မဲခေါင်၊ ဧပြီ ၂၈
ရှမ်းပြည်နယ် တောင်ပိုင်း၊ ပင်လောင်း-ဖယ်ခုံနဲ့ မိုးဗြဲမှာ ဧပြီလ ၂၄ ရက် နဲ့ ၂၆ ရက်က ဖြစ်ပွားခဲ့တဲ့ တိုက်ပွဲတွေ အတွင်း စစ်ကောင်စီတပ်သား ၅၀ ထက်မနည်း သေဆုံးကာ လက်နက်ကြီး၊ လက်နက်ငယ် ၂၆ လက်နဲ့ ခဲယမ်းတွေ ရတယ်လို့ KNDF က ဒီကနေ့ ထုတ်ပြန်လိုက်ပါတယ်။
ပင်လောင်းနဲ့ ဖယ်ခုံ နယ်စပ်၊ မြောက်စလုံးကျေးရွာမှာ တပ်စွဲထားတဲ့ စစ်ကောင်စီ၊ PNO ပူးပေါင်းတပ်တွေကို ကရင်နီ တော်လှန်ရေး အင်အားစုတွေက ဧပြီလ ၂၄ ရက် မနက်ပိုင်းက ဝင်ရောက် တိုက်ခိုက်ရာ တစ်နေကုန် တိုက်ပွဲ ပြင်းထန်ခဲ့တယ်လို့ KNDF ကပြောပါတယ်။
တိုက်ပွဲ အတွင်း စစ်ကောင်စီ၊ PNO ပူးပေါင်းတပ်က်က ၃၀ ထက်မနည်း သေဆုံးပြီး MA-1 ၃ လက် ၊ MA-2 ၃ လက် ၊ MA-3 ၂ လက် ၊ MA-4 ၇၉ တွဲ တစ်လက်၊ MG-3 တစ်လက်၊ RPG 7 တစ်လက်၊ 60 MM စိန်ပြောင်း တစ်လက်၊ ဆက်သွယ်ရေးစက် ၂ လုံးနဲ့ ခဲယမ်းတွေ၊ အသုံးအဆောင် ပစ္စည်းတွေ ရခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အဆိုပါ တိုက်ပွဲကို KA ၊ KNDF၊ PNDF-KK၊ မိုးဗြဲပြည်သူ့ကာကွယ်ရေးတပ်-MBPDF တပ်ရင်း (၂)၊ ကရင်နီ တပ်ပေါင်းစု၊ KGZ၊ KRU၊ URF တို့ ပူးပေါင်း တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေး တပ်သား တစ်ဦး ကျဆုံးခဲ့ရတယ်လို့ KNDF က ဆိုပါတယ်။
အလားတူ ဧပြီလ ၂၆ ရက်နေ့၊ မနက်ပိုင်းက မိုးဗြဲမြို့၊ ညောင်ဝိုင်းရပ်ကွက်အတွင်း တပ်စွဲထားတဲ့ စစ်ကောင်စီ တပ်မ (၆၆) လက်အောက်ခံ၊ ခမရ (၁၀) တပ်ဖွဲ့ကို KNDF၊ မိုးဗြဲ PDF နဲ့ URF တို့ ဝင်ရောက် တိုက်ခိုက်ရာ စစ်သား ၂၀ ဦး သေဆုံးပြီး အရှင် ၂ ဦး ဖမ်းမိကာ MA-1 ၄ လက်၊ MA -2 ၄ လက်၊ MA -3 ၂ လက်၊ MA-4 တစ်လက်၊ RPG-7 တစ်လက်၊ ၆၀ မမ ပြောင်းတို ၂ ပြောင်း ရခဲ့တယ်လို့ KNDF က ပြောပါတယ်။
တိုက်ပွဲအတွင်း စစ်ကောင်စီက တိုက်လေယာဉ်နဲ့ ၄ ကြိမ် လာရောက် ပစ်ခတ်ပေမဲ့ ပြည်သူ့ကာကွယ်ရေး တပ်တွေ ထိခိုက်မှု မရှိခဲ့ဘူးလို့ ဆိုပါတယ်။
ရှမ်းပြည်နယ် တောင်ပိုင်း၊ ဖယ်ခုံမြို့နယ်နဲ့ ပင်လောင်းမြို့နယ် အစပ်ရှိ မြောက်စလုံးကျေးရွာ ကနေ ဧပြီလ ၂၅ ရက်နေ့ကစပြီး စစ်ကောင်စီ၊ PNO ပူးပေါင်းတပ်တွေ ဆုတ်ခွာ ထွက်ပြေးသွားပြီး တောင်မဲသင်းကျေးရွာမှာ တပ်စွဲထားကာ လက်ရှိ စစ်ရေး တင်းမာနေဆဲလို့ ကရင်နီ အမျိုးသား ကာကွယ်ရေးတပ်က ပြောပါတယ်။
MK-007
