မဲခေါင်၊ ဖေဖော်ဝါရီ ၇
ပြည်ထောင်စုသမ္မတ မြန်မာနိုင်ငံတော်၊ အမျိုးသား ညီညွတ်ရေး အစိုးရ၊ နိုင်ငံခြားရေးဝန်ကြီး ဒေါ်ဇင်မာအောင် နဲ့ ယူကေနိုင်ငံ Labor Party မှ လွှတ်တော်အမတ် Rushanara Ali တို့ မနေ့က ယူကေ စံတော်ချိန် မနက် ၁၁ နာရီခွဲမှ နေ့လည် ၁ နာရီအထိ မြန်မာ့အရေး တွေ့ဆုံဆွေးနွေးခဲ့တယ်လို့ သိရပါတယ်။
ဒေါ်ဇင်မာအောင်ရဲ့ ယူကေ ခရီးစဉ်အတွင်း ယူကေ နိုင်ငံခြားရေးဝန်ကြီး ဂျိမ်းစ် ကလီဗာလေနဲ့ မနေ့က တွေ့ဆုံခဲ့သလို အတိုက်အခံ လေဘာပါတီ အမတ် Rushanara Ali နဲ့လည်း တွေ့ဆုံဆွေးနွေးခဲ့တာပါ။
All Party Parliamentary Group on Burma အဖွဲ့ရဲ့ ဥက္ကဋ္ဌ လည်းဖြစ်သူ Rushanara Ali နဲ့ ဆွေးနွေးမှုအတွင်း လူသားချင်းစာနာ ထောက်ထားမှုဆိုင်ရာ အကူအညီပေးရေး၊ မြန်မာ့နွေဦးတော်လှန်ရေး UK ပါလီမန်မှ ပိုမိုတိုးမြှင့်ထောက်ခံရေး၊ ဒုက္ခသည်ကိစ္စ၊ လူနည်းစုအခွင့်အရေး အကာအကွယ်ပေးရေး အစရှိတဲ့ ခေါင်းစဉ်တွေကို ဆွေးနွေးခဲ့တာပါ။
တွေ့ဆုံပွဲသို့ ယူကေနိုင်ငံဆိုင်ရာ ကိုယ်စားလှယ်တွေဖြစ်တဲ့ ဒေါက်တာသက်ကိုကိုနဲ့ ဦးမောင်မောင်အောင် တို့လည်း တက်ရောက်ခဲ့ကြတယ်လို့ သိရပါတယ်။
ဖေဖော်ဝါရီ ၄ ရက်နေ့ကလည်း ယူကေရောက် မြန်မာကွန်မြူနတီနဲ့ West minster University မှာတွေ့ဆုံခဲ့ပြီး အဲ့ဒီပွဲကို ယူကေရောက် မြန်မာပြည်ဖွား တိုင်းရင်းသား၂၅၀ ခန့်တက် ရောက်ခဲ့ ကြပါတယ်။
ဒေါ်ဇင်မာအောင်ဟာ ယူကေခရီးစဉ် အပြီးမှာ အမေရိကန်နိုင်ငံသို့ ခရီးဆက်ဖို့ရှိပြီး ဖေဖော်ဝါ ၁၁ ရက်နေ့မှာ ကုလသမဂ္ဂဆိုင်ရာ အမြဲတမ်း ကိုယ်စားလှယ် သံအမတ်ကြီး ဦးကျော်မိုးထွန်း၊ NUG ဒုတိယနိုင်ငံခြားရေးဝန်ကြီး ဦးမိုးဇော်ဦးတို့နဲ့ အတူ နယူးယောက်ရှိ မြန်မာမိသားစုနဲ့လည်း တွေ့ဆုံဖို့ စီစဉ်ထားပါတယ်။
ပြည်ထောင်စုဝန်ကြီးဒေါ်ဇင်မာအောင်ဟာ ယူကေ ခရီးစဉ်အတွင်း အခြားတာဝန်ရှိသူတွေနဲ့လည်း ဆက်လက် တွေ့ဆုံ ဆွေးနွေးသွားမှာ ဖြစ်တယ်လို့ အမျိုးသား ညီညွတ်ရေး အစိုးရ၊ နိုင်ငံခြားရေးဝန်ကြီးဌာနက ထုတ်ပြန်ထားပါတယ်။
MK-003
#MeKongNews #ယူကေနိုင်ငံ #ဒေါ်ဇင်မာအောင် #NUG
