မဲခေါင်၊ စက်တင်ဘာ ၈
ကိုးကန့်တပ်ဖွဲ့-MNDAA ထိန်းချုပ်ထားသည့် သိန္နီမြို့နယ်၊ စယ်အူကျေးရွာအုပ်စု၊ မန်မိုင်ရွာတွင် ယမ်းသိုလှောင်ရုံပေါက်ကွဲမှုဖြစ်ပွားသဖြင့် ၁၅ ဦးထက်မနည်း ထိခိုက်သေဆုံးမှုရှိသည်ဟု ဒေသခံသတင်းရင်းမြစ်များကပြောသည်။
ယနေ့ နံနက် ၅ နာရီကျော်ခန့်တွင် ယင်းယမ်းသိုလှောင်ရုံပေါက်ကွဲခဲ့ခြင်းဖြစ်ပြီး ပေါက်ကွဲမှုအတွင်း ထိခိုက်သေဆုံးမှုရှိသည့် တရုတ်နိုင်ငံသား လုပ်ငန်းရှင်အပါအဝင် အလုပ်သမား နှင့် ကိုးကန့်တပ်ဖွဲ့ဝင်များကို သိန္နီဆေးရုံသို့ ပို့ဆောင်ခဲ့သည်ဟု ဆိုသည်။
“ဆေးရုံရောက်ပြီးမှ သေသွားတာလည်းရှိတယ်။ အနည်းဆုံး ၁၅ ယောက်သေတယ်။ တရုတ်နိုင်ငံသား လုပ်ငန်းရှင်ကတော့ သေတဲ့အထဲ မပါဘူး။ ယမ်းသိုလှောင်ရုံ ပေါက်ကွဲသွားတာ။ ရွှေတူးတဲ့နေရာတို့ လမ်းဖောက်တဲ့ နေရာတို့မှာ သုံးတဲ့ ယမ်းပျော့တွေ ပေါက်ကွဲတာ လက်နက်မှာ သုံးတဲ့ယမ်းတွေတော့မဟုတ်ဘူး” ဟု ဒေသခံသတင်းရင်းမြစ်ကပြောသည်။
ယင်းသို့ ယမ်းသိုလှောင်ရုံပေါက်ကွဲမှုကြောင့် စက်ရုံအတွင်းရှိ အလုပ်သမားနှင့်လုံခြုံရေးတပ်ဖွဲ့ဝင်များ ထိခိုက်သေဆုံးမှု များပြားသော်လည်း ကျေးရွာဒေသခံများမှာမူ ထိခိုက်သေဆုံးမှုမရှိကြောင်းလည်း သတင်းရင်းမြစ်ကပြောသည်။
“ပေါက်ကွဲမှုက နမ့်ခမ်းလောက်မဟုတ်ပေမယ့် တော်တော်ပြင်းထန်တယ်။ ရွာထဲကအိမ်တွေ တုန်ကုန်တယ်။ အဲ့ဒီစက်ရုံက ယမ်းတွေထုတ်တာ ယမ်းတွေသိုလှောင်တာ လူတိုင်းသိတယ်။ စက်ရုံက ရွာဧရိယာထဲဆိုပေမယ့် ရွာလယ်ခေါင်မဟုတ်ဘူး။ ရွာအစပ်မှာဆိုတော့ ရွာထဲက နေအိမ်တစ်ချို့နဲ့ ဘုန်းကြီးကျောင်းကတော့ မျက်နှာကျက်ပြိုကျတာ ပြတင်းပေါက်ကွဲတာတွေတော့ ဖြစ်တယ်”ဟု ဒေသခံသတင်းရင်းမြစ်ကပြောသည်။
လက်ရှိအချိန်တွင် ပေါက်ကွဲမှုဖြစ်ပွားသည့် ယင်းနေရာသို့ မည်သူကိုမျှ ပေးသွားခြင်းမရှိပဲ ကိုးကန့်တပ်ဖွဲ့က ပိတ်ထားလိုက်သဖြင့် ထိခိုက်သေဆုံးမှု နောက်ဆက်တွဲ အသေးစိတ်ကိုမူ မသိရသေးကြောင်း သတင်းရင်းမြစ်ကပြောသည်။
“အခု အဲ့နေရာကို ဘယ်သူကိုမှ မပေးသွားတော့ဘူးလေ။ ဘယ်နှစ်ယောက်ထပ်သေလဲ ထိခိုက်လဲ ထပ်မသိရတော့ဘူး။ ကိုးကန့်က ပိတ်ထားတယ်”ဟု ၎င်းဒေသခံသတင်းရင်းမြစ်ကပြောသည်။
ပေါက်ကွဲမှုဖြစ်ပွားခဲ့သည့် မန်မိုင်ရွာသည် သိန္နီမြို့မှ ၁၀ မိုင်ခန့်ကွာဝေးသည်။ ယခုပေါက်ကွဲမှုနှင့်ပတ်သက်ပြီး ကိုးကန့်တပ်ဖွဲ့-MNDAA ဘက်ကမူ တစ်စုံတစ်ရာ ထုတ်ပြန်ခြင်းမရှိသေးပေ။
သိန္နီမြို့ကို ကိုးကန့်တပ်ဖွဲ့က ၁၀၂၇ စစ်ဆင်ရေးအတွင်း စစ်ကောင်စီထံမှ တိုက်ခိုက်သိမ်းယူခဲ့ခြင်းဖြစ်သည်။
#MeKongNews
#ကိုးကန့်တပ်
#သိန္နီ
#MNDAA
#ယမ်းဂိုဒေါင်
#ပေါက်ကွဲ
