မဲခေါင်၊ ဇူလိုင် ၂၅
ရှမ်းပြည်မြောက်ပိုင်း၊ စစ်ကောင်စီထိန်းချုပ်၊ မူဆယ်မြို့မှာ တရားမဝင်အွန်လိုင်းလောင်း ကစားနေရာတစ်ခုကို စစ်ကောင်စီက အင်အားသုံး ဝင်ရောက်ဖမ်းဆီးခဲ့ကြောင်း သိရသည်။
ယမန်နေ့ ဇူလိုင်၂၄ ရက်၊ မနက်ပိုင်းက မူဆယ်မြို့၊ စွမ်စော်ရပ်ကွက်၊ စွမ်စော် (၂)လမ်းရှိ နေအိမ်တစ်လုံးအတွင်းမှ အွန်လိုင်းလိမ်လည်လောင်း ကစားမှု ကျူးလွန်သူ တရုတ်နိုင်ငံသား အမျိုးသား ၁၇ ဦးနှင့် မြန်မာနိုင်ငံသား အမျိုးသား ၁၂ ဦး၊ အမျိုးသမီး ၁၅ ဦး၊ စုစုပေါင်း ၄၄ ဦးတို့အား ဖုန်းမျိုးစုံ ၃၃လုံး၊ All In One ကွန်ပျူတာ ၃၈ လုံး၊ Laptop ၁လုံး၊ Star Link ၁လုံး၊ ဆိုင်ကယ် ၈စီး တို့နှင့်အတူ ဖမ်းဆီးရမိခဲ့သည်ဟု စစ်ကောင်စီ က ထုတ် ပြန်သည်။
၎င်းအပြင်ဆက်လက်၍ အဆိုပါရပ်ကွက်အတွင်း စုံစမ်း ရှာဖွေ ခဲ့ရာ နေ့လယ်တွင် အဆိုပါလမ်းအတွင်းရှိ နေအိမ်တစ်လုံးမှ အွန်လိုင်းလိမ်လည်လောင်း ကစားမှုကျူးလွန်သူ မြန်မာနိုင်ငံသား အမျိုးသား ၁၁ ဦးအား All In One ကွန်ပျူတာ ၃၃ လုံး၊ CPU ၃ လုံး၊ UPS ၅ လုံး တို့နှင့်အတူ ထပ်မံဖမ်းဆီးရမိခဲ့သည်ဟု ထုတ်ပြန်ချက်မှာပါရှိသည်။
“စစ်တပ်နဲ့ရဲပဲ ဖမ်းတာ၊ အဲ့ဖက်က KTV နဲ့ဘားတွေ အများကြီးပဲ၊ ရဲကားနဲ့တော့ အပြည့်ပဲ” ဟု ၎င်းက ဆိုသည်။
အဆိုပါ အွန်လိုင်းလိမ်လည်လောင်းကစားမှုများလုပ်ကိုင်လျက်ရှိသည့် ဖမ်းဆီးရမိသူများအား လိုအပ်သည့် စစ်ဆေးမှုများ ဆောင်ရွက်ပြီးစီးပါက တည်ဆဲဥပဒေများ နှင့်အညီ ထိရောက်ပြင်းထန်စွာ အရေးယူဆောင်ရွက်သွားမည်ဖြစ်ပြီး သိမ်းဆည်းရမိ သည့် လုပ်ငန်းသုံးပစ္စည်းများအား လုပ်ထုံးလုပ်နည်းများနှင့်အညီ ဆက်လက်ဆောင် ရွက်သွားမည်ဖြစ်ကြောင်း သိရသည်။
မူဆယ်ကို လက်ရှိထိန်းချုပ်ထားသည့် အရှေ့မြောက်တိုင်းစစ်ဌာနချုပ်မှ စစ်ဟာဗျူသည် မကြာခဏဆိုသလို ကျားဖြန့်များကို ဖမ်းဆီးနေခြင်း ဖြစ်သည်။
ပြီးခဲ့သည့် ဇွန်လ ၂၂ ရက်၊ ညနေ ၃ နာရီခွဲ အချိန်ခန့်ကလည်း မူဆယ်မြို့၊တော်ရွက်ရပ်ကွက်ရှိ နေအိမ်တစ်လုံးအား ဝင်ရောက်စစ်ဆေးရှာဖွေရာ အွန်လိုင်းလိမ်လည် လောင်းကစားမှု ကျူး လွန်သူ တရုတ်နိုင်ငံသား အမျိုးသား ၂ ဦးနှင့် မြန်မာနိုင်ငံသား အမျိုးသား ၄၇ ဦး၊ အမျိုးသမီး ၁၀ ဦး၊ စုစုပေါင်း ၅၉ ဦးတို့အား ဖုန်းမျိုးစုံ ၂၀၀ လုံး၊ All In One ကွန်ပျူတာ ၁၀ လုံး၊ Laptop ၅ လုံး၊ ဆိုင်ကယ်မျိုးစုံ ၁၀ စီးတို့နှင့်အတူ ဖမ်းဆီးရမိခဲ့သေးသည်။
#MeKongNews
#ရှမ်းမြောက်
#မူဆယ်
#ကျားဖြန့်
#တရုတ်နိုင်ငံသား
#မြန်မာနိုင်ငံသား
#ဖမ်းဆီး
