မဲခေါင်၊ ဖေဖော်ဝါရီ ၃
ကရင်ပြည်နယ်၊ တပ်မဟာ (၅) နယ်မြေရှိ စစ်ကောင်စီ ရှေ့တန်းတပ်စခန်းဖြစ်တဲ့ ကဟီးကျိုးစခန်းကို ကုန်းကြောင်းနဲ့ စားနပ်ရိက္ခာ သယ်ယူပို့ဆောင်မှု မပြုနိုင်တော့လို့ လေကြောင်းအသုံးပြုကာ စားနပ်ရိက္ခာတွေ လာရောက်ပို့ဆောင်စဉ် တိုက်လေယာဉ်တွေနဲ့ ဗုံးသီးကြဲချခဲ့တယ်လို့ သိရပါတယ်။
ဇန်နဝါရီလ ၃၁ ရက်နေ့ မနက် ၁၁ နာရီမှာ စစ်ကောင်စီက လေကြောင်းအသုံးပြုကာ စားနပ်ရိက္ခာတွေ လာရောက်ပို့ဆောင်စဉ် အခြား ဂျက်တိုက်လေယာဉ် ၂ စီးမှ ပြည်သူတွေ နေထိုင်ရာ နားမိုး-ဆောဘွဲဒဲဒေသမှာ ဗုံးသီး ၂ လုံးကြဲချခဲ့သလို ဘောကော်ဒဲ ဒေသတွင်းရှိ အများပြည်သူတွေ လုပ်ကိုင်စားသောက်ရာ လယ်ယာ၊ ဉယဉ်ခြံမြေတွေ အတွင်းသို့ ဗုံးသီး ၂ လုံး တပြိုင်တည်း ကြဲချခဲ့တာပါ။
အဲဒီနေ့ မွန်းလွဲ ၂ နာရီ ၄ မိနစ်မှာ စစ်ကောင်စီတပ်ရဲ့ ရိက္ခာ သယ်ယူပို့ဆောင်ရေး လေယာဉ် ၃ စီး ကဟီးကျိုးစခန်း အတွက် စားနပ်ရိက္ခာ လာရောက်ပို့ဆောင်ရာမှာ တစ်စီးက ရိက္ခာတွေ ကြဲချပြီး ကျန် ၂ စီးက နားမိုး-ဆောဘွဲဒဲဒေသနဲ့ ဘောကော်ဒဲဒေသရှိ လယ်ယာ၊ ဉယာဉ်ခြံမြေတွေ အတွင်းသို့ ဗုံး ၄ လုံး ထပ်မံ ကြဲချခဲ့ပေမယ့် ပြည်သူ ထိခိုက်သေဆုံးမှုတော့ မရှိဘူးလို့ သိရပါတယ်။
တပ်မဟာ (၅) ထိန်းချုပ်နယ်မြေ အတွင်းမှာ စစ်ကောင်စီတပ်က အရပ်သားပစ်မှတ်တွေကို လေကြောင်းမှ မကြာခဏ ဗုံးကြဲတိုက်ခိုက်နေရာ ဇန်နဝါရီလအတွင်း ပြည်သူ ၅ ဦးနဲ့အထက် သေဆုံးမှု ၂ ကြိမ် ရှိခဲ့ပါတယ်။
ဇန်နဝါရီလ ၁၂ ရက်က မူတြော်ခရိုင်၊ လူသောမြို့နယ်၊ ပေးကေးအုပ်စု လေးဝါးရွာအတွင်း စစ်ကောင်စီတပ်က တိုက်လေယာဉ် ၄ စီးနဲ့ ဗုံး ၈ လုံး ကြဲချတိုက်ခိုက်ခဲ့ရာ ဓမ္မဆရာတွေနဲ့ ၃ နှစ်အရွယ် ကလေးငယ် အပါအဝင် ပြည်သူ ၅ ဦး သေဆုံးခဲ့တယ်လို့ သိရပါတယ်။
ဒါ့အပြင် အခြားပြည်သူ ၅ ဦးနဲ့ ကျွဲ၊ နွားတွေ ထိခိုက်ဒဏ်ရာရရှိကာ ဘုရားကျောင်း ၃ ကျောင်း၊ စာသင်ကျောင်း ၂ ကျောင်းနဲ့ နေအိမ် ၂၁ လုံးတို့ ထိမှန်ပျက်စီးခဲ့ပါတယ်။
အဲဒီနေ့မှာပဲ စစ်ကောင်စီက ဘူးသို့မြို့နယ်ရှိ လာဂေါ်ဒန်းကျေးရွာကို တိုက်လေယာဉ်တွေနဲ့ ဗုံး ၆ လုံးကြဲချခဲ့ရာ သားမိ ၂ ဦး ထိခိုက်ဒဏ်ရာ ရရှိခဲ့ပြီး နေအိမ် ၂ လုံး ထိခိုက်ပျက်စီးခဲ့ပါတယ်။
အလားတူ ဇန်နဝါရီ ၇ ရက်နေ့က ဒွဲ့လိုးမြို့နယ်မှာ နေရာ ၇ နေရာကို တိုက်လေယာဉ်တွေနဲ့ ဗုံးကြဲ တိုက်ခိုက်ခဲ့ရာ ရွှေတူးဖော်နေတဲ့ လုပ်ငန်းရှင် မိသားစုနဲ့ အလုပ်သမား စုစုပေါင်း ပြည်သူ ၆ ဦး သေဆုံးခဲ့တယ်လို့ သိရပါတယ်။
ပုံစာ- ဇန်နဝါရီလ ၁၂ ရက်က တိုက်လေယာဉ်နဲ့ ဗုံးကြဲမှုကြောင့် လူသောမြို့နယ်၊ ပေးကေးအုပ်စု လေးဝါးရွာမှ နေအိမ်အဆောက်အအုံတွေ ပျက်စီးခဲ့တာကို တွေ့ရစဉ်။
MK-003
#MeKongNews
#ဗုံးသီး
#တပ်မဟာ(၅)
#တိုက်လေယာဉ်
