မဲခေါင်၊ မေ ၅
တိုက်ပွဲတွေ ပြင်းထန်နေတဲ့ ရှမ်း-ကရင်နီ နယ်စပ် ပင်လောင်း-ဖယ်ခုံနဲ့ နိုင်ငံတစ်ဝန်းမှာ စစ်ကောင်စီက စစ်ရှောင် စခန်းတွေနဲ့ အရပ်သား ပြည်သူတွေကို ပစ်မှတ်ထား လေကြောင်း တိုက်ခိုက်မှု ပြုလုပ်နေလို့ ပြည်သူတွေ အနေနဲ့ ဗုံးခိုကျင်းတွေ ကြိုတင် ပြုလုပ်ထားဖို့ မိုးဗြဲ PDF က မနေ့က တိုက်တွန်းလိုက်ပါတယ်။
နိုင်ငံတစ်ဝန်း တော်လှန်ရေး အင်အားစုတွေကို အမြစ်ဖြတ်မယ်လို့ စစ်ကောင်စီက ကြုံးဝါးခဲ့ပြီး နောက်ပိုင်း ပြည်သူတွေ နေထိုင်တဲ့ စစ်ရှောင်စခန်းတွေ၊ ကျေးရွာတွေကို လေကြောင်းကသာ မက လက်နက်ကြီးတွေနဲ့ ပစ်ခတ် တိုက်ခိုက်မှုတွေ ဆက်တိုက် ပြုလုပ်နေပါတယ်။
ဒီတိုက်ခိုက်မှုတွေကို ကာကွယ်ဖို့ စစ်ရှောင် ပြည်သူတွေ အနေနဲ့ ဗုံးခိုကျင်းတွေ ကြိုတင် ပြုလုပ်ထားပါက ထိခိုက် သေဆုံးမှုကို လျှော့ချ နိုင်တယ်လို့ ဆီဆိုင်မြို့နယ်က စစ်ဘေးရှောင် ကူညီပေးနေသူ တစ်ဦးက မဲခေါင်သတင်းဌာနကို ပြောပါတယ်။
“စစ်ရှောင်တွေကို စစ်ကောင်စီက လေကြောင်း တိုက်ခိုက်မှုတွေကို ပစ်မှတ်ထား ပြုလုပ်လာချိန်မှာ ဗုံးခိုကျင်းတွေ ကြိုတူးထားတာက အင်မတန်ကို အရေးကြီးပါတယ်။ ဒီလို လုပ်ခြင်းအားဖြင့် စစ်ရှောင် ပြည်သူတွေ လုံခြုံရေးက ၁၀၀ ရာခိုင်နှုန်း မဟုတ်တောင် ၈၀ ရာခိုင်နှုန်းအထိ ကာကွယ်နိုင်မယ်လို့ ကျွန်တော်ကတော့ မြင်ပါတယ်။ လက်ရှိမှာလည်း ကျွန်တော်တို့ စစ်ရှောင်စခန်းတွေမှာ ဗုံးခိုကျင်းတွေ ပြုလုပ်ဖို့ ပြည်သူတွေကို မေတ္တာရပ်ခံပြီး ဆောက်လုပ်ထားပါတယ်” လို့ သူကပြောပါတယ်။
ပြီးခဲ့တဲ့ ဧပြီလ နှောင်းပိုင်းမှာ ဖယ်ခုံမြို့နယ် အတွင်း စစ်ရှောင်တွေနဲ့ ကလေးသူငယ်၊ ကိုယ်ဝန်ဆောင်၊ သက်ကြီးရွယ်အိုတွေကို ကျန်းမာရေး စောင့်ရှောက်မှု ပေးနေတဲ့ ဆောင်းဖွေးဆေးရုံကို တိုက်လေယာဉ်နဲ့ ၃ ကြိမ် ဗုံးကြဲ တိုက်ခိုက်ခဲ့လို့ ဆေးရုံပျက်စီးပြီး ပြည်သူတွေ ထိခိုက်ဒဏ်ရာရခဲ့တယ်လို့ မိုးဗြဲ PDF ကပြောပါတယ်။
ပင်လောင်း-ဖယ်ခုံ တိုက်ပွဲတွေ အတွင်း စစ်ကောင်စီနဲ့ PNO ပူးပေါင်းတပ်တွေဟာ နမ့်နိန်းကျေးရွာ အစုလိုက် အပြုံလိုက် သတ်ဖြတ်မှု အပါအဝင် စာသင်ကျောင်းတွေ၊ ဆေးရုံတွေကို ပစ်မှတ်ထား တိုက်ခိုက်ခဲ့ပါတယ်။
MK-007
#MeKongNews
#မိုးဗြဲ-PDF
#ဗုံးခိုကျင်း
#ဆောင်းဖွေးဆေးရုံ
