မဲခေါင်၊ အောက်တိုဘာ ၄
ရှမ်းပြည်အရှေ့ပိုင်း၊ မိုင်းတုံမြို့နယ်၊ နားကောင်းမူးကျေးရွာမှ တာချီလိတ်မြို့သို့ သယ်ဆောင်လာသည့် သစ်ကားတစ်စီးကို မိုင်းဆတ်မြို့နယ်အတွင်းရှိ မိုင်းတွင်းစုပေါင်းဂိတ်၌ တရားမဝင် သစ်မှောင်ခိုမှုဖြင့် စက်တင်ဘာလ နောက်ဆုံးပတ်အတွင်းက ဖမ်းဆီးအရေးယူထားကြောင်း သတင်းရရှိသည်။
ယင်းသစ်ကား ပေါ်တွင် ကျွန်း ၈ တန်၊ အင်ကြင်း ၂ တန်နှင့် ပျဉ်းကတိုး ၅ တန်တို့အား ကားအမိုးဖုံး၍ သယ်ဆောင်လာခြင်းဖြစ်ပြီး တာချီလိတ်ခရိုင် သာသနာရေးမှူးရုံး၏ ထောက်ခံစာနှင့် တာချီလိတ်နယ် ရှမ်းနှစ်ခြင်းခရစ်ယာန်အသင်းတော်များအဖွဲ့၏ ထောက်ခံချက်များ ပါရှိသော်လည်း သက်ဆိုင်ရာ ဒေသဆိုင်ရာ အာဏာပိုင်များ၏ တိကျသည့် အထောက်အထား မပါရှိသောကြောင့် ဖမ်းဆီးထားခြင်း ဖြစ်သည်။
စာရွက်စာတမ်း ထောက်ခံချက်များအရ ယင်းသစ်များမှာ တာချီလိတ်မြို့၊ ဆန်ဆိုင်း (က) ရပ်ကွက်ရှိ “ပြည့်စုံသက်တာ ပရဟိတဂေဟာ” ရေဘေးသင့်စဉ်က ပျက်စီးခဲ့သည့် အဆောက်အအုံများ ပြန်လည်ပြင်ဆင်ရန်အတွက် အလှူရှင်များ စုပေါင်းလှူဒါန်းထားသည့် သစ်များ ဖြစ်ကြောင်း ဖော်ပြထားသည်ကို မဲခေါင်က ဖတ်ရှုရသည်။
ယင်းသစ်ကားသည် မိုင်းတုံမြို့နယ်မှ UWSA စစ်ဒေသ (၁၇၁) ဧရိယာဖြစ်သော ဝမ်ဟုန်ဒေသကို ဖြတ်သန်း၍ ပုံမှန်မဟုတ်သည့် လမ်းကြောင်းအတိုင်း မောင်းနှင်လာခဲ့ခြင်းဖြစ်ပြီး၊ မိုင်းဆတ်ဒေသခံတစ်ဦး၏ ပြောဆိုချက်အရ ဒေသဆိုင်ရာ အာဏာပိုင်များသို့ တင်ပြထားသော်လည်း သင်းအုပ်ဆရာနှင့် ယာဉ်မောင်းတို့အကြား ချိတ်ဆက်မှု လွဲမှားခဲ့ခြင်းကြောင့် အဖမ်းခံရခြင်း ဖြစ်သည်ဟု သိရသည်။
“အမှန်တော့ ဒေသဆိုင်ရာ အာဏာပိုင်တွေကို တင်ပြထားတယ်လို့ သိရတယ်။ ပုံမှန်လမ်းကြောင်းက မသွားဘဲ “ဝ” လမ်းကြောင်းက သွားတာရယ်၊ သင်းအုပ်ဆရာနဲ့ ကားသမား ချိတ်ဆက်မမိတာရယ် ခုလိုဖြစ်တာလို့ သိရတယ်။ သင်းအုပ်က ကားအဖမ်းခံရတဲ့အချိန် မသိဘဲ မိုင်းဆတ်မှာ ဘုရားကျောင်းတက်နေတာတဲ့” ဟု မိုင်းဆတ်ဒေသခံတစ်ဦးက မဲခေါင်သို့ ပြောသည်။
လက်ရှိတွင် ယင်းသစ်ကားအား မိုင်းတွင်း စုပေါင်းဂိတ်၌ အရေးယူဆောင်ရွက်လျက်ရှိကြောင်း သိရှိရသည်။
#MeKongNews
#သစ်ကား
#တာချီလိတ်
#သာသနာရေးဦးစီးဌာန
#မိုင်းတွင်း
