မဲခေါင်၊ မတ် ၁၈
ကရင်ပြည်နယ်၊ ကြာအင်းဆိပ်ကြီးမြို့နယ်၊ မကျည်းကလပ်နဲ့ ကော့ကမာကျေးရွာ ကြားမှာ စစ်ကြောင်းထိုး လာတဲ့ စစ်ကောင်စီတပ်နဲ့ ကာကွယ်ရေးတပ်တွေ မတ်လ ၁၅ ရက်က တိုက်ပွဲ ဖြစ်ပွားခဲ့ပြီး စစ်သား ၄၀ ခန့် သေဆုံးရာ အလောင်းတွေကို မြစ်ချောင်းတွေထဲမှာ စွန့်ပစ်ခဲ့တယ်လို့ ARMS-Army Representing Myanmar Society Drone တပ်ဖွဲ့က ဒီကနေ့ ထုတ်ပြန်လိုက်ပါတယ်။
မော်လမြိုင် အခြေစိုက် အရှေ့တောင်တိုင်း စစ်ဌာနချုပ် လက်အောက်ခံ တပ်ရင်း (၅၅၇)၊ (၂၀၈)၊ နဲ့ (၂၀၉) BE မိုင်းရှင်းလင်းရေးတပ်တွေကို ဒုဗိုလ်မှူးကြီးကျော်ဇေယျ ဦးဆောင်ပြီး အင်အား ၂၀၀ ဝန်းကျင်ခန့်နဲ့ ကြာအင်းဆိပ်ကြီးဘက် နယ်မြေ ကျူးကျော် စစ်ကြောင်းထိုးလာတာကြောင့် တိုက်ပွဲ ဖြစ်ပွားခဲ့တာပါ။
ဒီတိုက်ပွဲ အတွင်း စစ်ကောင်စီတပ်သား ၄၀ ခန့်သေပြီး စစ်သား အလောင်းတွေကို လူသားဆန်ဆန် ပြန်မသယ်သွားဘဲ မြစ်ချောင်းတွေထဲမှာ စွန့်ပစ်ထားခဲ့တယ်လို့ ဆိုပါတယ်။
တိုက်ပွဲနဲ့ ပတ်သက်တဲ့ အသေးစိတ် အချက်အလက်တွေကိုတော့ မဲခေါင်သတင်း အနေနဲ့ ဆက်သွယ် မေးမြန်းနေဆဲ ဖြစ်ပါတယ်။
အဆိုပါ တိုက်ခိုက်ပွဲကို Lion Battalion Commando Special Force စစ်ကြောင်း၊ KNU/KNLA ၊ PDF ပူးပေါင်းစစ်ကြောင်းတွေ၊ ARMS-Army Representing Myanmar Society Drone တပ်ဖွဲ့ နဲ့ SDDF-Saw Dragon Drone Force တပ်ဖွဲ့တို့ ပူးပေါင်း တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေးတပ်ဘက်က အထိအခိုက် မရှိဘူးလို့ ဖော်ပြထားပါတယ်။
လက်ရှိ တိုက်ပွဲဖြစ်ပွားရာ နေရာ အနီးတစ်ဝိုက်ကို နယ်မြေ ရှင်းလင်းရေး လုပ်နေတာကြောင့် ပြည်သူတွေ အနေနဲ့ သတိထား သွားလာကြဖို့ ထုတ်ပြန်ချက်မှာ ဖော်ပြထားပါတယ်။
MK-007