မဲခေါင်၊ စက်တင်ဘာ ၂၇
ကိုးကန့်ဒေသ၊ လောက်ကိုင်မြို့တွင် ကိုးကန့်တပ်ဖွဲ့ (MNDAA) က ကျင်းပသည့် တရုတ်ရိုးရာ လမုန့်စားပွဲတော်ည အခမ်းအနားသို့ ညီနောင်မဟာမိတ်အဖွဲ့များဖြစ်သည့် တအာင်းတပ်ဖွဲ့ (PSLF/TNLA) နှင့် အာရက္ခတပ်တော် (ULA/AA) တို့မှ ခေါင်းဆောင်များ တက်ရောက်ခဲ့သည်ဟု ကိုးကန့်တပ်ဖွဲ့က စက်တင်ဘာ ၂၆ ရက်တွင် တရုတ်ဘာသာဖြင့် သတင်းထုတ်ပြန်သည်။
အဆိုပါအခမ်းအနားကို စက်တင်ဘာ ၂၅ ရက် ညနေ ၆ နာရီတွင် လောက်ကိုင်မြို့ ၌ ကျင်းပခဲ့ပြီး MNDAA ခေါင်းဆောင် ဖုန်တာရွှင်နှင့်အတူ PSLF/TNLA ဥက္ကဋ္ဌ တာအိုက်ဘုန်း၊ ဒုဥက္ကဋ္ဌ တာခူးလန်းနှင့် ULA/AA ဒုစစ်ဦးစီးချုပ် ဒေါက်တာညိုထွန်းအောင်တို့ တက်ရောက်ခဲ့သည်။
ကိုးကန့်တပ်ဖွဲ့နှင့် တအာင်းတပ်ဖွဲ့သည် ညီနောင်မဟာမိတ်အဖွဲ့ဝင်များဖြစ်သကဲ့သို့ စစ်ကောင်စီနှင့် တွေ့ဆုံဆွေးနွေးနေသည့် အဖွဲ့လည်းဖြစ်သည်။ ထို့အပြင် ပြီးခဲ့သည့် မတ်လတွင်လည်း ကိုးကန့်တပ်ဖွဲ့က တအာင်းတပ်ဖွဲ့ထိန်းချုပ်ထားသည့် ကွတ်ခိုင်မြို့နယ်ကို အချင်းချင်း ပြန်လည်တိုက်ခိုက်သိမ်းပိုက်ခဲ့သည်။ ယင်းသို့ နှစ်ဖွဲ့ကြား တိုက်ပွဲဖြစ်ပြီးနောက် ၆ လအကြာတွင် နှစ်ဖက်ခေါင်းဆောင်များကို ကိုးကန့်ဒေသတွင် အတူပြန်မြင်တွေ့ရခြင်းဖြစ်သည်။
ညီနောင်မဟာမိတ် ၃ ဖွဲ့ဖြစ်သည့် MNDAA ၊ TNLA ၊ AA တို့သည် တစ်ဖွဲ့ကို တိုက်ခိုက်ပါက ကျန်သည့်အဖွဲ့များကိုလည်း တိုက်ခိုက်သည်ဟု သတ်မှတ်ကာ အပြန်အလှန်ကူညီသွားမည်ဟု ကြေညာထားသည့်အဖွဲ့ဖြစ်သည်။
သို့သော် လက်ရှိတွင် TNLA နှင့် MNDAAသည် စစ်ကောင်စီနှင့်အပစ်ရပ်ကာ နေပြည်တော်သို့ သွားရောက် စစ်ကောင်စီနှင့် တွေ့ဆုံဆွေးနွေးနေသော်လည်း AAကိုမူ စစ်ကောင်စီက အင်အားအလုံအရင်းဖြင့် ထိုးစစ်ဆင်နေသဖြင့် တိုက်ပွားဖြစ်ပွားနေလျက်ရှိသည်။
လောက်ကိုင်တွင် ပြုလုပ်သည့် လမုန့်စားပွဲတော် အခမ်းအနားသို့ MNDAA ၏ ပါတီဘက် နှင့် စစ်ဘက်ဆိုင်ရာ ခေါင်းဆောင်များအပြင် ပြိုင်ပွဲဝင်အားကစားသမားများ၊ ဒိုင်လူကြီးများနှင့် ပရိသတ်များလည်း တက်ရောက်ခဲ့ကြသည်။
အခမ်းအနားတွင် တရုတ်ရိုးရာလမုန့်စားပွဲတော်နှင့် သက်ဆိုင်သည့် ဖျော်ဖြေရေးအစီအစဉ်များအပြင် တအာင်း၊ ဝ စသည့် တိုင်းရင်းသားများ၏ ရိုးရာအကများ၊ ရခိုင်သီချင်းများ၊ စစ်သည်တော်အကနှင့် ရိုးရာစုပေါင်းတေးသီချင်းများကိုလည်း ဖျော်ဖြေခဲ့ကြသည်ဟုဆိုသည်။
ယခုနှစ် လမုန့်စားပွဲတော်အခမ်းအနားတွင် MNDAA နှင့် ညီနောင်မဟာမိတ်အဖွဲ့များမှ ခေါင်းဆောင်များ၊ အဖွဲ့ဝင်များနှင့် ဒေသခံများ စုဝေးခဲ့ကြပြီး အားကစားပြိုင်ပွဲနှင့် ယဉ်ကျေးမှုဖျော်ဖြေပွဲများကို ပေါင်းစပ်ကျင်းပခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြသည်။
#MeKongNews
#ကိုးကန့်တပ်
#တအာင်းတပ်
#ရခိုင်တပ်
#တရုတ်
#လမုန့်ပွဲ
