မဲခေါင်၊ ဇွန် ၆
တရုတ်နံပါတ်ကားဖြင့် တရုတ်ဘီယာဖာပေါင်း ၄ ထောင်နီးပါး သယ်ဆောင်လာကာ လားရှိုးမြို့သို့ တရားမဝင် ဝင်ရောက်လာသည့် တရုတ်နိုင်ငံသားတစ်ဦးကို စစ်ကောင်စီ၏ စုပေါင်းစစ်ဆေးရေးဂိတ်က ယမန်နေ့တွင် ဖမ်းဆီးမိခဲ့သည်။
ယမန်နေ့ နံနက် ၁၀ နာရီတွင် တရုတ်နိုင်ငံသားတစ်ဦးမောင်းနှင်ပြီး တရုတ်နံပါတ်ပြား တပ်ဆင်ထားသည့် ၁၂ ဘီး ကုန်တင်ကားတစ်စီးသည် လားရှိုးမြို့ရှောင်လမ်းမှတဆင့် စစ်ကောင်စီ စုပေါင်းစစ်ဆေးရေးဂိတ် ရှိသည့် လားရှိုးမြို့အဝင်သို့ ရောက်ရှိလာခဲ့ရာမှ ဖမ်းဆီးခံခဲ့ရခြင်းဖြစ်သည်။
ယင်းဖမ်းဆီးရမိသည့် ကားပေါ်တွင် တရုတ်နိုင်ငံထုတ် Dan Niya တံဆိပ် တစ်ဖာလျှင် ၂၄ လုံးပါ ဘီယာဖာပေါင်း ၃၈၅၀ ကိုလည်း တွေ့ရှိ သိမ်းဆည်းရမိသည်ဟု လားရှိုးမြို့ခံ သတင်းရင်းမြစ်ထံမှ သိရသည်။
“လားရှိုးမြို့အဝင်မှာက တပ်ရော ရဲရော လဝကရောအကုန်ထိုင်တဲ့ စုပေါင်းဂိတ်လေ တရုတ်ကားကလည်း အဲ့ဂိတ်တည့်တည့်ကိုမှ ရောက်လာတော့ အဖမ်းခံလိုက်ရတာပေါ့။ ဂိတ်ရှေ့ ရောက်လာမှတော့ မဖမ်းလို့လည်း မရတော့ဘူးလေ။ သူက မြို့ရှောင်လမ်းဆုံကနေ ကိုးကန့်ထိန်းချုပ်တဲ့ မယ်ဟန်ရွာကို ကုန်ပို့ဖို့ သွားတာ လမ်းမှားပြီး ရောက်လာတော့ အဖမ်းခံလိုက်ရတာ”ဟု လားရှိုးရဲနှင့် နီးစပ်သည့် သတင်းရင်းမြစ်က ပြောသည်။
ယင်းဖမ်းဆီးရမိသည့် တရုတ်ကားပေါ်တွင် ယာဉ်မောင်းတစ်ဦးသာ ပါရှိပြီး ယာဥ်မောင်းမှာ တရုတ်နိုင်ငံသားကတ်၊ တရုတ်နိုင်ငံ ယာဥ်မောင်းလိုင်စင် ကိုင်ဆောင်ထားပြီး ကိုးကန့်တပ်ဖွဲ့ထိန်းချုပ်ထားသည့် ချင်းရွှေဟော်၊ ကွမ်းလုံ၊ သိန္နီ၊ လားရှိုးမြို့ရှောင်လမ်းအတိုင်း ဝင်ရောက်လာခြင်းဖြစ်သည်ဟု ၎င်းသတင်းရင်းမြစ်က ပြောသည်။
၁၀၂၇ စစ်ဆင်ရေးပြီးနောက်ပိုင် ရှမ်းမြောက်တွင်ရှိသည့် တရုတ် – မြန်မာ နယ်စပ်ဂိတ်အများစုကို ကိုးကန့်တပ်ဖွဲ့က ထိန်းချုပ်လျက်ရှိရာ ယင်းဂိတ်များမှတစ်ဆင့် တရုတ်နိုင်ငံသားများသည် ၎င်းတို့၏ ကိုယ်ပိုင်ကားများဖြင့် ကွတ်ခိုင်၊ ကွမ်းလုံ၊ သိန္နီ၊ လားရှိုးမြို့နယ်များအတွင်းပိုင်းထိ ဝင်ထွက်သွားလာနေကြသည်။
#MeKongNews
#တရုတ်နံပတ်ပြားကား
#ဘီယာဖာ
#လားရှိုး
#တရုတ်နိုင်ငံသား
