မဲခေါင်၊ စက်တင်ဘာ ၃၀
ရှမ်းပြည်တောင်ပိုင်း၊ ဟိုပုံးမြို့နယ်၊ ကျောက်တန်းကျေးရွာတွင် ပအိုဝ်းပြည်သူ့စစ်-PNO က စစ်ကောင်စီအတွက် စစ်သားစုဆောင်းနေပြီး ပါဝင်သူများကို ၃ နှစ်စာချုပ် ချုပ်ဆိုခိုင်းနေကြောင်း ဒေသခံများထံမှ သိရသည်။
ကျေးရွာအတွင်းရှိ လူငယ်များကို စစ်သားအဖြစ် ပါဝင်ရန် ခေါ်ယူနေသည့်အပြင် နိုင်ငံခြားရောက်ရှိနေသူအချို့ကိုလည်း နေရပ်သို့ ပြန်လာရန် အကြောင်းကြားထားကြောင်း ဒေသခံများက ပြောသည်။
“စစ်သားအဖြစ် ဝင်ဖို့ လူငယ်တွေကို ခေါ်နေပါတယ်။ ဝင်တဲ့သူတွေက ၃ နှစ်စာချုပ် ချုပ်ရတယ်လို့ သိရတယ်။ နိုင်ငံခြားရောက်နေတဲ့သူတချို့ကိုလည်း ပြန်လာဖို့ ခေါ်တာရှိတယ်” ဟု ကျောက်တန်းဒေသခံတစ်ဦးက ပြောသည်။
စစ်သားအဖြစ် ပါဝင်ရန် မလိုက်ပါလိုသူများအနေဖြင့်လည်း ငွေကြေးပေးဆောင်၍ ရှောင်လွှဲရသည့် အခြေအနေရှိနေပြီး ကျေးရွာအတွင်း စစ်မှုထမ်းရေးအတွက် ငွေကြေးကောက်ခံမှုများလည်း ရှိနေကြောင်း ဒေသခံများက ဆိုသည်။
“ရွာမှာတော့ စစ်သားမလိုက်နိုင်တဲ့သူတွေက ငွေနဲ့ ဖြေရှင်းပေးနေရတာတွေ ရှိတယ်။ ဘယ်လောက်ပေးရတယ်ဆိုတာကတော့ လူတစ်ယောက်နဲ့တစ်ယောက် မတူဘူး” ဟု ဒေသခံတစ်ဦးက ပြောသည်။
ဟိုပုံးမြို့နယ်အတွင်း PNO နှင့် စစ်ကောင်စီဘက်က စစ်သားစုဆောင်းခြင်းနှင့် စစ်မှုထမ်းကြေး ကောက်ခံခြင်းများ ရှိနေကြောင်း ယခင်ကလည်း ဒေသခံများက ပြောဆိုထားသည်။
တစ်ချို့သော လူငယ်များသည် PNO ပြည်သူ့စစ်က စစ်မှုထမ်းခိုင်းပြီး ဆီဆိုင်၊ ဖယ်ခုံဖက်ရှေ့တန်းတွင်သွားခိုင်းပြီး တိုက်ပွဲအတွင်း သေဆုံးသွားရသူလည်းရှိကြောင်း ဒေသခံများထံမှ သိရသည်။
#MeKongNews
#ဟိုပုံးကျောက်တန်း
#ရှမ်းတောင်
#ပအိုဝ်း
#ပြည်သူ့စစ်
#စစ်ကောင်စီ
