မဲခေါင်၊ မေ ၁၃
ရှမ်းပြည်အရှေ့ပိုင်း မိုင်းတုံ၊ မိုင်းဆက်မြို့နယ်တွေအပါအဝင် စစ်ဒေသအသီးသီးမှာ ရှမ်းတပ်ဖွဲ့တစ်ဖွဲ့ဖြစ်တဲ့ RCSS နှင့်စစ်ရေးအသင့်ပြင်ထားတယ်လို့ မဲခေါင်သတင်းဌာနက စုံစမ်းသိရပါတယ်။
‘ဝ’ တောင်ပိုင်း ၁၇၁ စစ်ဒေသဖြစ်တဲ့ ရှမ်းအရှေ့က မိုင်းတုံ၊ မိုင်းဆတ်အပါအဝင် FPNCC မဟာမိတ် SSPP ထိန်းချုပ်ရာ လွိုင်လင်၊ ပင်လုံ၊ လဲချား၊ မိုင်ကိုင်ဒေသတွေအထိ UWSA ဘက်က စစ်ဆိုင်ထားပြီး အသင့်အနေအထားပြင်ထားတယ်လို့ စစ်ရေးသတင်းရင်းမြစ်တစ်ဦးက မေလ ၁၂ရက် ညပိုင်းက ပြောပါတယ်။
“ ပစ်တာခတ်တာမျိုးတော့ မရှိသေးဘူး။ တခုခုဆို အဆင်သင့်ဖြစ်အောင် ပြင်ထားတာမျိုးပေါ့။ အရင်နှစ်ကလည်း ဒီလိုတခါဖြစ်သေးတယ်။ ရှမ်းပြည်ထဲတော့ တအုံ့နွေးနွေးပေါ့” လို့ သူက ပြောပါတယ်။
ဒီရက်ပိုင်းအတွင်း ‘ဝ’တပ်ဖွဲ့နဲ့ နီးစပ်တဲ့ လူမှုကွန်ယက်တွေပေါ်မှာ စစ်ရေးပြင်ဆင်တဲ့ ဗီဒီယိုတွေ တင်ထားပြီး ဒါဟာ ပြီးခဲ့တဲ့နှစ် ရှမ်းအရှေ့မှာ ‘ဝ’တပ်အင်အား ၂၀၀၀ကျော်လောက် ဖြန့်ကျက်ပြီး စစ်ရေးတင်းမာနေစဉ်က အခြေအနေနဲ့ ဆင်တူတယ်လို့ ရှမ်းပြည်အရေးလေ့လာသူတစ်ဦးက ပြောပါတယ်။
စစ်ရေးအခြေအနေနဲ့ပတ်သက်လို့ RCSS နဲ့ ‘ဝ’ တပ်ဖွဲ့တာဝန်ရှိသူတွေကို အသေးစိတ်သိရဖို့ မဲခေါင်သတင်းဌာနက ဆက်သွယ်မေးမြန်းနေဆဲဖြစ်ပါတယ်။
ရှမ်းပြည်တွင်းနဲ့ ရှမ်း-ကရင်နီနယ်စပ်မှာ ဒီလပိုင်းအတွင်းတိုက်ပွဲတွေပြင်းထန်နေပြီး တိုင်းရင်းသားလက်နက်ကိုင်တပ်ဖွဲ့တွေဖြစ်တဲ့ RCSS နဲ့ PNLO၊ RCSS နဲ့ SSPP တို့ထိတွေ့မှုတွေရှိနေသလို စစ်ကောင်စီ၊ PNO ပူးပေါင်းတပ်နဲ့ တော်လှန်ရေးတပ်ဖွဲ့တွေကြားတိုက်ပွဲလည်း ပြင်းထန်နေတာဖြစ်ပါတယ်။
‘ဝ’ တပ်ဖွဲ့တွေဟာ ပြီးခဲ့တဲ့ သီတင်းပတ်တွေအတွင်း သံလွင်မြစ်အနောက်ဖက်ခြမ်းက မိုင်းယော်တိုက်နယ်ထဲကို အင်အားအလုံးအရင်းနဲ့ ပြန်လည်ဝင်ရောက်လာတာမျိုးကလည်း စစ်ရေးအတွက် ထူးခြားတဲ့အခြေအနေဖြစ်တယ်လို့ လေ့လာသူတွေက သုံးသပ်ကြပါတယ်။
MK – 004
#MeKongNews
#UWSA
#RCSS
#SSPP
#PNLO
