မဲခေါင်၊ ဇူလိုင် ၁
ပြည်ထောင်စုလွှတ်တော် ကိုယ်စားပြု ကော်မတီ CRPH ၊ အမျိုးသား ညီညွတ်ရေး အစိုးရ-NUG တို့နဲ့ နီးနီးကပ်ကပ်လက်တွဲပြီး နွေဦးတော်လှန်ရေးမှာပါဝင်ကာ စစ်ကောင်စီကို ပြန်လည်တိုက်ခိုက်သွားမယ်လို့ ကရင်နီပြည်လူမျိုးပေါင်းစုံ လွတ်မြောက်ရေးတပ်ဦး(ကလလတ) – KNPLF က ဒီကနေ့ ဇူလိုင်လ ၁ ရက်မှာ အသိပေးထုတ်ပြန်လိုက်ပါတယ်။
၁၉၇၈ ခုနှစ် ဇွန်လ ၂၆ ရက်မှာ KNPLF ဟာ ကရင်နီတိုးတတ်ရေးပါတီ-KNPP ကနေ နိုင်ငံရေး အမြင်မတူမှု၊ ယုံကြည်ချက်တွေကွဲပြားမှုကြောင့်ခွဲထွက်ခဲ့ကာ လက်ရှိအချိန်ထိသီးခြားရပ်တည်ခဲ့တာဖြစ်ပြီး ၁၉၉၁ မတ်လ ၁၆ ရက်မှာ ကရင်အမျိုးသားအစည်းအရုံး-KNU နဲ့ စစ်ရေးမဟာမိတ်အဖြစ်ဖွဲ့ခဲ့တယ်လို့ ဆိုပါတယ်။
ဗိုလ်ချုပ်ကြီး စောဘိုမြ ဦးဆောင်တဲ့ KNU နဲ့ပူးပေါင်းပြီး ခွေးအိပ်တောင်တိုက်ပွဲ၊ ထီးမိုးခီးတိုက်ပွဲ၊ စောထာ၊ ရာထာ တိုက်ပွဲ စတဲ့ တိုက်ပွဲကြီးတွေမှာပါဝင်ပြီး စစ်ကောင်စီကို တိုက်ခိုက်ခဲ့ပေမဲ့ ၁၉၉၄ ခုနှစ်မေလ ၉ ရက် ကနေ ၂၀၂၃ ဇွန်လ ၁၃ ရက်ထိ နှစ်ပေါင်း ၃၀ နီးပါးကာလအတွင်းမှာတော့ စစ်တပ်ရဲ့ ဖိအားပေးမှုကြောင့် နယ်ခြားစောင့်တပ်-BGF အသွင်ကိုပြောင်းလဲခဲ့ရတယ်လို့ KNPLF ကပြောပါတယ်။
လက်ရှိအချိန်မှာတော့ စစ်ကောင်စီရဲ့ အစွယ်အပွားတစ်ခုဖြစ်တဲ့ BGF တပ်အဖြစ်ကနေ ရုန်းထွက်နိုင်ခဲ့ပြီး စစ်ကောင်စီကို တစ်ကျော့ပြန်တိုက်ခိုက်ပြီး သမိုင်းစာမျက်နှာ အသစ်ကို ပြန်လှန်နိုင်ခဲ့တယ်လို့ ဆိုပါတယ်။
အဖိနှိပ်ခံပြည်သူအားလုံးကို မျက်နှာမူပြီး KNPLF အနေနဲ့ ပြည်သူ့အကျိုးဆောင်မှု၊ စစ်အာဏာရှင်စနစ်နဲ့ ၂၀၀၈ အခြေခံ ဥပဒေကို အကုန်အစင် ဖျက်သိမ်းရေး၊ နွေဦးတော်လှန်ရေး အဆင့်ဆင့် အောင်မြင်ရေးတို့ကို ကိုင်စွဲပြီး စစ်ကောင်စီကို ပြန်လည်တိုက်ခိုက်သွားမယ်လို့ ထုတ်ပြန်ချက်မှာ ကတိပေးပြောဆိုလိုက်ပါတယ်။
KNPLF ဟာ မယ်စဲ့မြို့နယ်ထဲမှာ ဇွန်လ ၁၃ ရက်ကစပြီး နယ်ခြားစောင့်တပ်အဖြစ်ကနေ အသွင်ပြန်ကူးပြောင်းပြီး စစ်ကောင်စီတပ်တွေကို 4K တပ်ပေါင်းစုအဖြစ် ပြန်လည်တိုက်ခိုက်နေတာဖြစ်ပြီး ဒါဟာ နွေဦးတော်လှန်ရေးသမိုင်းမှာ ကြီးမားတဲ့ စစ်ရေးအချိုးအကွေ့တစ်ခုဖြစ်လာတယ်လို့ ကရင်နီစစ်ရေးသုံးသပ်သူတစ်ဦးကပြောပါတယ်။
MK-007
#MeKongNews
#ကလလတ
#စစ်ကောင်စီ
#ပြန်တိုက်