မဲခေါင်၊ ဇန်နဝါရီ ၁၉
စစ်ကောင်စီတပ်မှ ကျေးရွာတွေ အတွင်း လက်နက်ကြီးနဲ့ ပစ်ခတ်တာကြောင့် အရပ်သားပြည်သူ ၂,၅၆၆ ဦး ထွက်ပြေး တိမ်းရှောင်နေရတယ်လို့ ကရင်အမျိုးသား အစည်းအရုံး-KNU က ဒီကနေ့ ထုတ်ပြန်ပါတယ်။
ကရင်အမျိုးသား အစည်းအရုံး၊ ကော်သူးလေ အုပ်ချုပ်နယ်မြေ၊ ညောင်လေးပင်ခရိုင် တပ်မဟာ (၃)၊ ကျောက်ကြီးမြို့နယ်မှာ ဇန်နဝါရီလ ၃ ရက်နေ့မှ ၁၇ ရက်နေ့အထိ ၁၅ ရက်အတွင်း စစ်ကောင်စီတပ် တွေက အရပ်သား ပြည်သူတွေ နေထိုင်ရာ ကျေးရွာတွေ အတွင်းသို့ ရည်ရွယ်ချက်ရှိရှိ လက်နက်ကြီးနဲ့ ပစ်ခတ်ခဲ့တာပါ။
၁၅ ရက်အတွင်း လက်နက်ကြီး စုစုပေါင်း ၃၁ လုံး ပစ်ခတ်ခဲ့တာကြောင့် အရပ်သား ပြည်သူလူထုရဲ့ နေအိမ် ၂ လုံးနဲ့ ထင်းပုံတစ်ပုံ ပျက်စီးခဲ့ရပြီး ပြည်သူ တစ်ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
လက်နက်ကြီးနဲ့ ပစ်ခတ်တဲ့ စစ်ကောင်စီတပ်တွေကတော့ ညောင်လေးပင်ခရိုင်မှာ တပ်စွဲထားတဲ့ ခလရ (၁၂၄)၊ ခလရ (၆၀)၊ ခမရ (၃၅၁)နဲ့ ခမရ (၄၃၉) တို့ဖြစ်တယ်လို့ သိရပါတယ်။
စစ်ကောင်စီတပ်တွေက ခလယ်တူရယ်ကျေးရွာ အတွင်းသို့ လက်နက်ကြီး ၉ လုံး၊ ဃဲဒဲကျေးရွာ အတွင်းသို့ ၄ လုံး၊ ပကော်ခီးကျေးရွာမှာ ၂ လုံး၊ ကျို့ကုန်းကျေးရွာမှာ ၂ လုံး၊ သရေးစီလော်ကျေးရွာမှာ ၂ လုံး၊ မတောကူးကျေးရွာမှာ ၅ လုံး၊ သေဂေါ်ဒဲကျေးရွာမှာ ၄ လုံးနဲ့ ရွှေပေါက်ကံမှာ ၃ လုံး စုစုပေါင်း ကျေးရွာ ၈ ရွာအတွင်းသို့ လက်နက်ကြီး ၃၁ လုံး ပစ်ခတ်ခဲ့တာလို့ သိရပါတယ်။
လက်နက်ကြီး ပစ်ခတ်မှုကြောင့် သရေးစီလော်ကျေးရွာ အတွင်ရှိ နော်ခင်မြရဲ့ နေအိမ်နဲ့ ထင်းပုံ မီးလောင်ပြာကျခဲ့ပြီး ခလယ်တူရယ်ကျေးရွာမှ စောဘီရဲ့ နေအိမ် ပျက်စီးကာ သေဂေါ်ဒဲကျေးရွာရှိ အသက် ၁၆ နှစ်အရွယ် နော်စုမေဖော ထိခိုက်ဒဏ်ရာ ရရှိခဲ့တယ်လို့ KNU ဗဟိုက ထုတ်ပြန်ထားပါတယ်။
MK-003
