မဲခေါင်၊ မေ ၁၀
ရှမ်းပြည်နယ် တောင်ပိုင်း၊ ဆီဆိုင်မြို့နယ်မှာ စစ်ဘေးရှောင်တွေကို အကူအညီပေးဖို့ PNLO ဆက်ဆံရေးရုံးသို့ လာရောက်တဲ့ သံတမန် ယာဉ်တန်းကို တိုက်ခိုက်ခဲ့တဲ့ အပေါ် ပြင်းပြင်းထန်ထန် ကန့်ကွက် ရှုတ်ချတယ်လို့ ကရင်နီပြည်နယ် အတိုင်အပင်ခံ ကောင်စီ KSCC က မနေ့ညပိုင်းမှာ ထုတ်ပြန်ပါတယ်။
အဲ့ဒီလို သံတမန်တွေနဲ့ PNLO ကိုယ်စားလှယ်ပါတဲ့ ယာဉ်တန်းကို တိုက်ခိုက်တာဟာ မြန်မာနိုင်ငံ တစ်ဝှမ်း မြေပြင် အခြေအနေမှန်ကို အာဆီယံ နိုင်ငံတွေ သိသွားမှာ စိုးရိမ်တဲ့ ဖုံးကွယ်တဲ့ လုပ်ရပ် ဖြစ်တယ်လို့ KCSS က ပြောပါတယ်။
ဒါ့အပြင် ယာဉ်တန်း တိုက်ခိုက်မှုဟာ စစ်ရှောင်တွေကို ကူညီပေးမယ့် အစီအစဉ်ကို ဖျက်လိုဖျက်ဆီး ပြုလုပ်တာ ဖြစ်တယ်လို့လည်း KSCC ရဲ့ ထုတ်ပြန်ချက်မှာ ဖော်ပြပါတယ်။
မေလ ၇ ရက်နေ့က စင်ကာပူ၊ အင်ဒိုနီးရှားနိုင်ငံမှ သံတမန်များ၊ AHA စင်တာမှ တာဝန်ရှိသူများ၊ PNLO မှ တာဝန်ရှိသူများ လိုက်ပါလာတဲ့ စစ်ဘေးရှောင် အကူအညီပေးရေး ယာဉ်တန်းဟာ ဆီဆိုင်မြို့မှာရှိတဲ့ PNLO ဆက်ဆံရေးရုံးသို့ သွားနေစဉ် ဆီဆိုင်မြို့ မရောက်မီ ၄ မိုင်အကွာမှာ ပစ်ခတ်ခံခဲ့ရတာ ဖြစ်ပါတယ်။
ပစ်ခတ်မှု ဖြစ်ပွားတဲ့ နေရာဟာ စစ်ကောင်စီတပ်နဲ့ လက်အောက်ခံ PNO ပြည်သူ့စစ် တပ်စခန်းကြားမှာ ဖြစ်ပွားခဲ့တာ ဖြစ်ပေမယ့် ပစ်ခတ်သူကို တိတိကျကျ ဖော်ထုတ်နိုင်တာ မရှိသေးပါဘူး။
အဲ့ဒီ စစ်ဘေးရှောင် အကူအညီပေးရေး သံတမန်ယာဉ်တန်း အပစ်ခံရမှုနဲ့ ပတ်သက်ပြီး နိုင်ငံတကာ အဖွဲ့အစည်း အသီးသီးကလည်း ကန့်ကွက်ရှုတ်ချကြောင်း ထုတ်ပြန်ထားပါတယ်။
CJ-002
#MeKongNews
#PNO
#ဆီဆိုင်
#ကရင်နီပြည်နယ်အတိုင်အပင်ခံကောင်စီ
