မဲခေါင်၊ ဇန်နဝါရီ ၁၄
စစ်ကိုင်းတိုင်း၊ ကန့်ဘလူမြို့နယ်၊ ငါးမြောင်ကျေးရွာမှာ အမျိုးသား ဒီမိုကရေစီ အဖွဲ့ချုပ်-NLD ကို ထောက်ခံတဲ့ မိသားစုဝင် ၈ ဦး နေအိမ်မှာ အသတ်ခံခဲ့ရပြီး အဲ့ဒီထဲမှာ ကလေး ၃ ဦး ပါဝင်တယ်လို့ ဒေသခံတွေက ပြောပါတယ်။
မနေ့က ဇန်နဝါရီ ၁၃ ရက် ညပိုင်း ငါးမြောင်ရွာမှာ နေထိုင်တဲ့ ဖခင်ဖြစ်သူ ဦးကျော်လှိုင်ရဲ့ နေအိမ်မှာ မိသားစုဝင် အားလုံး ဓားဒဏ်ရာတွေနဲ့ အသတ်ခံခဲ့ရတာကို တွေ့ရတယ်လို့ ဒေသခံတွေက ဆိုပါတယ်။
“မနေ့ညက MEC သကြားစက်က စစ်ခွေး၊ ပျူခွေးတွေက ၉ နာရီလောက်မှာ ဇီးကုန်း-မလယ် လမ်းတလျှောက် ထန်းတပင်နားလေးမှာ သေနတ်တွေကို တိုက်ပွဲဖြစ်တဲ့ ပုံစံမျိုး အတင်း ပစ်ဖောက်ကြတယ်ဗျ။ ပစ်ဖောက်ပြီးတော့ ဘယ်သူမှလည်း မထွက်ရဲဘူး။ မနက်လင်းတော့ ငါးမြောင်ရွာက အဲ့ဒီ မိသားစု ၈ ဦး အသတ်ခံရတယ်လို့ ကြားရတယ်။ မနက် ၆ နာရီခွဲလောက်မှာ သိရတာ” လို့ ငါးမြောင်ရွာအနီး နေထိုင်တဲ့ ဒေသခံ တစ်ဦးက မဲခေါင်သတင်းကို ပြောပါတယ်။
အသတ်ခံရ သူတွေဟာ ဖခင်ဖြစ်သူ ဦးကျော်လှိုင် ၇၀ နှစ်၊ မိခင် ဒေါ်မဲညွှန့် ၆၅ နှစ်၊ သမီးဖြစ်သူ ဒေါ်နှင်းမြလှိုင် ၄၀ နှစ်နဲ့ ဇီးကုန်း-မလယ် ကားလမ်းဘေးမှာ နေထိုင်တဲ့ ဒေါ်နှင်းမြခိုင် ၃၇ နှစ်၊ သားမက် ဦးမျိုးဝင်း ၃၇ နှစ် အပါအဝင် ညီအစ်မ ၂ ဦးရဲ့ သားသမီးတွေဖြစ်တဲ့ မစုမြစံ ၁၅ နှစ်၊ မရွှေဘုံစံ ၁၂ နှစ်နဲ့ မောင်ခန့်ဇေယျာမျိုး ၅ နှစ်တို့ ပါဝင်တယ်လို့ သိရပါတယ်။
“သူ့မိဘနှစ်ပါးရော သူတို့မိသားစု ၄ ယောက်ရော၊ သူ့အစ်မ သားအမိ ၂ ယောက်ရော စုစုပေါင်း ၈ ယောက် အသတ်ခံလိုက်ရတာ။ အိမ်ကို ရိုက်ဖွင့်ပြီးတော့ ဓားတွေနဲ့ ခုတ်သွားတယ်လို့ ကြားပါတယ်။ ငါးမြောင် တရွာလုံးမှာ ပြည်ခိုင်ဖြိုး ထောက်ခံတဲ့သူချည်းပဲ။ သူတို့မိသားစုပဲ NLD ထောက်ခံတာ။ သူတို့ဘာသာ အေးအေးဆေးဆေးပဲ နေထိုင်ပြီး အရောင်းအဝယ်ပဲ လုပ်စားကြတယ်။ သူတို့မှာ ကြောက်လို့ မိဘအိမ် သွားအိပ်ကြတာ” လို့ ငါးမြောင်ရွာအနီးမှာနေတဲ့ ဒေသခံက ဆက်ပြောပါတယ်။
ဦးကျော်လှိုင် မိသားစုဟာ ၂၀၂၀ ရွေးကောက်ပွဲ အတွက် NLD ပါတီ မဲဆွယ်ရာမှာ လှုပ်ရှားခဲ့သူတွေ ဖြစ်ပေမယ့် အာဏာသိမ်းပြီးနောက်ပိုင်း နိုင်ငံရေး ကိစ္စတွေ မလုပ်တော့ဘဲ စီးပွားရေးကိုသာ လုပ်ကိုင်နေတဲ့ မိသားစု ဖြစ်တယ်လို့ ဆိုပါတယ်။
ငါးမြောင်ရွာ ဝန်းကျင်မှာ တိုက်ပွဲဖြစ်တာ မရှိဘဲ အရင်ရက်တွေက ရွာနားမှာရှိတဲ့ ကန့်ဘလူ MEC သကြားစက်က စစ်သားတွေနဲ့ ပျူစောထီးတွေ သေနတ်ပစ်ဖောက်လေ့ရှိပြီး မနေ့ညကတော့ သေနတ်သံတွေ ကျယ်လောင်ခဲ့ရာ တိုက်ပွဲဖြစ်တဲ့ပုံစံ ပစ်ဖောက်ခဲ့ကြတယ်လို့ ဒေသခံတွေက ပြောပါတယ်။
MK – 009