မဲခေါင်၊ ဖေဖော်ဝါရီ ၁၁

၁၉၄၇ ခုနှစ် ဖေဖော်ဝါရီလ ၁၂ ရက်နေ့မှာ ချုပ်ဆိုခဲ့တဲ့ ပင်လုံစာချုပ်ပါ ကတိကဝတ်တွေကို အကောင်အထည် ဖော်မှသာ လက်ရှိ နိုင်ငံရေး အကျပ်အတည်းကို ဖြေရှင်းနိုင်မယ်လို့ မကြာခဏ ပြောကြားလေ့ရှိတဲ့ ရှမ်းပြည် ပြန်လည်ထူထောင်ရေးကောင်စီ-RCSS ခေါင်းဆောင် ဗိုလ်ချုပ်ကြီး ဝဏ္ဏကျော်ထင် ယွက်စစ် ဟာ ဒီကနေ့ မွန်းလွဲပိုင်းက တာချီလိတ်မြို့ကနေ လေကြောင်းနဲ့ နေပြည်တော်ကို သွားရောက်ခဲ့တယ်လို့ သိရပါတယ်။

မနက်ဖြန်မှာ စစ်ကောင်စီက ဦးဆောင် ကျင်းပမယ့် ပင်လုံစာချုပ် ချုပ်ဆိုခဲ့တဲ့ (၇၆) နှစ်မြောက် ပြည်ထောင်စုနေ့ အခမ်းအနား တက်ရောက်ဖို့ အတွက် ဗိုလ်ချုပ်ကြီးယွက်စစ်နဲ့ အဖွဲ့သားတွေဟာ တာချီလိတ်ကနေ နေပြည်တော်ကို တပ်မတော် အထူးလေယာဉ်နဲ့ ထွက်ခွာသွားတာ ဖြစ်ပါတယ်။

ပင်လုံ ကတိကဝတ်၊ ပင်လုံ စိတ်ဓာတ်နဲ့ ပင်လုံစာချုပ်ပါ သဘောတူညီချက်များကို အကောင်အထည်ဖော်ပြီး အနာဂတ် ဖက်ဒရယ် ပြည်ထောင်စု တည်ဆောက်ခြင်းကသာ လက်ရှိ နိုင်ငံရေး အကျပ်အတည်းကို ဖြေရှင်းနိုင်မယ်လို့ ဖေဖော်ဝါရီ ၇ ရက်နေ့မှာ ကျရောက်တဲ့ ရှမ်းပြည်အမျိုးသားနေ့မှာ RCSS က ထုတ်ပြန်ထားပါတယ်။

စစ်ခေါင်းဆောင် မင်းအောင်လှိုင် ချီးမြှင့်ထားတဲ့ ဝဏ္ဏကျော်ထင် ဘွဲ့ရ ဗိုလ်ချုပ်ကြီး ယွက်စစ် ဟာ ပြီးခဲ့သည့် ဇန်နဝါရီလ နှောင်းပိုင်းက နေပြည်တော် သွားရောက်ခဲ့စဉ်ကလည်း ပင်လုံစာချုပ်ကို အကောင်အထည် ဖော်ပေးဖို့ စစ်ခေါင်းဆောင်တွေကို တိုက်တွန်းခဲ့ပါသေးတယ်။

#MeKongNews

#RCSS

#ပင်လုံစာချုပ်

#ဗိုလ်ချုပ်ကြီးယွက်စစ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)