ရှောင်တွေထဲမှာ ကလေးသူငယ်၊ သက်ကြီးရွယ်အို၊ အမျိုးသမီးနဲ့ ကိုယ်ဝန်ဆောင်တွေ အများစု ပါဝင်နေပြီး လက်ရှိ မိုးရာသီကာလမှာ အအေးမိ ဖျားနာတာနဲ့ သွေးလွန်တုပ်ကွေး ဖြစ်တာတွေအပြင် ကိုယ်ဝန်ဆောင် မိခင်တွေ အဟာရချို့တဲ့ နေတယ်လို့လည်း သိရပါတယ်။

ကရင်နီဒေသမှာ တိုက်ပွဲကာလ ကြာတာနဲ့အမျှ စစ်ရှောင်တွေကို ကူညီနေတဲ့ ပြည်တွင်း ပြည်ပ အလှူရှင်တွေရဲ့ ပါဝင်မှုတွေ တဖြည်းဖြည်း လျော့နည်းလာတယ်လို့ စစ်ရှောင် ကူညီသူတွေက ဆိုပါတယ်။

လက်ရှိအချိန်ထိ ကရင်နီနဲ့ ရှမ်းတောင်ပိုင် းနယ်စပ်မှာ နေရပ်စွန့်ခွာ ထွက်ပြေးတိမ်းရှောင်ရတဲ့ စစ်ရှောင်ဦးရေ ၂ သိန်းကျော် ရှိနေတယ်လို့ ဒေသတွင်း အရပ်ဖက် အဖွဲ့အစည်းတွေက ထုတ်ပြန်ထားပါတယ်။

ပြီးခဲ့တဲ့ ဇွန်လ ပထမပတ်က စတင်ပြီး ဒီနေ့ ဇူလိုင် ၆ ရက်အတွင်း မိုးဗြဲမြို့နယ်မှာ တိုက်ပွဲတွေ မကြာခဏ ဖြစ်ပွားကာ စစ်ရေးတင်းမာ နေတယ်လို့ ဒေသခံ တော်လှန်ရေးတပ်ဖွဲ့တွေက ဆိုပါတယ်။

ဇွန်လ တစ်လတာ အတွင်း မိုးဗြဲမြို့တွင်းကို စစ်ကောင်စီတပ် စစ်ကြောင်းထိုး ဝင်ရောက်စဉ် သတ်ဖြတ်ခဲ့တဲ့ ရုပ်အလောင်း တွေ့ရှိတဲ့ စာရင်းတွေအရ အမျိုးသား ၂၀ ဦး၊ အမျိုးသမီး ၃ ဦးနဲ့ အသက် ၁၀ နှစ်ဝန်းကျင် ကလေး တစ်ဦး ပါဝင်ခဲ့တယ်လို့ KNDF က ဇူလိုင် ၅ ရက်နေ့မှာ ထုတ်ပြန်ထားပါတယ်။

MK-009

#MeKongNews

#မိုးဗြဲ

#စစ်ရှောင်စခန်း

#KNDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)