မဲခေါင်၊ မေ ၂၆
ရှမ်းပြည်တောင်ပိုင်း၊ ပင်လောင်းမြို့နယ် တင်းထက်ကျေးရွာတွင် EPC ရုံးစောင့်နေသူ ခွန်ထွန်းဟန်က မီးကြိုးအသစ် လဲလှယ်ရန်ဆိုပြီး ရွာသားများထံမှ တစ်အိမ်လျှင် ကျပ် ၂ သိန်းခွဲကျော်အထိ ကောက်ခံနေကြောင်း ဒေသခံများထံမှ သိရသည်။
ဒေသခံများ၏ ပြောကြားချက်အရ တင်းထက်ကျေးရွာသည် လျှပ်စစ်မီး အသုံးပြုလာသည်မှာ ၁၀ နှစ်ကျော်ခန့် ရှိပြီဖြစ်ပြီး လက်ရှိ အသုံးပြုနေသည့် မီးကြိုးများမှာ သက်တမ်းလွန်နေပြီ ဖြစ်သဖြင့် တစ်ရွာလုံး မီးကြိုးအသစ်များ ပြန်လည် လဲလှယ်ရမည်ဟု EPC ရုံးစောင့်သူ ခွန်ထွန်းဟန်က ရွာသားများကို အကြောင်းကြားခဲ့ကြောင်း သိရသည်။
“တခြားရွာတွေလည်း မီးယူတာ ၁၀ နှစ်ကျော်နေပြီ။ ဒါပေမယ့် အခုလို ငွေအများကြီး ကောက်ပြီး မီးကြိုးလဲခိုင်းတာ မကြားဖူးဘူး။ ခုက တင်းထက်တစ်ရွာတည်း ဖြစ်နေတာ။ ခုလဲခိုင်းတာကလည်း မြို့နယ်ကနေ လဲခိုင်းတာမဟုတ်ဘူး၊ ရွာမှာ မီးစောင့်နေတဲ့ ခွန်ထွန်းဟန်က လဲခိုင်းတာ” ဟု ဒေသခံတစ်ဦးက ဆိုသည်။
ထို့ပြင် မီးကြိုးမလဲပါက လက်ရှိ အသုံးပြုနေသည့် မီးလိုင်းများနှင့် လျှပ်စစ်မီတာဘောက်များကို ပြန်လည် ဖြုတ်သိမ်းသွားမည်ဟုလည်း ပြောဆိုခြိမ်းခြောက်မှုများ ရှိနေကြောင်း ဒေသခံများက ပြောသည်။
“ရွာသားတွေက အခုလို တစ်အိမ်ကို နှစ်သိန်းကျော်ပေးရတာ အခက်အခဲများတယ်။ မပေးနိုင်တဲ့ အိမ်တွေလည်းရှိတယ်။ မီးဖြုတ်မယ်ဆိုပြီး ပြောတော့ လူတွေက စိုးရိမ်နေကြတယ်” ဟု ဒေသခံတစ်ဦးက ပြောသည်။
ပင်လောင်းမြို့နယ်အတွင်းရှိ ကျေးရွာအများစုမှာလည်း လျှပ်စစ်မီးအသုံးပြုလာသည်မှာ ၁၀ နှစ်ကျော် ရှိနေပြီဖြစ်သော်လည်း ယခုကဲ့သို့ တစ်ရွာလုံး မီးကြိုးလဲခအဖြစ် ငွေကောက်ခံနေခြင်းမှာ တင်းထက် တစ်ရွာတည်းသာ ရှိနေကြောင်း ဒေသခံများက ဆိုသည်။
ဒေသခံများ၏ အဆိုအရ မီးကြိုးလဲလှယ်ရန် ငွေကောက်ခံနေသူ ခွန်ထွန်းဟန်မှာ PNO တပ်ဖွဲ့ဝင်တစ်ဦးလည်း ဖြစ်နေသဖြင့် ရွာသားများအနေဖြင့် ကြောက်ရွံ့စိုးရိမ်မှုများ ရှိနေပြီး တိုက်ရိုက် မေးမြန်းပြောဆိုရန်ပင် ခက်ခဲနေကြောင်း သိရသည်။
“PNO တပ်ဖွဲ့ဝင်လည်း ဖြစ်နေတော့ ရွာသားတွေက ကြောက်ပြီး မပြောရဲကြဘူး။ အထက်က တာဝန်ရှိသူတွေက ဒီကိစ္စကို စိစစ်ပေးစေချင်တယ်” ဟုလည်း ဒေသခံတစ်ဦးက ပြောဆိုထားသည်။
လက်ရှိတွင် ရွာသားများအနေဖြင့် မီးကြိုးလဲလှယ်ရေးနှင့် ပတ်သက်သည့် ကုန်ကျစရိတ်များ၊ လုပ်ငန်းဆောင်ရွက်ပုံများကို ပွင့်လင်းမြင်သာစွာ သိရှိလိုနေကြပြီး ယင်းကိစ္စအား သက်ဆိုင်ရာ အထက်တာဝန်ရှိသူများမှ စိစစ်ဖြေရှင်းပေးရန် တောင်းဆိုနေကြသည်။
တင်းထက်ကျေးရွာသည် ပင်လောင်းမြို့၏ အရှေ့တောင်ဘက် တောင်အမြင့်ပိုင်းတွင် တည်ရှိနေသော ကျေးရွာကြီး တစ်ရွာဖြစ်ပြီး အိမ်ခြေ ၂ ထောင်နီးပါးရှိကာ ပအိုဝ်းတိုင်းရင်းသားများ အများစု နေထိုင်ကြကြောင်း သိရသည်။
#MeKongNews
#ပင်လောင်းမြို့နယ်
#တင်းထက်ကျေးရွာ
#မီးကြိုးလဲခ
#EPC
