မဲခေါင်၊ မတ် ၂၁
တိုက်ပွဲတွေပြင်းထန်နေတဲ့ ရှမ်း-ကရင်နီနယ်စပ်မှာ မတ်လအတွင်း စစ်တပ်က လေကြောင်းတိုက်ခိုက်မှု အကြိမ် ၃၀ ထက်မနည်းပြုလုပ်ခဲ့တယ်လို့ တော်လှန်ရေးအင်အားစုတွေထံက သိရပါတယ်။
စစ်ကောင်စီတပ်က ဖေဖော်ဝါရီ နောက်ဆုံးပတ်ကစပြီး ပင်လောင်း၊ ရှားတော၊ ဒီးမော့ဆိုနဲ့ ဘောလဲမြို့နယ် တို့ကနေ စစ်မျက်နှာ ၄ ခုဖွင့်ပြီး စစ်ကြောင်း ၁၂ ကြောင်းနဲ့ အပြင်းအထန်ထိုးစစ်ဆင်နေတာကြောင့် စစ်တပ်နဲ့ ဒေသတွင်းကာကွယ်ရေးပူးပေါင်းတပ်တို့ကြားတိုက်ပွဲတွေဖြစ်ပွားနေပြီး စစ်တပ်က လေကြောင်းစစ်ကူတွေ အသုံးပြုနေတယ်လို့ KNDF ဗဟိုသတင်းနဲ့ပြန်ကြားရေးတာဝန်ရှိသူက မဲခေါင်သတင်းကိုပြောပါတယ်။
“မတ်လ ၅ ရက်နေ့နောက်ပိုင်းက စပြီး ရဟတ်ယာဉ်တွေ၊ လေယာဉ်တွေသုံးပြီးလာပစ်တယ်။ နေ့တိုင်းလိုလို ၂ ခေါက်၊ ၃ ခေါက်လောက်လာပစ်တယ်။ အကြိမ်ရေက ရေတွက်လို့တောင်မရဘူးတော်တော်ကိုများတယ်။ နေ့တိုင်းလိုလိုလက်နက်ကြီးပစ်တယ်။ တနေကုန်နီးပါးကိုပစ်နေတာ” လို့ သူက မဲခေါင်သတင်းကိုပြောပါတယ်။
ကရင်နီတွင်းက တိုက်ပွဲဖြစ်ပွားရာနေရာတွေကို လေကြောင်းတိုက်ခိုက်မှုတွေအပြင် ဆောင်းပြောင်း၊ ဖယ်ခုံနဲ့ ပင်လောင်းမြို့နယ်တို့မှာ အခြေစိုက်ထားတဲ့ စစ်ကောင်စီတပ်စခန်းတွေကနေ လက်နက်ကြီးတွေ ဆက်တိုက်ပစ်ခတ်နေတယ်လို့သိရပါတယ်။
မတ်လဆန်းပိုင်းမှာ စစ်ကောင်စီတပ်ရဲ့ စစ်ကြောင်းထိုးမှု၊ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုတွေကြောင့် ရှမ်း-ကရင်နီနယ်စပ်ကဒေသခံ ၆,၀၀၀ ကျော် ထပ်ဆင့်စစ်ဘေးရှောင်ခဲ့ရပြီး လတ်တလောဘေးကင်းရာရောက်တဲ့အထိ ထိတ်လန့်နေကြတယ်လို့ စစ်ရှောင်ကူညီသူတွေက ဆိုပါတယ်။
“လက်နက်ကြီးဒဏ်တွေ၊ လေယာဉ်ဗုံးကြဲတဲ့ဒဏ်တွေသူတို့ခံရပြီးတော့ ထိတ်လန့်နေတယ်။ လူတွေကိုအားငယ်တဲ့အကြည့်တွေ၊ အားကိုးတဲ့အကြည့်တွေကို အများစုမြင်တွေ့ရတယ်။ အားနည်းတဲ့ပုံစံမျိုးတွေတွေ့ရတယ်” လို့ စစ်ရှောင်ကူညီနေသူ အမျိုးသားတစ်ဦးက ပြောပြပါတယ်။
လက်နက်ကြီးနဲ့ လေကြောင်းတိုက်ခိုက်တဲ့ရန်က ကာကွယ်ဖို့အတွက် စစ်ရှောင်ရာနေရာ သို့မဟုတ် တောင်စောင်းတွေမှာ အနည်းဆုံးအနက် ၅ ပေနဲ့ လူဦးရေအလိုက်အကျယ်ကိုတူးထားရန်၊ တွင်းထဲအဝင်အထွက်အဆင်ပြေအောင် မြောင်းလုပ်ထားရန်၊ သောက်သုံးရေနဲ့ ရိက္ခာ၊ ဆေးဝါးတွေကိုအသင့်ပြင်ထားရန်၊ တိုက်လေယာဉ်အသံကြားတဲ့အခါ အမြန်ဆုံးပုန်းခိုကြဖို့နဲ့ ထွက်မကြည့်ကြရန်၊ ဟင်းလင်းပြင်တွေကိုထွက်မကြည့်ကြရန်နဲ့ ပိတ်မိနေသူတွေရှိပါက ကူညီတဲ့အဖွဲ့အစည်းတွေကိုဆက်သွယ်ကြဖို့ ကရင်နီပြည်နယ်အတိုင်ပင်ခံကောင်စီ KSCC က သတိပေးနှိုးဆော်ထားပါတယ်။
လက်ရှိမှာ ကရင်နီနဲ့ ရှမ်းနယ်စပ်တွေမှာ တိုက်ပွဲတွေဆက်လက်ပြင်းထန်နေပြီး မနေ့က မတ်လ ၂၀ ရက်မှာလည်း ဒီးမော့ဆိုအနောက်ဘက် ဒီးကျေးအုပ်စု၊ ဒေါငံခါးကျေးရွာမှာ စစ်ကောင်စီတပ်နဲ့ DMO Local PDF၊ KNDF နဲ့ ပူးပေါင်းတပ်ဖွဲ့တို့ မနေ့ကတိုက်ပွဲပြင်းထန်ခဲ့ပြီး စစ်တပ်ဘက်က ၃ ဦးခန့်သေဆုံးနိုင်ပြီး ဒဏ်ရာရရှိသူများပြားခဲ့တယ်လို့ ဒီးမော့ဆို PDF က ထုတ်ပြန်ထားပါတယ်။
MK – 009
#MeKongNews
#ကရင်နီ #ရှမ်းတောင်