မဲခေါင်၊ ဖေဖော်ဝါရီ ၂၆
ရှမ်းပြည်(တောင်ပိုင်း) ဒေသခံတော်လှန်ရေးတပ်ပေါင်းစု – S.S.L.R.U ရဲ့ ချိုးဖြူတပ်ဖွဲ့ – J.P.G.F (တပ်ခွဲ-၃)က ရဲဘော်လုရီ အသက်(၃၀)နှစ်ဟာ ဆိုင်ကယ်ပေါ်ကပြုတ်ကျတဲ့ဒဏ်ရာနဲ့ ဖေဖော်ဝါရီ ၂၅ရက် မနေ့ကကွယ်လွန်သွားတယ်လို့ ချိုးဖြူတပ်ဖွဲ့ထံကနေသိရပါတယ်။
ကွယ်လွန်သွားတဲ့ရဲဘော်ဟာ အတက်ရောဂါရှိသူဖြစ်ပြီး လွန်ခဲ့တဲ့ ၁၀ရက်ခန့်က ဆိုင်ကယ်စီးရင်း တက်ပြီး ဆိုင်ကယ်ပေါ်က ပြုတ်ကျတာကြောင့် ဦးခေါင်းဒဏ်ရာရခဲ့တာဖြစ်တယ်လို့ ချိုးဖြူတပ်ဖွဲ့တာဝန်ရှိသူတစ်ဦးက မဲခေါင်ကို ပြောပါတယ်။
“ဆိုင်ကယ်ပေါ်က ပြုတ်ကျတော့ဦးခေါင်းဒဏ်ရာရတယ်။ အဲဒီဒဏ်ရာကို ဆေးပေးခန်းမှာကုပြီးပြန်ဆင်းလာ တော့လည်း သိပ်ပြီးမသက်သာဘူး။ အဲဒါနဲ့ နောက်တစ်ရက်၊ ၂ရက်နေတော့ ဆေးပေးခန်းကို ပြန်တက်ရတယ်။ အဲဒါနဲ့ပဲ မနေ့(ဖေဖော်ဝါရီ ၂၅) မနက်ပိုင်းမှာ ဆုံးသွားတာပါ” လို့ သူကပြောပါတယ်။
ကွယ်လွန်သွားတဲ့ ရဲဘော်ရဲ့ ဈာပနာကို ဖေဖော်ဝါရီ ၂၆ရက် ဒီနေ့မှာ ကျင်းပပြုလုပ်တယ်လို့ SSLRU က ထုတ်ပြန်ထားပါတယ်။
“ကျွန်ုပ်တို့ ရှမ်းပြည်(တောင်ပိုင်း) ဒေသခံတော်လှန်ရေးတပ်ပေါင်းစု – S.S.L.R.U မှ ရဲဘော်လုရီအား နွေဦးတော်လှန်ရေး ၏ အာဇာနည်သူရဲကောင်း အဖြစ် အစဉ်ထာဝရ အသိမှတ်ပြု မှတ်ကျောက်တင် ဂုဏ်ပြုရင်း ရဲဘော် နှင့် တိုင်းရင်းသားပြည်သူလူထုတို့ လိုလားတောင်းတနေသော စစ်မှန်သော ဖက်ဒရယ် ဒီမိုကရေစီ ပြည်ထောင်စု မရမချင်း ဆက်လက်၍ တိုက်ပွဲဝင်တော်လှန် သွားမည်ဟု ကတိသစ္စာ အဓိဌာန် ပြုပါသည်” SSLRU ၏ ထုတ်ပြန်ချက်မှာ ဖော်ပြထားပါတယ်။
MK – 004
#MeKongNews
