မဲခေါင်၊ ဇွန် ၁၉
ရှမ်းပြည်နယ် တောင်ပိုင်း၊ ကရင်နီနယ်စပ်၊ ဖယ်ခုံမြို့နယ်၊ မိုးဗြဲမြို့ မှာရှိတဲ့ အိမ်ကြီး အိမ်ကောင်းတွေက ပစ္စည်းတွေကို ဇွန်လ ၁၇ ရက်နေ့ကစပြီး စစ်ကောင်စီတပ်က တစ်အိမ်တက် တစ်အိမ်ဆင်း ခိုးယူနေတယ်လို့ ဒေသခံတွေက ပြောပါတယ်။
တိုက်ပွဲတွေကြောင့် လူသူကင်းမဲ့နေတဲ့ မိုးဗြဲမြို့ပေါ်မှာ စစ်ကောင်စီနဲ့ ရင်းနှီးတဲ့ အိမ်ရှင်တချို့က ပစ္စည်းတွေ ပြန်လာသယ်ဖို့ ကြိုးစားပေမယ့် ဝင်ခွင့်မပေးဘဲ သေနတ် ပစ်ဖောက် မောင်းထုတ်ခဲ့တယ်လို့ ဆိုပါတယ်။
“တန်ဖိုးရှိတာ မရှိတာကအစ ထဘီကအစ ပါတယ်။ အဒေါ် တစ်ယောက်ဆိုရင် ထဘီတွေပါ ပါသွားတယ်။ ဝမ်းဆက်တွေကော ပါတယ်။ ပိုက်ဆံအိတ်တွေကော၊ ရေခဲသေတ္တာ အဟောင်းတွေက အစ အဝတ်လျှော်စက် အကုန်လုံးပဲ” လို့ မြို့ခံ တစ်ဦးက ပြောပါတယ်။
လက်ရှိ စစ်ကောင်စီတပ်က မိုးဗြဲမြို့နယ် ဈေးကုန်း၊ ကွက်သစ်၊ ပွဲကုန်း စတဲ့ ရပ်ကွက် ကျေးရွာတွေက အိမ်ကြီး၊ အိမ်ကောင်းတွေကို စစ်ကားတွေနဲ့ လာပြီး အိမ်ရှိပစ္စည်းတွေကို သယ်ဆောင် နေတယ်လို့ ဆိုပါတယ်။
မိုးဗြဲမြို့မှာ စစ်ကောင်စီတပ်ဘက်က တွေ့တဲ့လူ ပစ်သတ်ခွင့် ပြုထားတဲ့ အနေထားရှိကာ အထပ်မြင့် နေအိမ်တွေပေါ်မှာ စနိုက်ပါနဲ့ ချိန်ထားတယ်လို့ တော်လှန်ရေး ရဲဘော် တစ်ဦးက ပြောပါတယ်။
လက်ရှိ စစ်ကောင်စီတပ်နဲ့ ဒေသကာကွယ်ရေးတပ်တွေကြား စစ်ရေးတင်းမာနေပြီး အချိန်မရွေး တိုက်ပွဲ ဖြစ်ပွားနိုင်တဲ့ အခြေအနေ ဖြစ်နေတယ်လို့ သိရပါတယ်။
မိုးဗြဲမြို့မှာ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှ ၂၀၂၃ ခုနှစ်၊ မေလ ၃၁ ရက်နေ့ အထိ စစ်ကောင်စီနဲ့ တော်လှန်ရေးတပ်ဖွဲ့ တိုက်ပွဲ ၆၁ ကြိမ်၊ လေကြောင်း တိုက်ခိုက်မှု ၃၉ ကြိမ်၊ အရပ်သားနေအိမ် ပျက်စီးမှု ၁၇၄ လုံး၊ အရပ်သား သေဆုံးသူ ၆၆ ဦး၊ ကျား ၄၅ ဦး၊ မ ၁၅ ဦး၊ ကျား/မ ခွဲခြားမရတော့အထိ အလောင်း ပျက်စီးသူ ၆ ဦးတို့ရှိပြီး သေဆုံးသူတွေထဲမှာ ၁၈ နှစ် အောက်ကလေးငယ် ၁၃ ဦး ပါဝင်ကြောင်း တိုးတက်သော ကရင်နီ ပြည်သူ့အင်အားစု-PKPF က မနေ့က ထုတ်ပြန်ထားပါတယ်။
CJ-004
#တိုးတက်သောကရင်နီပြည်သူ့အင်အားစု
