မဲခေါင်၊ ဖေဖော်ဝါရီ ၂၆
ရန်ကုန်တိုင်း၊ ကမာရွတ်မြို့နယ် ၊ အမှတ်(၁) ရပ်ကွက်၊ သန္တာလမ်းရှိ လုံးချင်းနေအိမ်တစ်လုံးကို စစ်ကောင်စီက စစ်ကားတစ်စီး၊ ရဲကားတစ်စီးနဲ့ လာရောက်ခဲ့ပြီး နေအိမ်တိုက်လုံးချင်းအိမ်ကို ချိတ်ပိတ်သွားတယ်လို့ ဒေသခံတွေက မဲခေါင် သတင်းဌာနကို ပြောပါတယ်။
ဖေဖော်ဝါရီ ၂၅ ရက်နေ့ နေ့လည် ၁ နာရီကျော်အချိန်က စစ်ကောင်စီတပ်တွေရောက်ရှိလာပြီးနောက် နေအိမ်ကို ချိတ်ပိတ်ပြီး ဗီနိုင်းစာရွက်လာကပ်သွားတာဖြစ်တယ်လို့ မျက်မြင်တွေ့သူတစ်ဦးကပြောပါတယ်။
“ နိုင်ငံရေးလုပ်တဲ့အိမ်တော့မဟုတ်ဘူး။ အဲ့တိုက်ကိုပိုင်တာ ထွေအုပ်ထဲကအကောင်ကြီးကြီးတစ်ယောက်လို့ကြားတယ်။ အဂတိအမှုနဲ့ငြိလို့လာပြီးချိတ်ပိတ်သွားတယ်လို့ကြားတယ်။ တိတိကျကျတော့ဘယ်သူမှသေချာမသိကြဘူး။ သေချာတာကတော့နိုင်ငံရေးလုပ်တဲ့အိမ်တော့မဟုတ်ဘူး” လို့ သူကပြောပါတယ်။
ကမာရွတ်မြို့နယ်အတွင်း စစ်ကောင်စီကနေ့စဥ် လှည့်ကင်းပတ်ကင်းများနဲ့ လှည့်လည်စစ်ဆေးနေပြီး လှည်းတန်းမီးပွိုင့်နဲ့ စံရိပ်ငြိမ်မှတ်တိုက်အနီးတွင် စစ်ကားများရပ်တန့်ကာ လမ်းသွားလမ်းလာများကို မကြာခဏစစ်ဆေးတတ်ပြီး လူငယ်များကိုလည်း ဖမ်းဆီးတတ်တယ်လို့ ဒေသခံတွေကပြောပါတယ်။
အမှတ် ၆ ရပ်ကွက် ပြည်ရိပ်မွန်အိမ်ရာ၊ မြို့နယ်ထွေအုပ်ရုံးနောက်ဘက်ရှိ အမျိုးသားအဆောင်တိုက်ခန်းကို ဖေဖော်ဝါရီ ၂၅ ရက် ည ၁၀ နာရီ ဝန်းကျင်က စစ်ကောင်စီ တပ်ဖွဲ့ဝင်တွေဝင်ရောက်ရှာဖွေစစ်ဆေးခဲ့ပြီး အခြားတိုက်ခန်းများကို ဓာတ်မီးနဲ့ထိုးကာ ထွက်မကြည့်ဖို့အော်ပြောနေခဲ့တယ်လို့ ဒေသခံတွေကပြောပါတယ်။
MK-005