မဲခေါင်၊ ဇန်နဝါရီ ၁၇
စစ်အုပ်စုရဲ့ ဆိုးရွားတဲ့ လေကြောင်း တိုက်ခိုက်မှုတွေ အတွက် လေကြောင်း ပိုင်နက်တွေ အသုံးပြုခွင့် မပေးဖို့ အိမ်နီးချင်းနိုင်ငံတွေကို အမျိုးသား ညီညွတ်ရေး အစိုးရ-NUG၊ နိုင်ငံခြားရေးဝန်ကြီးဌာနက ဒီနေ့ ရက်စွဲနဲ့ ကြေညာချက်ထုတ်ပြန် တောင်းဆိုလိုက်ပါတယ်။
မြန်မာနိုင်ငံရဲ့ အိမ်နီးချင်းနိုင်ငံတွေ အနေနဲ့ စစ်အုပ်စုရဲ့ ဆိုးရွားတဲ့ လေကြောင်း တိုက်ခိုက်မှုတွေ အတွက် မိမိတို့ရဲ့ လေကြောင်း ပိုင်နက်တွေ အသုံးပြုခွင့် မပေးဖို့ တောင်းဆိုလိုက်တာပါ။
ဇန်နဝါရီလ ၁၀ နဲ့ ၁၁ ရက်နေ့တွေမှာ ချင်းအမျိုးသားတပ်ဦး-CNF ဗဟိုဌာနချုပ် တည်ရှိရာ အိန္ဒိယ-မြန်မာ နယ်စပ်ရှိ Camp Victoria ကို စစ်အုပ်စုက ဂျက်တိုက် လေယာဉ်တွေနဲ့ ဗုံးကြဲတိုက်ခိုက်ခဲ့ရာ အရပ်သား အများအပြား ထိခိုက် ဒဏ်ရာရ သေကြေခဲ့ရသလို လူနေအိမ် ၃ လုံးနဲ့ နေ့စဉ်ဝန်ဆောင်မှု ပေးနေတဲ့ ဒေသန္တရ ဆေးကုသဆောင် အပါအဝင် အရပ်ဘက် အခြေခံ အဆောက်အအုံတွေ ပျက်စီးခဲ့တယ်လို့ ဖော်ပြပါတယ်။
ဒီတိုက်ခိုက်မှုမှာ အိမ်နီးချင်း အိန္ဒိယနိုင်ငံရဲ့ လေပိုင်နက်ထဲသို့ ကျူးကျော်ဝင်ရောက် အသုံးချခဲ့တယ်လို့ ချင်းအမျိုးသားတပ်ဦးမှ ပေးပို့တဲ့ သတင်းတင်ပြချက်တွေအရ သိရှိရပြီး အခြားသော မြေပြင် သတင်းရင်းမြစ်တွေအရလည်း စစ်အုပ်စုရဲ့ ဗုံးကြဲမှု တွေက အိန္ဒိယ ပိုင်နက် အတွင်းကို ကျရောက်နေတာ သိရှိရတယ်လို့ ဖော်ပြထားပါတယ်။
စစ်အုပ်စုဟာ အိမ်နီးချင်း နိုင်ငံတွေရဲ့ လေပိုင်နက်တွေကို ကျူးကျော် အသုံးပြုပြီး ရမ်းကား တိုက်ခိုက်မှုတွေ ကျူးလွန်တာက ပထမဆုံး အကြိမ် မဟုတ်ဘဲ အခြား အိမ်နီးချင်း နိုင်ငံတွေဖြစ်တဲ့ ထိုင်းနဲ့ ဘင်္ဂလားဒေ့ရှ်နိုင်ငံ တွေရဲ့ လေပိုင်နက်တွေ ကိုလည်း ကျူးကျော် အသုံးပြုခဲ့တဲ့ အစဉ်အလာတွေ ဖြစ်ပေါ်ခဲ့တာကို တွေ့ရှိခဲ့ရပြီး ဖြစ်တယ်လို့ အမျိုးသား ညီညွတ်ရေး အစိုးရရဲ့ ထုတ်ပြန်ချက်မှာ ဖော်ပြထားပါတယ်။
ဒီလို အခြေအနေတွေက ဒေသတွင်းလုံခြုံရေး၊ တည်ငြိမ်ရေးနဲ့ ပြည်သူတို့ရဲ့ အသက်အိုးအိမ်တွေ ဘေးကင်း လုံခြုံရေးကို ရှေးရှုပြီး မြန်မာပြည်သူတို့ရဲ့ အိမ်နီးချင်း နိုင်ငံတွေ အနေနဲ့ မိမိတို့ရဲ့ လေပိုင်နက်တွေကို အသုံးပြုပြီး မြန်မာ ပြည်သူတွေကို လေကြောင်းမှ အကြမ်းဖက် တိုက်ခိုက်နေတာတွေ ကျူးလွန်နေတဲ့ စစ်အုပ်စုရဲ့ လုပ်ရပ်တွေကို ခွင့်မပြုဖို့ အမျိုးသား ညီညွတ်ရေး အစိုးရက မေတ္တာရပ်ခံ တောင်းဆိုထားပါတယ်။
အဲဒီ တောင်းဆိုမှုက အရပ်သားတွေနဲ့ အများပြည်သူပိုင် အဆောက်အအုံတွေကို တိုက်ခိုက်တာကို ဆန့်ကျင် ရှုံ့ချထားတဲ့ ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်အမှတ် (၂၆၆၉) အရ ဖြစ်ပြီး အဲဒီဆုံးဖြတ်ချက်မှာ အကြမ်းဖက်လုပ်ရပ်တွေ လုပ်ဆောင်နေတာကို ချက်ချင်း ရပ်တန့်ဖို့နဲ့ အကြမ်းဖက်လုပ်ရပ်တွေ ဆက်လက် ဖြစ်ပေါ်နေတာကို တားဆီးဟန့်တားဖို့ တောင်းဆိုတဲ့ အချက် တွေလည်း ပါဝင်တယ်လို့ အမျိုးသား ညီညွတ်ရေး အစိုးရ၊ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။
MK-003
