မဲခေါင်၊ မေ ၁၀
PNO ၏ စစ်မှုထမ်းခေါ်ယူမှုကြောင့် ထိုင်းနိုင်ငံသို့ ရွှေ့ပြောင်းနေထိုင်နေသည့် ပအိုဝ်းလူမျိုး နာမည်ကြီး ဆယ်လီတစ်ဦးဖြစ်သူ ခွန်သန်းထက်သည် ယမန်နေ့ မေ ၉ ရက် ညပိုင်းတွင် ဓားပြတိုက်ခံရပြီး ဓားဖြင့်ခုတ်ခံရမှု ဖြစ်ပွားခဲ့ကြောင်း သိရသည်။
၎င်းသည် ဘန်ကောက်မြို့ ဘန်ကပီကုန်တိုက်ဘက်မှ လမ်စလီဘက်သို့ လူကူးတံတားပေါ်မှ ပြန်လာစဉ် အမည်မသိလူများ၏ လုယက်တိုက်ခိုက်မှုကို ခံခဲ့ရခြင်းဖြစ်ကြောင်း သိရသည်။
“ကျနော် စဖန်ပေါ် ပြန်လာတဲ့အချိန် ဓားပြတိုက်ခံရတာပါ။ ညဖက်ဆိုတော့ လူမရှိပါဘူး။ ကျနော့်ကိုလည်း ဓားနဲ့ ခုတ်သွားတယ် လက်နှစ်ဖက်စလုံး ဓားဒဏ်ရာတွေနဲ့ ပြီးရင် ခေါင်းကိုလည်း ထိုးတယ် ကျောနဲ့ ဗိုက်ကိုလည်း ကန်တယ်။ ညဖက် တစ်ယောက်တည်းဆိုရင် လုံးဝမသွားပါနဲ့နော်”ဟု ၎င်း၏ လှုမှုကွန်ရက်စာမျက်နှာတွင် ငိုကြွေး မျှဝေထားသည်။
ယင်းဖြစ်စဉ်အတွင်း ခွန်သန်းထက်ထံမှ ထိုင်းဘတ်ငွေ ၇ ထောင်ကျော် ပါသွားခဲ့ပြီး ဓားဖြင့်ခုတ်ခံရသဖြင့် ထိခိုက်ဒဏ်ရာများလည်း ရရှိခဲ့ကြောင်း နီးစပ်သူများထံမှ သိရသည်။
“အဲဒီလမ်စလီဖက် ပြန်တဲ့ တံတားကက ရှည်လည်းရှည်တယ်။ မှောင်လည်းမှောင်တယ် ဓားပြတိုက်ခံရတာ လုယက်ခံရတာတွေလည်း မကြာခန ကြားရတယ်။ ထိုင်းရောက်နေတဲ့ မြန်မာတွေအနေနဲ့ ညဖက်ဆို အဲလမ်း မသွားတာ ပိုလုံခြုံပါတယ်”ဟု ထိုင်းရောက် ရွှေ့ပြောင်းလုပ်သားတစ်ဦးက ပြောသည်။
ခွန်သန်းထက်သည် မြန်မာနိုင်ငံတွင် ကျောင်းဆရာတစ်ဦးအဖြစ် လုပ်ကိုင်ခဲ့သူဖြစ်ပြီး PNO ၏ စစ်မှုထမ်းခေါ်ယူမှုနှင့် ပတ်သက်သည့် အခြေအနေများကြောင့် ထိုင်းနိုင်ငံသို့ ရွှေ့ပြောင်းနေထိုင်ခဲ့ကြောင်း သိရသည်။
ခွန်သန်းထက်သည် ဟိုပုံးမြို့ဇာတိဖြစ်ပြီး “ပအိုဝ်းကောင်လေးပါ” သီချင်းဖြင့် လူမှုကွန်ရက်ပေါ်တွင် လူသိများလာ သည့် ပအိုဝ်းလူငယ်ဆယ်လီတစ်ဦး ဖြစ်သည်။
#MeKongNews
#ထိုင်းရောက်
#ခွန်သန်းထက်
#ဓားဖြင့်ခုတ်
#ဓားပြတိုက်
