မဲခေါင်၊ မေ ၁၁
ရုရှားတပ်များကို အကျအဆုံးများစေပြီး နယ်မြေသစ်များ ထပ်မံ မသိမ်းပိုက်နိုင်ရန် အကောင်းဆုံး ဟန့်တားနေနိုင်သော ယူကရိန်းစစ်တပ်သည် ရှေ့တန်းစစ်မျက်နှာပြင်သို့ လူမဲ့မြေပြင်ယာဉ် (UGVs) ခေါ် စစ်သားစက်ရုပ် ယန္တရား အစီး ၂၅၀၀၀ ပို့ဆောင် တိုက်ခိုက်စေရန် အသင့်ဖြစ်နေပြီ ဖြစ်သည်။
ရုရှားနှင့်စစ်ပွဲတွင် ယူကရိန်း၏ မဟာဗျူဟာလက်နက်သည် မောင်းသူမဲ့ယာဉ်များဖြစ်ကာ သမ္မတဇီလန်းစကီးက ဧပြီလ တစ်လအတွင်း စစ်ရေးမစ်ရှင်များနှင့် ပြန်လည် အင်အားဖြည့်တင်းခြင်း လုပ်ငန်းစဉ်များတွင် UGVs စက်ရုပ်များ စေလွှတ်နိုင်ခဲ့သည့် အရေအတွက်မှာ အစီးပေါင်း စံချိန်တင် ၁၀၂၈၁ စင်းရှိခဲ့ကာ နိုဝင်ဘာလအတွင်း က ၂၉၀၀ စီးသာ စေလွှတ်နိုင်ခဲ့သဖြင့် များစွာ တိုးတက်ခဲ့ကြောင်း ဖွင့်ဟခဲ့သည်။
ယခုလည်း မိုင်းထောင်ခြင်း၊ ဒဏ်ရာရစစ်သည်များကို ကယ်ထုတ်ခြင်း၊ စစ်ရေးထောက်ပို့လုပ်ငန်းများ လုပ်ဆောင် ခြင်းနှင့် ရန်သူနေရာများကိုပါ ပစ်ခတ် တိုက်ခိုက်နိုင်စွမ်းရှိသော UGVs အစီးပေါင်း ၂၅၀၀၀ ကို ၂၀၂၆ ပထမနှစ် ဝက်မတိုင်မီ ရှေ့တန်းသို့ ပို့ဆောင်ရန် အသင့်ဖြစ်နေပြီဟု အတည်ပြုခဲ့ခြင်း ဖြစ်သည်။
ယူကရိန်းသည် ကမ္ဘာပေါ်တွင် ပထမဆုံးနှင့် တစ်ခုတည်းသော စက်ရုပ်တပ်မဟာကို ထူထောင်ထားနိုင်ပြီး K2 တပ်မဟာသည် ၂၀၁၇ ခုနှစ်တွင် စတင်ကာ စက်ရုပ်စစ်သားယန္တရားများကို စတင်ထုတ်လုပ်ကာ ၂၀၂၅ ခုနှစ် ဆောင်းဦးကာလတွင် အလုံးစုံ စက်ရုပ်ယန္တရားများသာ သီးသန့်ပါဝင်သည့် တပ်မဟာ ဖြစ်လာခဲ့သည်။
စစ်ပွဲကာလများတွင် ထောက်ပို့လုပ်ငန်းများ လုပ်ဆောင်ရသော ကုန်တင်ကားများစွာမှာ ရုရှားဒရုန်းများကြောင့် ပျက်စီးခြင်းနှင့် ယာဉ်မောင်းများ မလုံမလောက်နှင့် ရှားပါးလာခဲ့ပြီးနောက် ယခုလို စက်ရုပ်ယန္တရားသီးသန့် တပ်မဟာကို ထူထောင်ကာ ဒရုန်းနှင့် UGVs များကို ထုတ်လုပ်၍ ရှေ့တန်းတွင် ထိရောက်စွာအသုံးချနေခဲ့ ခြင်းဖြစ်သည်။
K2 တပ်မဟာသည် Tarhan 200၊ Tarhan 300၊ Rys PRO နှင့် SIM-RACAR-Lambda ဆိုသည့် စက်ရုပ်ယန္တရားများကိုလည်း တီထွင်အသုံးပြုနေကာ မစ်ရှင်တစ်ခုတွင် မိုင် ၃၀ ပတ်လည်အတွင်း ၁၀ နာရီကြာ တာဝန်ထမ်းဆောင်နိုင်သည်။
ထိုစက်ရုပ်ယန္တရားများကို မစ်ရှင်တစ်ခုတွင် လူသားစစ်သည် ၁၀ ဦးကသာ ထိန်းချုပ်ပြီး ၎င်းတို့က ယာဉ်မောင်းများ၊ ဒရုန်းမောင်းနှင်သူများနှင့် မြေပြင်ထောက်ကူရေး ထိန်းချပ်မှုများ လုပ်ဆောင်ပေးရသည်။
ဧပြီလတစ်လအတွင်း K2 တပ်မဟာသည် ထို UGVs ယာဉ်များဖြင့် အန္တရာယ်ဇုန်အတွင်းမှ ယူကရိန်းစစ်သည် ၄၀ ကျော်ကို ကယ်ထုတ်နိုင်ခဲ့ကာ နိုဝင်လာလနောက်ပိုင်း ရှေ့တန်းအန္တရာယ်ဇုန်တွင် ကျဆုံးခဲ့သည့် စစ်သည် ၈ ဦး၏ ရုပ်အလောင်းများကို ပြန်ရှာဖွေ သယ်ဆောင်နိုင်ခဲ့သည်။
မကြာသေးမီက ဒိုးနက်စ်ဒေသ နိုဗိုစီလစ်ဗ်ကာအနီး တံတားအနီး ရုရှားစစ်သည် ၃ ဦး ချည်းကပ်လာသည်ကို ဒရုန်းမှ မြင်ရပြီးနောက် K2 တပ်မဟာက Ardal စက်ရုပ်စစ်သည်ယန္တရားတစ်စီးကို စေလွှတ်ကာ မိုင်းထောင်ပြီး အဝေးထိန်းစနစ်ဖြင့် ဖောက်ခွဲတိုက်ခိုက်ခဲ့ရာ ၃ ဦးစလုံးကို ရှင်းလင်းနိုင်ခဲ့သေးသည်။
K2 တပ်မဟာမှ UGVs တပ်မှူးအဖနာဆိဗ်က ၎င်းတို့ တပ်တွင် UGVs များစွာရှိနေကာ အဓိက ရည်ရွယ်ချက်သည် လူသားစစ်သည်များ အသက်အန္တရာယ်ကို မထိခိုက်စေရန် ရည်ရွယ်ကာ အန္တရာယ်ရှိသည့် မစ်ရှင်များတွင် စက်ရုပ်များကို အသုံးပြုခြင်းက အလွန်ထိရောက်သဖြင့် ပျက်စီးမှုများရှိလျှင်လည်း လူသားအသက် ပေးရခြင်းထက် များစွာထိုက်တန်သည်ဟု တယ်လီဂရပ်ဖ်သို့ ပြောခဲ့သည်။
ကိုကလင်း
Ref: Thesun
#MeKongNews
#ရုရှား
#စစ်မျက်နှာပြင်
#UGVs
#စက်ရုပ်
#ယူကရိန်း
