မဲခေါင်၊ ဇွန် ၆
ရှမ်းပြည်တောင်ပိုင်း၊ ရွှေညောင်မြို့ရှိ တာယောချောင်း ရေလျှံရာမှတစ်ဆင့် တောင်လေးလုံးကျေးရွာဘက်တွင် ရေကြီးရေလျှံမှုများ ပြင်းထန်စွာ ဖြစ်ပေါ်လျက်ရှိကြောင်း ဒေသခံများထံမှ သိရသည်။
ယနေ့ ဇွန်လ ၆ ရက် မွန်းလွဲ ၃ နာရီခန့်ကစတင်ကာ မိုးသည်းထန်စွာ ရွာသွန်းခဲ့ခြင်းကြောင့် ရွှေညောင်မြို့အတွင်း ဖြတ်သန်းစီးဆင်းနေသည့် တာယောချောင်းရေလျှံကာ ချောင်းအောက်ခြေစီးဆင်းရာ တောင်လေးလုံးကျေးရွာဘက်တွင် ယခုကဲ့သို့ ရေကြီးရေလျှံမှုများ ဖြစ်ပေါ်လာခြင်း ဖြစ်သည်။
“မိုးရေကတော့ အရမ်းများတာပဲ။ တိုးဂိတ်ကနေ လမ်းပေါ်အထိ ရေတွေ လျှံတက်လာတာ။ အခုလောက်အထိ ရေတခါမှ မကြီးဖူးသေးဘူး။ အိမ်မွေးဝက်တွေ ရေထဲမျောပါတာမျိုးရှိသလို အိမ်အုတ်တံတိုင်းတွေလည်း ပြိုကျကုန်တယ်လို့ ကြားရတယ်။ လျှပ်စစ်မီးတိုင်တွေလည်း လဲကျကုန်တယ်။ မိုးဆက်မရွာရင်တော့ ရေပြန်ကျနိုင်ပေမဲ့ ဒီအတိုင်း မိုးဆက်သည်းနေရင်တော့ အောက်ပိုင်းရပ်ကွက်တွေပါ ရေမြုပ်ကုန်နိုင်တယ်” ဟု တောင်လေးလုံးလမ်းဆုံအနီး နေထိုင်သူတစ်ဦးက ပြောသည်။
ယနေ့ ဇွန်လ ၆ ရက်တွင် တောင်ကြီးမြို့နယ်အတွင်း မိုးသည်းထန်စွာ ရွာသွန်းခဲ့သဖြင့် တောင်ကြီးမြို့ပေါ်မှ ရွှေညောင်မြို့ဘက်သို့ ရေအလုံးအရင်းနှင့် စီးဆင်းကျရောက်လာခဲ့သည်။
ထို့ပြင် ရွှေညောင်မြို့မြောက်ဘက်ရှိ ကျီးဖြူကန်မှာလည်း ရေပြည့်လျှံလာခဲ့သဖြင့် တာယောချောင်းရေ ပြည့်လျှံကာ တောင်လေးလုံးလမ်းတစ်လျှောက်လုံး ရေကြီးရေလျှံမှု ဖြစ်ပေါ်ခဲ့ခြင်း ဖြစ်ကြောင်း သိရသည်။
အလားတူ ရှမ်းပြည်တောင်ပိုင်း လွိုင်လင်မြို့တွင်လည်း ယနေ့ညနေပိုင်းက မိုးသည်းထန်စွာ ရွာသွန်းခဲ့မှုကြောင့် ရပ်ကွက် (၃) နှင့် ရပ်ကွက် (၄) ရှိ နေအိမ်အချို့အတွင်းသို့ ရေဝင်ရောက်မှုများ ဖြစ်ပေါ်ခဲ့ကြောင်း သိရသည်။
#MeKongNews
#ရွှေညောင်
#တာယောချောင်း
#တောင်လေးလုံးကျေးရွာ
#ရေကြီးရေလျှံ
#ရှမ်းတောင်
