မဲခေါင်၊ အောက်တိုဘာ ၂၇
ရှမ်းပြည်တောင်ပိုင်း၊ ပင်လောင်းမြို့ဝင်ဂိတ်တွင် ပြောင်းတင် ကုန်တင်ကားတစ်စီးလျှင် ကျပ်တစ်သိန်းအထိ ငွေကြေးတောင်းခံနေပြီး မပေးနိုင်ပါက ကားကို အချိန်ကြာမြင့်စွာ ရပ်ထားစေသည်ဟု ကုန်တင်ကားသမားများနှင့် နီးစပ်သည့် သတင်းရင်းမြစ်များထံမှ သိရသည်။
ယင်းဂိတ်တွင် တာဝန်ကျနေသည့် ဒုရဲအုပ် ရဲအောင်ဆိုသူက မြို့နယ်အတွက် ဂါရဝကြေးပေးရမည်ဟုဆိုကာ ပြောင်းတင်ကားတစ်စီးလျှင် ကျပ်တစ်သိန်း တောင်းခံနေသည်ဟု သတင်းရင်းမြစ်က ပြောသည်။
တောင်းခံသည့်ငွေကို မပေးနိုင်သည့် ကားများကို တစ်နေကုန်အထိ ရပ်ထားစေခြင်းများ ရှိသဖြင့် ပြောင်းကုန်သည်များနှင့် ကုန်တင်ကားသမားများအနေဖြင့် အချိန်နှင့် သယ်ယူပို့ဆောင်ရေးစရိတ်များ ပိုမိုကုန်ကျကာ အခက်အခဲများ ကြုံနေရသည်ဟု ဆိုသည်။
ဒုရဲအုပ် ရဲအောင်ဆိုသူသည် နေ့ခင်းနှင့် ညနေပိုင်းများတွင် ကုန်တင်ကားသမားများထံမှ ငွေကြေးတောင်းခံလေ့ရှိသည့်အပြင် ညပိုင်းများတွင် အမျိုးသမီး ရဲဝန်ထမ်းများနှင့်အတူ အရက်သောက်စားခြင်းများ ပြုလုပ်နေသည်ဟုလည်း စွပ်စွဲထားသည်။
ယင်းကဲ့သို့ သောက်စားမှုများကို ဟိုတယ်နှင့် တည်းခိုခန်းများအပြင် ဂိတ်အတွင်း၌ပင် ပြုလုပ်နေသည်ဟု သတင်းရင်းမြစ်က ဆိုသည်။
အဆိုပါကိစ္စနှင့် ပတ်သက်၍ အထက်တာဝန်ရှိသူများ သိရှိထားသော်လည်း ထိရောက်သည့် အရေးယူဆောင်ရွက်မှု မရှိသေးကြောင်း သတင်းရင်းမြစ်က ပြောသည်။
#MeKongNews
#ပင်လောင်း
#ပင်လောင်းမြို့ဝင်ဂိတ်
#ပြောင်းကား
#ဂါရဝကြေး
#ငွေကြေးတောင်းခံမှု
